ក្រុងប៉ោយប៉ែត ៖ អគារសិក្សាថ្មីសន្លាងមួយខ្នងស្ថិតក្នុងភូមិបាលិលេយ្យ២ សង្កាត់ប៉ោយប៉ែត ដែលជាអំណោយដ៏សប្បុរសរបស់សហព័ន្ធរួបរួមគ្នានៃក្រុមការងារក្រុមហ៊ុនប៉ាណាសូនិចនៃប្រទេសជប៉ុន ត្រូវបានសម្ពោធដាក់ឱ្យប្រើប្រាស់ជាផ្លូវការបន្ទាប់ពីសាងសង់រួចនៅព្រឹកថ្ងៃទី២៤ វិច្ឆិកា ក្រោមអធិបតីភាពលោកអ៊ុង អឿន អភិបាលនៃគណៈអភិបាលខេត្តបន្ទាយមានជ័យ ។ ចូលរួមក្នុងពិធីនោះមានមន្ត្រីអ្នកមុខអ្នកការមកពីស្ថាប័នមន្ទីរពាក់ព័ន្ធ និងតំណាងកងកម្លាំងគ្រប់អង្គភាពជុំវិញខេត្ត លោកង៉ោ ម៉េងជ្រួន អភិបាលក្រុង លោកចៅសង្កាត់ រួមទាំងជនជាតិជប៉ុន តំណាងក្រុមហ៊ុនប៉ាណាសូនិចជាច្រើននាក់និងសិស្សានុសិស្សរាប់រយនាក់ ។
អគារសិក្សាដែលសម្ពោធដាក់ឱ្យប្រើប្រាស់ខាងលើត្រូវបានលោកជា ពិសិដ្ឋ នាយកសាលាបឋមសិក្សាអូរជ្រៅថ្មី ប្រាប់ឱ្យដឹងថា មានទទឹង៩ម៉ែត្រ បណ្តោយ៣២ម៉ែត្រ ធ្វើពីថ្មប្រក់ក្បឿង និងមានពិតានយា៉ងស្រស់ស្អាត ។ លោកនាយកសាលាបន្តថា អគារសិក្សានេះចាប់ផ្តើមដំណើរការសាងសង់កាលពីខែសីហា ឆ្នាំ២០១១ និងទើបរួចរាល់បើកសម្ពោធឱ្យប្រើប្រាស់នាពេលនេះឯង ហើយថវិកាដែលយកមកសាងសង់គឺជារបស់សប្បុរសជននៃសហព័ន្ធរួបរួមគ្នានៃក្រុមការងារក្រុមហ៊ុនបា៉ណាសូនិច អេឡិចត្រូនិចនៃប្រទេសជប៉ុន ។
លោកនាយកសាលាបញ្ជាក់បន្ថែមថា សប្បុរសជនជប៉ុនខាងលើមិនត្រឹមតែជួយសាងសង់អគារសិក្សា៤បន្ទប់នេះទេ ពួកគេនឹងជួយធ្វើអណ្តូងទឹក ខ្លោងទ្វារសាលា ធ្វើដងទង់ជាតិ និងជួយចាក់ដីលើទីធ្លាសាលានៅខែកុម្ភៈ ឆ្នាំ២០១២ ខាងមុខទៀតផង ។ សប្បុរសជនជប៉ុនមួយក្រុមនេះ ដឹកនាំដោយលោកណុហ្សាគី ស៊ីងហ្គុ ។
លោកង៉ោ ម៉េងជ្រួន អភិបាលក្រុងប៉ោយប៉ែតក៏ដូចជាលោកអ៊ុង អឿន អភិបាលខេត្តបានថ្លែងកោតសរសើរ និងដឹងគុណដល់សប្បុរសជនជាជនជាតិជប៉ុនទាំងអស់ដែលមើលឃើញពីការខ្វះខាតអគារសិក្សា ហើយបានជួយនៅពេលនេះ។ លោកអភិបាលក្រុង និងលោកអភិបាលខេត្ត បានណែនាំឱ្យបុគ្គលិកសិក្សា និងសិស្សានុសិស្សទាំងអស់ សូមជួយថែរក្សាអគារសិក្សាមួយខ្នងនេះឱ្យបានល្អ ដើម្បីប្រើប្រាស់បានយូរអង្វែង៕
ចែករំលែកព័តមាននេះ