ខេត្តកណ្តាល ៖ ស្រ្តីមេម៉ាយកូន៤ដែលមានជីវិតក្រលំបាកគ្មានទីជម្រករស់នៅភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល បានទទួលអំណោយជាលើកទី២ ពីសប្បុរសជនដែលមានការអាណិតអាសូរ ហើយការផ្តល់អំណោយនេះត្រូវបានធ្វើឡើងតាមរយៈភ្នាក់ងារកាសែតកោះសន្តិភាព យកទៅជូនដល់ដៃស្រ្តីមេម៉ាយឈ្មោះម៉ិញ សុំ កាលពីព្រឹកថ្ងៃទី២៨
ខេត្តកណ្តាល ៖ ស្រ្តីមេម៉ាយកូន៤ដែលមានជីវិតក្រលំបាកគ្មានទីជម្រករស់នៅភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល បានទទួលអំណោយជាលើកទី២ ពីសប្បុរសជនដែលមានការអាណិតអាសូរ ហើយការផ្តល់អំណោយនេះត្រូវបានធ្វើឡើងតាមរយៈភ្នាក់ងារកាសែតកោះសន្តិភាពយកទៅជូនដល់ដៃស្រ្តីមេម៉ាយឈ្មោះម៉ិញ សុំ កាលពីព្រឹកថ្ងៃទី២៨ វិច្ឆិកា ឆ្នាំ២០១១ កន្លងទៅនេះ ដោយមានការចូលរួមជាសាក្សីពីលោកកុយ ណារ៉ុង មេឃុំកំពង់ស្វាយផងដែរ។
សប្បុរសជនដែលបានផ្តល់អំណោយរួមមានក្រុមហ៊ុន ស៊ែន រីសស (Sandresource) ថវិកាចំនួន១០០ដុល្លារសហរដ្ឋអាមេរិក, លោកអ៊ុន ស៊ីណា និងលឹម គីមហ្គេច ចំនួន១៥ដុល្លារសហរដ្ឋអាមេរិក, លោកសេង គី លក់ជ្រូកខ្វៃនៅច្បារអំពៅ១ ផ្ទះលេខ40E0 ផ្លូវជាតិលេខ១ ខណ្ឌមានជ័យ ឧបត្ថម្ភចំនួន៣ម៉ឺនរៀល។
បងស្រី ម៉ិញ សុំ បានថ្លែងអំណរគុណយ៉ាងជ្រាលជ្រៅចំពោះសប្បុរសជនដែលបានជួយ ឧបត្ថម្ភថវិកាដល់រូបគាត់ និងកូនៗទាំង៤នាក់ដែលកំពុងរស់នៅយ៉ាងលំបាកទាំងជីវភាព និងជម្រក។ បងស្រីបានជូនពរដល់សប្បុរសជនទាំងអស់ឱ្យជួបប្រទះតែសេចក្តីសុខគ្រប់ប្រការ និងប្រកបដោយពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ បងស្រី បានបញ្ជាក់ថា អំណោយទាំងអស់នេះបងស្រី នឹងយកទៅផ្គត់ផ្គង់ដល់ការសិក្សារបស់កូនៗដែលពួកគេកំពុងជួបការលំបាកខ្វះមុខខ្វះក្រោយ ។
ស្ថិតក្នុងភាពជាស្រ្តីមេម៉ាយស្រ្តីឈ្មោះម៉ិញ សុំ កំពុងតែរស់នៅក្នុងជីវភាពលំបាកលំបិន ហើយសូម្បីតែជម្រកក៏ត្រូវសំពះសុំសំយាបផ្ទះគេជ្រកដែរ។ តាមការរៀបរាប់របស់ស្រ្តីមេម៉ាយរូបនោះគឺជីវិតគាត់មិនដែលស្គាល់នូវអ្វីដែលជាភាពគ្រប់គ្រាន់នោះទេតាំងពីប្តីគាត់នៅរស់ម៉្លេះ ហើយក្រោយពីប្តីស្លាប់ទៅជីវិតរស់នៅកាន់តែលំបាកថែមទៀត សំខាន់ការទ្រាំទ្រចិញ្ចឹមកូនកំព្រាទាំង៤នាក់ដែលពួកគេមិនគ្រាន់តែត្រូវការរស់នឹងម្ហូបអាហារនោះទេ តែពួកគេត្រូវការសិក្សារៀនសូត្របន្ថែមទៀត។ បច្ចុប្បន្នគាត់ប្រកបរបរដើរបេះត្រកួននៅក្នុងបឹងដើម្បីយកទៅលក់ ហើយក្នុងមួយថ្ងៃគាត់អាចរកកម្រៃបានប្រមាណ៥.០០០រៀលប៉ុណ្ណោះ។ ប៉ុន្តែប្រសិនបើជំងឺប្រចាំកាយរបស់គាត់រើឡើងវិញនោះ គឺគាត់ត្រូវខកខានមិនបានទៅបេះត្រកួននោះទេ ហើយច្បាស់ជាត្រូវខ្វះអង្ករច្រកឆ្នាំងមិនខាន។ ដូច្នេះអំណោយដែលសប្បុរសជនផ្តល់ជូនដល់រូបគាត់នោះគឺជាទឹកចិត្តមនុស្សធម៌ដែលមិនអាចកាត់ថ្លៃបានឡើយ។ គាត់បានលើកដៃសំពះទាំងទឹកភ្នែកសូមឱ្យសប្បុរសជនមេត្តាបន្តជួយដល់រូបគាត់ផង ហើយគាត់សន្យាថានឹងយកអំណោយទាំងនោះទៅចំណាយលើអ្វីដែលមានប្រយោជន៍សម្រាប់ជីវិតនិងការសិក្សារបស់
កូនៗ។
បងស្រី ម៉ិញ សុំ បានថ្លែងអំណរគុណយ៉ាងជ្រាលជ្រៅនិងអស់ពីចិត្តពីថ្លើមផងដែរ ចំពោះ កាសែតកោះសន្តិភាពដែលបានអាណិតអាសូរ ជួយចុះផ្សាយអំពីជីវិតពិតនិងភាពក្រីក្ររបស់គាត់ដែលនាំឱ្យមានសប្បុរសជនផ្តល់ថវិកាជាបន្តបន្ទាប់។ បងស្រីសូមជូនពរដល់ថ្នាក់ដឹកនាំ បុគ្គលិក កម្មករកាសែតកោះសន្តិភាពទាំងអស់ជួបប្រទះតែសេចក្តីសុខ សិរីសួស្តី អាយុយឺនយូរ និងប្រកបមុខរបរបានចម្រុងចម្រើនសមតាមសេចក្តីប្រាថ្នា ៕
ចែករំលែកព័តមាននេះ