ខេត្តកំពង់ធំ ៖ ប្រជាពលរដ្ឋរងគ្រោះដោយទឹកជំនន់មកពីឃុំត្រពាំងប្ញស្សី និងឃុំសានគរ មានចំនួន២៣ភូមិក្នុងស្រុកកំពង់ស្វាយ ខេត្តកំពង់ធំ ចំនួន៩៥០គ្រួសារ ត្រូវបានអាជ្ញាធរខេត្តកំពង់ធំ និងសប្បុរសជនគណៈកម្មការខ្មែរ-អូស្រ្តាលី សង្គ្រោះភាពអាសន្ននៃរដ្ឋវិចតូរីយ៉ានាំយកអំណោយជាគ្រឿងឧបភោគបរិភោគ និងថវិកាសរុបជាង៣ម៉ឺនដុល្លារទៅចែក
ខេត្តកំពង់ធំ ៖ ប្រជាពលរដ្ឋរងគ្រោះដោយទឹកជំនន់មកពីឃុំត្រពាំងប្ញស្សី និងឃុំសានគរ មានចំនួន២៣ភូមិក្នុងស្រុកកំពង់ស្វាយ ខេត្តកំពង់ធំ ចំនួន៩៥០គ្រួសារ ត្រូវបានអាជ្ញាធរខេត្តកំពង់ធំ និងសប្បុរសជនគណៈកម្មការខ្មែរ-អូស្រ្តាលី សង្គ្រោះភាពអាសន្ននៃរដ្ឋវិចតូរីយ៉ានាំយកអំណោយជាគ្រឿងឧបភោគបរិភោគ និងថវិកាសរុបជាង៣ម៉ឺនដុល្លារទៅចែកជូនដោយផ្ទាល់ដៃដល់ប្រជាពលរដ្ឋក្នុង បរិវេណសាលាស្រុកកំពង់ស្វាយ ។ ពិធីចែកអំណោយនេះ ស្ថិតក្រោមវត្តមានចូលរួមពីសំណាក់លោកឈុន ឈន់ អភិបាលខេត្តកំពង់ធំ និងលោកជំទាវលោកជា យូហ៊ន និងលោកស្រីផុន សុគន្ធា ប្រធាននិងនាយិកាគណៈកម្មការខ្មែរ-អូស្ត្រាលីសង្គ្រោះភាពអាសន្ននៃរដ្ឋវិចតូរីយ៉ា និងលោកតាន់ អិចណេង ប្រធានក្លឹបយូដូភ្នំពេញ នាព្រឹកថ្ងៃទី៤ ធ្នូ ឆ្នាំ២០១១។
លោកជា យូហ៊ន និងលោកស្រីផុន សុគន្ធាមានប្រសាសន៍ឱ្យដឹងថា អំណោយសប្បុរសធម៌គណៈកម្មការខ្មែរ-អូស្រ្តាលីសង្គ្រោះភាពអាសន្ន នៃរដ្ឋវិចតូរីយ៉ា បានមកពីការចូលរួមរបស់ប្រជាពលរដ្ឋខ្មែរដែលមានទឹកចិត្តអាណិតស្រឡាញ់ ប្រជាពលរដ្ឋក្នុងប្រទេសជួបគ្រោះធម្មជាតិធ្ងន់ធ្ងរនេះ ដោយនាំយកគ្រឿងឧបភោគ បរិភោគមកចែកជូនប្រជាពលរដ្ឋទាំង៩៥០គ្រួសាររួមមានអង្ករចំនួន១៩តោន, មី៩៥៩កេស,ទឹកស៊ីអីុវ៩៥៩យួរ, ប្រេងកូឡា១.០០០ដប,ថ្នាំពេទ្យ៣.០៣២បន្ទះ និងទឹកបរិសុទ្ធ១.០០០ដប ដោយក្នុង១គ្រួសារៗទទួលបានអង្ករ២០គីឡូក្រាម,មី១កេស, ត្រីខ១០កំប៉ុង, ទឹកស៊ីអ៊ីវ១យួរ,ទឹកបរិសុទ្ធ១ដប,ប្រេងកូឡា១ដប និងថវិកាចំនួន៤ម៉ឺនរៀល។
លោកឈុន ឈន់ បានមានប្រសាសន៍ សំណេះសំណាលទៅកាន់បងប្អូនប្រជាពលរដ្ឋរងគ្រោះថា គ្រោះទឹកជំនន់មកដល់ពេលនេះបានស្រកចុះអស់ហើយ ប៉ុន្ដែបានបំផ្លាញគ្រប់សព្វ ទាំងហេដ្ឋារចនាសម្ព័ន្ធ លិចលង់ផ្ទះសម្បែងរាប់ ម៉ឺនខ្នង ស្លាប់ប្រជាពលរដ្ឋជាច្រើននាក់ បាក់ផ្ទះ ស្ទើរគ្រប់ខេត្ដ-ក្រុង ។ ដោយឡែកនៅស្រុកកំពង់ស្វាយគ្រោះមហន្តរាយដោយសារទឹកជំនន់រយៈពេលជិត២ខែបានធ្វើឱ្យបងប្អូនប្រជាពលរដ្ឋរងផលប៉ះពាល់ខ្វះខាតស្បៀងចំនួនជាង១ម៉ឺន៥ពាន់គ្រួសារ ។ ដោយមានការជួយអន្តរាគមន៍ទាន់ពេលវេលាពីគណៈកម្មាធិការគ្រប់គ្រងគ្រោះមហន្តរាយថ្នាក់ខេត្ត ថ្នាក់ជាតិ ប្រជាពលរដ្ឋទទួលបានអំណោយឧបត្ថម្ភជាបន្តបន្ទាប់ពីរាជរដ្ឋាភិបាលកម្ពុជា កាកបាទក្រហមកម្ពុជា អង្គការជាតិអន្តជាតិ សប្បុរសជននានាចំនួនជាង១ម៉ឺន៤ពាន់៥៦១គ្រួសារ ។ លោកបន្តដោយបានថ្លែងអំណរគុណយ៉ាងជ្រាលជ្រៅបំផុតជូនចំពោះគណៈកម្មការខ្មែរ-អូស្រ្តាលីសង្គ្រោះភាពអាសន្ននៃរដ្ឋវិចតូរីយ៉ា ព្រមទាំងបងប្អូនខ្មែររស់នៅប្រទេសអូស្ត្រាលីដែលបានផ្ដល់អំណោយមនុស្សធម៌ដល់ប្រជាពលរដ្ឋកំពុងខ្វះខាតទាំង៩៥០គ្រួសារ ដើម្បីជួយសម្រាលជីវភាពក្នុងគ្រួសារមួយរយៈពេល ។ ថ្វីដ្បិតតែអំណោយសង្គ្រោះដែលនាំមកចែកជូននាពេលនេះមានចំនួនតិចតួចមិនអាចបំពេញតាមតម្រូវការរបស់បងប្អូនបានយ៉ាងណាក៏ដោយ តែវាអាចជួយសម្រាលដោះស្រាយការលំបាកនៅចំពោះមុខបានមួយរយៈពេលផងដែរ។ លោកឈុន ឈន់ ក៏បានធ្វើការផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវប្រុងប្រយ័ត្នបំផុតពីសុវត្ថិភាពក្នុងការរស់នៅ និងបរិភោគត្រូវប្រុងប្រយ័ត្នខ្លាចកើតមានជំងឺរាករូស អាសន្នរោគ និងជំងឺគ្រុនឈាម ព្រោះបញ្ហាប្រឈមកំពុងតែកើតមានបន្ដទៅទៀតនៅពេលទឹកស្រកទៅវិញ ។
តមកលោកឈុន ឈន់ និងលោកជំទាវ រួមនឹងប្រតិភូគណៈកម្មការខ្មែរអូស្រ្តាលីសង្គ្រោះភាពអាសន្ននៃរដ្ឋវិចតូរីយ៉ា ក៏បាននាំយកថវិកាចំនួន១ពាន់១៥០ដុល្លារ និងសម្ភារមួយចំនួនទៀតទៅប្រគល់ជូនគ្រួសារកុមារីរងគ្រោះបណ្តែតខ្លួនលើទឹក១សប្តាហ៍កំពុងសម្រាកព្យាបាលនៅមន្ទីរពេទ្យខេត្តកំពង់ធំ និងអ្នកជំងឺសម្រាកបន្ទប់ជាមួយគ្នាចំនួន៤នាក់ថវិកាម្នាក់ៗ៤០ម៉ឺនរៀល ព្រមទាំងជូនពរកុមារីរងគ្រោះនិងអ្នកជំងឺកំពុងសម្រាកព្យាបាលទាំងអស់ឆាប់ជាសះស្បើយន្អាលនឹងបានត្រឡប់ទៅផ្ទះវិញដែរ ៕
ចែករំលែកព័តមាននេះ