រាជធានីភ្នំពេញ ៖ ស្ត្រីឈ្មោះឡាង បុប្ផា ដែលត្រូវប្តីវាយធ្វើបាបបណ្តាលឱ្យរងរបួសធ្ងន់ធ្ងរក្រោកពីកន្ទេលមិនរួច គឺជាស្ត្រីអភ័ព្វដែលប្តីទី១ ទៅមានស្រីថ្មី និងប្តីក្រោយជាមនុស្សសាហាវ ។ បន្ទាប់ពីវាយធ្វើបាបហើយប្តីក្រោយនេះបានចុះចោលទៅបាត់ទៀតធ្វើឱ្យនាងក្លាយទៅជាស្ត្រីមេមា៉យលើកទី២ ទទួលរ៉ាប់រងចិញ្ចឹមកូន៥នាក់ ហើយពេលនេះនាងមានការខ្វះខាតថវិកាសម្រាប់ព្យាបាលរបួស និងទិញចំណីអាហារសម្រាប់ឱ្យកូនហូបទៀតផង ព្រោះបន្ទាប់ពីប្តីវាយឱ្យរបួសនាងមិនអាចទៅធ្វើការរួចឡើយ ។
ដោយសារតែបែបនេះ នាងគ្មានអ្វីក្រៅពីលើកដៃសំពះសុំជំនួយពីសប្បុរសជននានាឡើយ ហើយដោយសារមានការអាណិតអាសូរដល់ស្ត្រីរូបនេះ ជាពិសេសកូនៗរបស់នាងដែលកំពុងជួបនឹងការខ្វះខាតយា៉ងខ្លាំងនោះ កោះសន្តិភាពបានធ្វើជាស្ពានចម្លងផ្សព្វផ្សាយនូវដំណឹងជូនសប្បុរសជន និងមិត្តអ្នកអានទាំងអស់ឱ្យបានដឹង និងជួយដល់ក្រុមគ្រួសារស្ត្រីនោះ ។
ជាទឹកប្រាក់អាណិតអាសូរចំពោះស្ត្រីអភ័ព្វនេះលោកតែ សុខឡេង និងភរិយា ព្រមទាំងបុត្រ បានផ្ញើប្រាក់អំណោយតាមរយៈកោះសន្តិភាពចំនួន២០មឺុនរៀល ផ្តល់ដល់ស្ត្រីរូបនេះ ហើយត្រូវបានប្រគល់កាលពីថ្ងៃទី១៧ វិច្ឆិកា កន្លងមកនេះ ។
គួរបញ្ជាក់ផងដែរថា ស្ត្រីឈ្មោះឡាង បុប្ផា អាយុ៣៦ឆ្នាំ មានប្តីមុនឈ្មោះស៊ី លីហៀង អាយុ៤០ឆ្នាំ មានកូនស្រី៥នាក់ ក្រោយមកប្តីនោះក្បត់ចិត្តនាងចុះចោលទៅមានប្រពន្ធថ្មីទៀតកាលពីឆ្នាំ២០០៥ កន្លងទៅ។ បន្ទាប់មកនាងបានមកធ្វើការនៅភ្នំពេញ ហើយរយៈពេល៥ខែចុងក្រោយនេះនាងបានចាប់ដៃជាប្តីប្រពន្ធជាមួយបុរសពោះម៉ាយម្នាក់ទៀត តែមិនមានសុភមង្គលទេ ត្រូវប្តីក្រោយនេះវាយធ្វើបាបរាល់ថ្ងៃ និងស្រវឹងរាល់ថ្ងៃ ហើយនៅថ្ងៃទី៤ ខែវិច្ឆិកា ប្តីក្រោយបានវាយធ្វើបាបខ្លាំងជាងមុន បណ្តាលឱ្យនាងរងរបួសធ្ងន់ធ្ងរសន្លប់បាត់ស្មារតីហើយបុរសនោះក៏បានចាកចោលនាងបាត់ទៀត៕
ចែករំលែកព័តមាននេះ