រាជធានីភ្នំពេញ ៖ នៅទីស្នាក់ការកណ្តាលកាកបាទក្រហមកម្ពុជា កាលពីថ្ងៃទី៦ ធ្នូ លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានទទួលជួបភ្ញៀវកិត្តិយសសប្បុរសធម៌ចំនួនបី ដើម្បីទទួលអំណោយសម្រាប់ទ្រទ្រង់ដល់សកម្មភាពមនុស្សធម៌របស់កាកបាទក្រហមកម្ពុជា។
ភ្ញៀវទី១ គឺសម្តេចព្រះអគ្គមហាសង្ឃរាជាធិបតីទេពវង្ស សម្តេចព្រះមហាសង្ឃរាជគណៈមហានិកាយនៃព្រះរាជាណាចក្រកម្ពុជា បានប្រគល់អំណោយជាទឹកប្រាក់ចំនួន១ម៉ឺនដុល្លារអាមេរិក។ ភ្ញៀវទី២-គឺលោកឧកញ៉ាគិត ធាង បានប្រគល់អំណោយជាថវិកាចំនួន១០ម៉ឺនដុល្លារ អាមេរិក និងភ្ញៀវទី៣ គឺលោកគ្រីនយុគ វាសីលី ប្រធានក្រុមហ៊ុនមេគង្គខនសាល់ធីង សឺវីស បានប្រគល់អំណោយជាទឹកប្រាក់ចំនួន២ម៉ឺនដុល្លារអាមេរិក។
ការប្រគល់អំណោយទាំងនេះ គឺធ្វើឡើងបន្ទាប់ពីសប្បុរសជនបានមើលឃើញអំពីស្ថានភាពរងគ្រោះដោយសារទឹកជំនន់ និងប្រតិបត្តិការចុះជួយប្រជាពលរដ្ឋបានទាន់ពេលវេលាពីសំណាក់រាជរដ្ឋាភិបាល និងកាកបាទក្រហមកម្ពុជាផងនោះ ទើបសប្បុរសជនបាននាំអំណោយទាំងនោះជូនដល់កាកបាទក្រហមកម្ពុជា ដើម្បីសម្តែងអំពីសមានចិត្តសប្បុរសធម៌ និងចូលរួមចំណែកជួយសម្រាលបន្ទុករបស់រាជរដ្ឋាភិបាល និងកាកបាទក្រហមកម្ពុជាផងដែរ។
លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានជម្រាបជូនភ្ញៀវអំពីកិច្ចប្រតិបត្តិការរបស់កាកបាទក្រហមកម្ពុជា ដែលបានចុះជួយប្រជាពលរដ្ឋក្រោមកិច្ចសហប្រតិបត្តិការជាមួយរាជរដ្ឋាភិបាល ដែលបានផ្តល់ជាអង្ករផងដែរ ។ រហូតមកទល់នឹងពេលនេះ កាកបាទក្រហមកម្ពុជាបានជួយប្រជាពលរដ្ឋបានចំនួន២៧ម៉ឺនគ្រួសារ ក្នុងចំណោមប្រជាពលរដ្ឋរងគ្រោះទាំងអស់ជាង៣៥ម៉ឺនគ្រួសារនោះ ។ នៅក្នុងឱកាសនៃការចុះជួយនេះ កាកបាទក្រហមកម្ពុជាបានទទួលអង្ករចំនួន៦ពាន់តោនពីរាជរដ្ឋាភិបាល និងសម្ភារមួយចំនួនទទួលបានពីសប្បុរសជន
មានដូចជាសារុង មុង ភួយ ត្រីខ ក្រមា ជាដើម ដែលកាកបាទក្រហមកម្ពុជាបានធ្វើការចាត់ចែងយកទៅជូនដល់ដៃប្រជាពលរដ្ឋតាមបណ្តាខេត្ត។
លោកជំទាវបានថ្លែងអំណរគុណចំពោះសប្បុរសជនទាំងអស់ដែលតែងតែចូលរួមជួយប្រជាពលរដ្ឋរងគ្រោះតាមរយៈកាកបាទក្រហមកម្ពុជា។ ការចុះជួយប្រជាពលរដ្ឋម្តងៗគឺសុទ្ធតែមានការចូលរួមពីក្រុមការងាររបស់ក្រសួង មន្ទីរ សប្បុរសជន និងអង្គការមួយចំនួនផងដែរ ហើយការចុះជួយដំណាក់កាលទី១គឺបានបញ្ចប់ទៅហើយ នៅសល់ដំណាក់កាលទីពីរទៀត ដែលកាកបាទក្រហមត្រូវការជ្រើសរើសគោលដៅដោយផ្តោតទៅលើចាស់ជរា កុមារកំព្រា និងស្ត្រីមេម៉ាយដែលមានកូនច្រើននៅក្នុងបន្ទុក។គោលដៅ ដែលកាកបាទក្រហមកម្ពុជាត្រូវធ្វើ
ប្រតិបត្តិការជាបន្តទៀតនោះ គឺគ្រួសារកំពុងស្ថិតក្នុងស្ថានភាពមួយដែលបណ្តាសាខាកាកបាទក្រហមចុះទៅពិនិត្យមើលភាពជាក់ស្តែង ដើម្បីលើកជាសំណើដាក់ចូលទីស្នាក់ការកណ្តាលកាកបាទក្រហមកម្ពុជា ៕
ចែករំលែកព័តមាននេះ