ខេត្តកណ្តាល ៖ នៅព្រឹកថ្ងៃទី១៧ ខែតុលា ឆ្នាំ២០១១ វេលាម៉ោង៩ព្រឹក អនុសាខាកាកបាទក្រហមស្រុកកណ្តាលស្ទឹង បានរៀបចំពិធីចែកជំនួយសង្គ្រោះជូនដល់ប្រជាពលរដ្ឋរងគ្រោះដោយគ្រោះទឹកជំនន់ចំនួន៥៨គ្រួសារ នៅភូមិតាព្រហ្ម ឃុំបឹងខ្យាង ស្រុកកណ្តាលស្ទឹង ខេត្តកណ្តាល ។ ពិធីនេះប្រព្រឹត្តទៅក្រោមអធិបតីភាពលោកម៉ម ប៊ុននាង ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី លោកកឹម ជាតិ ទីប្រឹក្សាផ្ទាល់សម្តេចអគ្គមហាធម្មពោធិសាលជា ស៊ីម ប្រធានព្រឹទ្ធសភា ជាសមាជិកទ្រទ្រង់កាកបាទក្រហម និងលោកជំទាវភួង ម៉ាឡា កឹម ជាតិ អនុប្រធានកិត្តិយសអនុសាខាកាកបាទក្រហមកម្ពុជា ស្រុកកណ្តាលស្ទឹង ព្រមទាំងមានការអញ្ជើញចូលរួមពីគណៈអភិបាលស្រុក ក្រុមប្រឹក្សាឃុំ មេភូមិ និងមន្ត្រីអនុសាខាស្រុកមួយចំនួន ។
លោកម៉ម ប៊ុននាង និងលោកកឹម ជាតិ មានមតិសំណេះសំណាលដោយនាំមកនូវការផ្តាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនចំពោះគ្រួសារជនរងគ្រោះទាំងអស់ដោយក្តីនឹករឭក ។ ជាមួយគ្នានេះ គណៈអធិបតីក៏បានចូលរួមសម្តែងការសោកស្តាយដោយក្តីអាណិតអាសូរជាមួយប្រជាពលរដ្ឋរងគ្រោះទាំងអស់ និងថ្លែងអំណរគុណដល់អាជ្ញាធរដែនដី ដែលបានយកចិត្តទុកដាក់ រាយការណ៍បានទាន់ពេលវេលាដល់ថ្នាក់ស្រុក ហើយចូលរួមដោះស្រាយប្រកបដោយទឹកចិត្តមនុស្សធម៌ ។
បន្ទាប់មកនៅថ្ងៃដដែលវេលាម៉ោង១០និង៣០នាទី លោកកឹម ជាតិ និងលោកជំទាវ ព្រមទាំងប្រតិភូអនុសាខា ក៏បានទៅចែកជំនួយសង្គ្រោះបន្ទាន់ដល់ប្រជាពលរដ្ឋដែលរងផលប៉ះពាល់ដោយគ្រោះទឹកជំនន់២៦គ្រួសារ នៅបរិវេណវត្តប្រជុំអង្គ ស្ថិតក្នុងភូមិប្រជុំអង្គ ឃុំជើងកើប ស្រុកកណ្តាលស្ទឹងបន្តទៀត ។ អញ្ជើញចូលរួមនាឱកាសនោះរួមមាន ក្រុមប្រឹក្សាឃុំ មេភូមិ និងប្រជាពលរដ្ឋមួយចំនួន ផង ។ លោកកឹម ជាតិ មានប្រសាសន៍សំណេះសំណាល និងផ្តាំផ្ញើដល់ប្រជាពលរដ្ឋ អំពីអនាម័យសុខភាពដោយផ្តោតលើការហូបចុក ផឹកស្អាត រស់នៅស្អាត និងសំណូមពរដល់ប្រជាពលរដ្ឋរងគ្រោះទាំងអស់យកចិត្តទុកដាក់ថែរក្សាកូនចៅកុំឱ្យលេងទឹក ប្រយ័ត្នមានករណីគ្រោះថ្នាក់លង់ទឹកស្លាប់ដោយការធ្វេសប្រហែស ព្រោះថាទឹកជំនន់ឆ្នាំនេះ នៅទូទាំងប្រទេសកម្ពុជា អ្នកស្លាប់ដោយសារលង់ទឹកច្រើនករណី ក្នុងនោះភាគច្រើនជាកុមារ ។
ជំនួយដែលអនុសាខាស្រុកបានផ្តល់ជូនជនរងគ្រោះនាពេលនោះ ជាអំណោយរបស់លោកម៉ម ប៊ុននាង លោកកឹម ជាតិ និងលោកជំទាវ តាមរយៈអនុសាខាកាកបាទក្រហមកម្ពុជាស្រុក កណ្តាលស្ទឹង ។ ជំនួយនេះថ្វីដ្បិតមានចំនួនតិចតួចមិនសមទៅនឹងទំហំនៃការរងគ្រោះពិតមែន តែវាក៏ជាការជួយសម្រាលនូវការលំបាករបស់បងប្អូនប្រជាពលរដ្ឋបានមួយកម្រិតផងដែរ។ ជំនួយសង្គ្រោះដែលគ្រួសារនីមួយៗនៅចំណុចទាំងពីរនោះបានទទួលមាន អង្ករ២៥គីឡូក្រាម មី១កេស ត្រីខ១០កំប៉ុង ទឹកត្រី៦ដប និងថវិកា៣ម៉ឺនរៀល ។
សូមបញ្ជាក់ថា មុនពិធីចែកជំនួយសង្គ្រោះបន្ទាន់ដល់គ្រួសាររងគ្រោះ ប្រតិភូអនុសាខាបានជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សនៃសាលាបឋមសិក្សាកំពង់តាឡុង និងប្រជាពលរដ្ឋជាច្រើននាក់ក្នុងភូមិកំពង់តាឡុង ឃុំបឹងខ្យាង ស្រុកកណ្តាលស្ទឹង ។ អំណោយអនុស្សាវរីយ៍ដែលបានចែកជូនអ្នកចូលរួមទាំងអស់ក្នុងម្នាក់ៗរួមមាន នាយកសាលា លោកគ្រូ អ្នកគ្រូ ថវិកា៣០.០០០រៀល សិស្សានុសិស្ស ថវិកា២.០០០រៀល សៀវភៅ១ក្បាល ប៊ិច១ដើម និងប្រជាពលរដ្ឋថវិកាក្នុងម្នាក់ៗចំនួន១០.០០០រៀល ៕
ចែករំលែកព័តមាននេះ