*កីឡាការិនីប្រដាល់ប្រឆាំងនឹងច្បាប់ស្លៀកសំពត់ចូលប្រកួតក្រោយពីអូឡាំពិកបញ្ចូលប្រដាល់សាកលស្ត្រីជាលើកដំបូង
គោលគំនិតរបស់សហព័ន្ធប្រដាល់់សាកលអន្តរជាតិ(IBA)ដែលកំពុងពិភាក្សាស្តីពីកំណែទម្រង់់ច្បាប់ឱ្យកីឡាការិនីប្រដាល់សាកលស្ម័គ្រចិត្តស្លៀកសំពត់ចូលប្រកួតក្នុងអូឡាំពិក ហាក់ដូចជាមិនបានទទួលការគាំទ្រពីកីឡាការិនីឡើយ។ ការប្រកួតប្រដាល់សាកលស្ត្រីស្ម័គ្រចិត្តនឹងបានបញ្ចូលទៅក្នុងកម្មវិធីប្រកួតអូឡាំពិកជាលើកដំបូងដោយផ្នែកសហព័ន្ធប្រដាល់សាកលអន្តរជាតិ(IBA) មានការពិភាក្សាថានឹងឱ្យអ្នកចូលប្រកួតត្រូវស្លៀកសំពត់ ប៉ុន្តែមានប្រតិកម្មពីសំណាក់កីឡាការិនីប្រដាល់ដោយមិនយល់ស្របលើគោលគំនិតខាងលើ ។ កីឡាការិនីប្រដាល់ មានគំនិតថា ប្រសិនបើមានការកែប្រែច្បាប់ឱ្យស្លៀកសំពត់ មានន័យថា ជាការរើសអើង ។
នាងណាតាសា ចូន អ្នកប្រដាល់សាកលទម្ងន់ស្រាលមធ្យម(Lightweight 57-60 គីឡូក្រាម)ជាម្ចាស់មេដាយប្រាក់នៅទ្វីបអឺរ៉ុប ថ្លែងថា «ខ្ញុំមិនគិតថា ការពិភាក្សារបស់IBA នឹងក្លាយជាច្បាប់ដូចគ្នានឹងការពាក់ធ្មេញកៅស៊ូឬឧបករណ៍ការពារក្បាលឡើយ ប៉ុន្តែខ្ញុំយល់ថា កីឡាការិនីគួរស្លៀកខោទើបជាការល្អ» ។ IBAនឹងកំណត់ពេលប្រកាសច្បាប់ខាងលើនាដើមឆ្នាំ២០១២ ខណៈពេលកីឡាប្រដាល់សាកលស្ម័គ្រចិត្តស្ត្រីទទួលបានការបញ្ចូលទៅក្នុងអូឡាំពិកជាលើកដំបូង ដោយមានការប្រកួត៣ទម្ងន់ គឺទម្ងន់ស្រាល (Flyweight ពី៤៩-៥២គីឡូក្រាម) ទម្ងន់ស្រាលមធ្យម(Lightweightពី៥៧-៦០គីឡូក្រាម) និងទម្ងន់មធ្យម(Middleweight ពី៦៩-៧៥គីឡូក្រាម)។គួរបញ្ជាក់ថា នឹងមានការសាកល្បងប្រកួតកីឡាចំនួន៧ប្រភេទក្នុងសប្តាហ៍នេះ ដោយដំណើរការក្នុងរយៈពេលពី២-៣សប្តាហ៍ ។
*បេកខាំ បិទភ្នែកទាត់បាល់ឃោសនាបំផុសឱ្យកុមារចូលលេងកីឡាបាល់ទាត់
កីឡាករដេវីដ បេកខាំ តារាបាល់ទាត់ជនជាតិអង់គ្លេស ចូលប្រកួតបាល់ទាត់ដោយបិទភ្នែកជាមួយក្លឹបបាល់ទាត់ប៉ារ៉ាឡាំពិក ឬបាល់ទាត់ជនពិការរបស់ប្រទេសអង់គ្លេសដែលជាផ្នែកមួយនៃការឃោសនារបស់«សេនប៊ីយូរី» ផ្សារទំនើបដ៏ធំបំផុតនៅប្រទេសអង់គ្លេស ក្នុងគោលបំណងជំរុញឱ្យកុមារងាកទៅថែរក្សាសុខភាពដោយការលេងកីឡាកាន់តែច្រើន ។
ដេវីដ បេកខាំ ជារាជទូតប៉ារ៉ាឡាំពិកហ្គេម២០១២ របស់អង់គ្លេស បង្ហើបឱ្យដឹងថា «ខ្ញុំមានអារម្មណ៍ល្អ ដោយបានលេងបាល់ជាមួយជនពិការ ។ វាជាបទពិសោធន៍ដ៏ល្អដែលខ្ញុំបានហាត់សមជាមួយក្រុមជម្រើសជាតិបាល់ទាត់អង់គ្លេស ប៉ារ៉ាឡាពិក ដោយខ្ញុំមិនធ្លាប់មានបទពិសោធន៍លេងបាល់ទាត់ដោយការបិទភ្នែក កាលពីមុនឡើយ។ កីឡាខាងលើបង្ហាញឱ្យឃើញពីគុណភាពរបស់កីឡាករប៉ារ៉ាឡាំពិករបស់យើងទាំងបុគ្គលិកលក្ខណៈ និងការពុះពារដែលពួកគេបង្ហាញឡើង ធ្វើឱ្យខ្ញុំមានសោមនស្សរីករាយក្នុងនាមជាជនជាតិអង់គ្លេស »៕
ចែករំលែកព័តមាននេះ