ខេត្ដតាកែវ ៖ តាមរយៈសារព័ត៌មានកោះសន្ដិភាព លោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងអាជ្ញាធរខេត្ដបានជួយឧបត្ថម្ភដល់លោកយាយដែលចិញ្ចឹមចៅកំព្រា៣នាក់ជាបន្ដបន្ទាប់ ទាំងគ្រឿងឧបភោគបរិភោគ និងថវិកា ហើយចុងក្រោយនេះតាមរយៈកោះសន្ដិភាព ថវិកា៥៧៥.០០០រៀលក៏ត្រូវបាននាំទៅជូនដល់លោកយាយទៀត ។ តែគួរឱ្យអនិច្ចាកាលពីថ្ងៃទី១៤ កក្កដា វេលាម៉ោង ១២ថ្ងៃត្រង់ លោកយាយបានលាចាកលោកនេះទៅហើយ បន្សល់ទុកចៅកំព្រាទាំង៣នាក់ឱ្យរស់នៅគ្មានមេបាគ្រប់គ្រង ។
ទោះបីជាបែបណា ថវិកាដែលកោះសន្ដិភាពទទួលបានពីលោកឧកញ៉ា ស្រី ងួន និងលោកជំទាវ ឧកញ៉ា ស្រី វុទ្ធី ចំនួន៥០ម៉ឺនរៀល លោក សេង គី លក់ទាខ្វៃនៅផ្សារច្បារអំពៅ៣ម៉ឺនរៀល លោកអ៊ុក នាង មន្ដ្រីនគរបាលចូល និវត្ដន៍៤ម៉ឺនរៀល កញ្ញាស្រីពៅ ៥ពាន់រៀល ត្រូវបានតំណាងកោះសន្ដិភាពប្រចាំខេត្ដនាំយកទៅឱ្យចៅ និងចូលបុណ្យសពលោកយាយ កាលពីព្រឹកថ្ងៃទី១៥ កក្កដា ដែលជាថ្ងៃបូជាសពរបស់លោកយាយស្ថិតនៅភូមិ ជ្រោយប្រយ សង្កាត់បារាយណ៍ ក្រុងដូនកែវ ដោយមានការចូលរួមទទួលថវិកាពីលោកមេភូមិ លោកអនុប្រធានក្រុមប្រឹក្សាសង្កាត់ និងតាជីយាយជីយ៉ាងច្រើនកុះករ ។
អ្នកស្រីឆេង ណម អាយុ៥៣ឆ្នាំ ដែលជាអ្នករស់នៅក្នុងភូមិជាមួយគ្នាបានឱ្យដឹងថា ដោយមើលឃើញពីភាពក្រលំបាកវេទនា របស់លោកយាយនាង មុំ ហៅង៉ោ អាយុ៦២ ឆ្នាំរហូតមក អ្នកស្រីតែងតែជួយផ្គត់ផ្គង់ ដល់លោកយាយដែលមានជំងឺប្រចាំកាយ ហើយត្រូវទទួលចិញ្ចឹមបីបាច់ចៅកំព្រាទាំង៣នាក់រហូតធ្លាក់ខ្លួនឈឺ អ្នកស្រីក៏បាននាំយក លោកយាយទៅសំរាកព្យាបាលនៅមន្ទីរពេទ្យបង្អែកខេត្ដ អស់រយៈពេល១ខែ។ តែដោយសារស្ថានភាពជំងឺមិនអាចមើលជា អ្នកស្រីបានយកគាត់មកស្ដាប់ធម៌នៅសាលាបុណ្យភូមិជ្រោយប្រយ ដោយមានចាស់ទុំក្នុង ភូមិមកយ៉ាងច្រើន ហើយពេលដែលលោក យាយបានលាចាកលោកនេះទៅ អ្នកស្រីបានទទួលរ៉ាប់រងធ្វើបុណ្យទាំងអស់ ។
អ្នកស្រីឆេង ណម បានបន្ដទៀតថា ចំពោះចៅកំព្រាទាំង៣នាក់នេះក្រោយពេលធ្វើបុណ្យ៧ថ្ងៃរួច ខាងមន្ទីរសង្គមកិច្ចខេត្ដ នឹងទទួលយកទៅចិញ្ចឹមនៅមណ្ឌលកុមារកំព្រាខេត្ដ ។ ជំនួសមុខឱ្យក្មេងកំព្រាទាំង៣នាក់ អ្នកស្រីសូមថ្លែងអំណរគុណយ៉ាងជ្រាល ជ្រៅដល់លោកឧកញ៉ា ស្រី ងួន និងលោក ជំទាវឧកញ៉ា ស្រី វុទ្ធី ព្រមទាំងសប្បុរសជន ដែលបានចូលរួមឧបត្ថម្ភជាថវិកាទាំងអស់ សូមឱ្យមានអាយុយឺនយូរ និងជួបតែពុទ្ធពរ ទាំង៤ប្រការ គឺអាយុ វណ្ណៈ សុខៈ ពលៈ កុំបី ឃ្លៀងឃ្លាតឡើយ ៕
ចែករំលែកព័តមាននេះ