ខេត្ដបាត់ដំបង ៖ ប្រតិភូមូលនិធិសង្គ្រោះកុមារអាស៊ីអាគ្នេយ៍ដែលមានទីស្នាក់ ការនៅរដ្ឋផ្លរីដា សហរដ្ឋអាមេរិក ចំនួន១៨រូប ដែលដឹកនាំដោយលោកស្រី ឡេង សុផល ជានាយិកាបាននាំយកគ្រឿងបរិក្ខារពេទ្យមួយចំនួនមកប្រគល់ឱ្យមណ្ឌលសុខភាពចំនួន៥ ក្នុងស្រុកសង្កែ ខេត្ដបាត់ដំបង ក្នុងនោះមានម៉ាស៊ីនមីក្រូទស្សន៍ចំនួន៥គ្រឿង និងមួយចំនួនទៀតរំលែកទៅឱ្យមន្ទីរពេទ្យយោធភូមិភាគទី៥ ចំនួន៧គ្រឿង ដែល៣គ្រឿងនៅប្រើប្រាស់បាន ឯ៤គ្រឿងទៀតខូចខាតក្នុងពេលធ្វើដំណើរផ្លូវឆ្ងាយដូច្នេះទុកធ្វើជាគ្រឿងបន្លាស់ និងគ្រឿងសំភារជាច្រើនទៀតទុកសំរាប់ប្រើប្រាស់ជួយព្យាបាលអ្នកជំងឺនៅទីនោះ ។ កាលពីព្រឹកថ្ងៃទី២០ ឧសភា ឆ្នាំ២០១០ នៅក្នុងមណ្ឌលសុខភាពស្រុកសង្កែ ខេត្ដបាត់ដំបង ប្រតិភូអាមេរិកខាងលើត្រូវបានទទួលការស្វាគមន៍ពីលោកពិន សំផុង អនុប្រធានមន្ទីរសុខាភិបាលខេត្ដបាត់ដំបង លោកអ៊ឹម ចិត្រា នាយកប្រតិបត្ដិមណ្ឌលសុខភាពស្រុកសង្កែ និងអ្នកបច្ចេកទេសផ្នែកសុខាភិបាលផ្សេងៗទៀតចំនួន២០រូប បានមកចូលរួមដើម្បីទទួលគ្រឿងសំភារយកទៅប្រើប្រាស់។
លោកអ៊ឹម ចិត្រា នាយកប្រតិបត្ដិមណ្ឌលសុខភាពស្រុកសង្កែ បានរាយការណ៍អំពីសភាពការណ៍ទូទៅនៅតាមមណ្ឌលសុខភាពដែលនៅទីឆ្ងាយៗមានចម្ងាយដល់ទៅ១០០គីឡូម៉ែត្រនៅខាងទិសទន្លេសាប ហើយធ្វើដំណើរទៅតាមទូកកាណូត ដើម្បីពិនិត្យតាមដាន ទប់ស្កាត់ព្យាបាលជំងឺដែលតែងតែកើត មាននៅលើប្រជាពលរដ្ឋដែលរស់នៅទីនោះ សំខាន់ផ្ដោតលើជំងឺអេដស៍ គ្រុនចាញ់ និង របេង ។ លោកបានបញ្ជាក់ថា អ្នកជំងឺមានការកើនឡើងនៅលើស្ដ្រីដែលសំរាលកូន ដោយសារម្នាក់ៗបានគោរពទៅតាមការណែនាំរបស់រាជរដ្ឋាភិបាលដែលតំរូវឱ្យមកសំរាលកូនក្នុងមន្ទីរពេទ្យ ឬមណ្ឌលសុខភាពដែលមានឆ្មបប្រកបដោយសមត្ថភាពជំនាញចាំទទួលសំរាល ដើម្បីបញ្ចៀសការគ្រោះថ្នាក់ ដែលតែងតែកើតមានទៅលើស្ដ្រីជាម្ដាយ និងទារកកុំឱ្យកើតមានគ្រោះថ្នាក់ និងទទួលការឆ្លងរោគផ្សេងៗពីអ្នកដទៃទៅវិញទៅមក ហើយសំខាន់ គឺខ្វះខាតទីកន្លែងរង់ចាំសំរាប់ស្ដ្រីជិតសំរាលកូន ព្រោះតែអ្នកមកសំរាលកូនមានការកើនឡើងជាងឆ្នាំទៅ ឯកន្លែងនៅតែតូចចង្អៀតដដែល ។
លោកស្រី JOANN BURKHARDT សាស្ដ្រាចារ្យទទួលបន្ទុកលើសិស្សសាលាពេទ្យអាមេរិក បានចាប់អារម្មណ៍យ៉ាងខ្លាំងលើបញ្ហាស្ដ្រីដែលតែងតែជួបការលំបាក ហើយអ្នកស្រីបានសន្យាថា នឹងគិតគូរពីបញ្ហាទុក្ខលំបាករបស់ប្រជាពលរដ្ឋខ្មែរក្នុងខេត្ដបាត់ដំបងនេះ ដោយធ្វើការស្វែងរកជំនួយផ្នែក សប្បុរសធម៌មកជួយបន្ថែមទៀតតាមរយៈ អង្គការមូលនិធិសង្គ្រោះកុមារអាស៊ីអាគ្នេយ៍ ដែលកំពុងតែធ្វើការជាមួយគ្នានៅសហរដ្ឋអាមេរិកនោះ ។
លោកពិន សំផុង អនុប្រធានមន្ទីរសុខាភិបាលខេត្ដបានថ្លែងអំណរគុណដល់ប្រតិភូ ដែលបានចាប់អារម្មណ៍ដល់ប្រជាពលរដ្ឋខេត្ដបាត់ដំបង សំខាន់គឺសាស្ដ្រាចារ្យបាននាំសិស្ស និស្សិតពេទ្យ និងនាំទាំងគ្រឿងបរិក្ខារមក ជួយតាមរយៈអង្គការមូលនិធិសង្គ្រោះកុមារអាស៊ីអាគ្នេយ៍ដែលមានលោកស្រី ឡេង សុផល ជានាយិកាដែលធ្លាប់ឆ្លងកាត់ការរស់នៅតំបន់នេះ កាលពីសម័យអាវខ្មៅ ប៉ុលពត។
ការជួយទ្រទ្រង់ផ្នែកសុខភាពជាមុនសិន ទើបជាការប្រសើរសំរាប់ជីវភាពរស់នៅ របស់ប្រជាពលរដ្ឋទូទៅគ្រប់ៗគ្នា ។ នៅល្ងាចថ្ងៃដដែលនេះដែរកម្មវិធីប្រគល់ សំភារបរិក្ខារពេទ្យត្រូវបានធ្វើនៅក្នុងមន្ទីរពេទ្យយោធភូមិភាគទី៥ ដែលមានលោកវរសេនីយ៍វេជ្ជបណ្ឌិត ងួន សូភី នាយករងមន្ទីរពេទ្យបានទទួលស្វាគមន៍ និងបញ្ជាក់ថា ប្រតិភូដែលបានយកសំភារមកឱ្យប្រើប្រាស់ នេះគឺត្រូវចំសភាពការណ៍ដែលមន្ទីរពេទ្យកំពុងត្រូវការ ។ លោកស្រី ឡេង សុផល ក៏បានសន្យាថា ពេលក្រោយៗទៀតអ្នកស្រី នឹងខិតខំរកសំភារ និងឧបករណ៍សំរាប់ពេទ្យមកប្រគល់ឱ្យសំរាប់ទុកព្យាបាលជំងឺដល់ជនកម្ពុជាដោយមិនគិតកំរៃអ្វីឡើយ ។
ចែករំលែកព័តមាននេះ