ជំងឺពពែឆ្កែ ឬពពែភ្នែកគឺជាពាក្យដែលប្រជាពលរដ្ឋយើងតែងតែហៅតៗគ្នា ដែលតាមពិតទៅជំងឺពពែឆ្កែនេះ គឺជាជំងឺបូសនៅត្របកភ្នែក ឬក៏ហៅថា Stye។ លោកវេជ្ជបណ្ឌិតងឺ ម៉េន អនុប្រធាននៃមន្ទីរពេទ្យព្រះអង្គឌួង និងជាអនុប្រធាននៃកម្មវិធីសុខភាពភ្នែក មានប្រសាសន៍ថា ជំងឺបូសនៅលើត្របកភ្នែក ឬជំងឺពពែឆ្កែនេះ មិនមែនកើតឡើងដោយសារមើលសត្វឆ្កែ ឬសត្វអ្វីពាក់គ្នានោះទេ។វាកើតឡើងដោយសារការស្ទះក្រពេញនៅលើត្របកភ្នែក ដែលបណ្តាលមកពីធូលីដីចូលទៅបិទជិតរន្ធក្រពេញលើត្របកភ្នែក ដែលអាចបង្កឱ្យកើតទៅជាបូស ឬអាប់សែនៅលើត្របកភ្នែក។
លោកអ្នកអាចកត់សម្គាល់ជំងឺពពែឆ្កែ ឬពពែភ្នែក ឬបូសលើត្របកភ្នែកតាមអាការមួយចំនួនដូចជា ៖
-អ្នកជំងឺអាចមានអារម្មណ៍ថា ឈឺនៅលើត្របកភ្នែកខាងលើ ឬក៏នៅខាងក្រោម
-ត្របកភ្នែកមានសភាពឡើងក្រហម និងហើមនៅកន្លែងដែលឈឺចាប់នោះ
-កន្លែងដែលហើមនេះអាចបង្កឱ្យកើតទៅជាខ្ទុះ ហើយបង្កទៅជាបូសតែម្តង។ ដូច្នេះបើសិនជាលោកអ្នកកើតមាននូវបញ្ហាទាំងនេះ លោកអ្នកអាចយកទឹកក្តៅឧណ្ហមកស្អំនៅលើភ្នែករបស់លោកអ្នក ដើម្បីកាត់បន្ថយនូវភាពឈឺចាប់។
លោកវេជ្ជបណ្ឌិតបានបន្តថា ជំងឺបូសនៅលើត្របកភ្នែកនេះ អាចបង្កឱ្យមានផលប៉ះពាល់ចំពោះអ្នកជំងឺដូចជា
-ប៉ះពាល់ទៅលើត្របកភ្នែក បណ្តាលឱ្យភ្នែកឈឺហើយពិបាកនៅក្នុងការបិទបើកភ្នែក។
-នៅពេលដែលលោកអ្នកមិនបានធ្វើការព្យាបាលឱ្យបានទាន់ពេលវេលានោះទេ ជំងឺនេះអាចរាលដាលទៅកន្លែងផ្សេងទៀត បង្កឱ្យកើតទៅជារលាកជាលិកានៅជុំវិញត្របកភ្នែក ហើយបើសិនជាបូសនេះ មានសភាពធ្ងន់ធ្ងរអាចធ្វើឱ្យបាត់បង់គំហើញថែមទៀតផង។
លោកវេជ្ជបណ្ឌិតបានបន្តទៀតថា ដើម្បីចៀសវាងកុំឱ្យកើតមានជំងឺបូសនៅលើត្របកភ្នែកនេះ នៅពេលដែលលោកអ្នកធ្វើដំណើរទៅ ណាម្តងៗ ត្រូវពាក់វ៉ែនតា ដើម្បីការពារកុំឱ្យធូលីហុយចូលទៅក្នុងភ្នែក ដែលអាចបង្កទៅជាបូស ឬអាប់សែរ។
-នៅពេលត្រឡប់មកពីកន្លែងណាម្តងៗ លោកអ្នកត្រូវធ្វើការលុបលាងមុខឱ្យបានស្អាត ជានិច្ច។
-នៅពេលដែលភ្នែកមានបញ្ហា ដូចជា រកាំនោះ មិនត្រូវញីភ្នែកញឹកញាប់ឡើយ។
-ជាពិសេសបើសិនជាលោកអ្នកនាងកញ្ញាកើតមានបញ្ហានៅលើភ្នែក សូមប្រញាប់ទៅជួបពិភាក្សាជាមួយគ្រូពេទ្យឱ្យបានទាន់ពេលវេលា។ ចៀសវាងកើតមានបញ្ហាធ្ងន់ធ្ងរដែលពិបាកក្នុងការព្យាបាល៕
ចែករំលែកព័តមាននេះ