កីឡាការិនីលំដាប់ទី១ពិភពលោកយ៉ានី សេងបានសម្តែងក្តីរីករាយជាខ្លាំងបន្ទាប់ពីបានយកឈ្នះជុំទី៣នៃការប្រកួតវាយកូនហ្គោលកម្មវិធីSunrise LPGA Taiwan Championship ជាមួយនឹងគម្លាតពិន្ទុ៣ស្ត្រូកកាលពីថ្ងៃសៅរ៍ទី២២តុលា។
កីឡាការិនីលំដាប់ទី១ពិភពលោកយ៉ានី សេងបានសម្តែងក្តីរីករាយជាខ្លាំងបន្ទាប់ពីបានយកឈ្នះជុំទី៣នៃការប្រកួតវាយកូនហ្គោលកម្មវិធីSunrise LPGA Taiwan Championship ជាមួយនឹងគម្លាតពិន្ទុ៣ស្ត្រូកកាលពីថ្ងៃសៅរ៍ទី២២តុលា។ កម្មវិធីប្រកួតដែលមានទឹកប្រាក់រង្វាន់សរុប២លានដុល្លារអាមេរិកនេះ ត្រូវបានរៀបចំធ្វើនៅទីលានវាយកូនហ្គោលឈ្មោះ Sunrise Golf Course ស្ថិតក្នុងទីក្រុងTaoyuan កោះតៃវ៉ាន់។
នាងសេងធ្វើបាន៤អាន់ឌ័រ ៦៧នៅជុំទី៣សរុបលទ្ធផលគឺ១៤អាន់ឌ័រ ២០៦នាំមុខ៣ស្ត្រូកលើកីឡាការិនីស៊ុយអែត Anna Nordqvistពោលគឺបន្ទាប់ពីកីឡាការិនីតៃវ៉ាន់រូបនេះធ្វើបាន៧បឺឌីនិង២បូជីបញ្ចប់ការប្រកួតនៅឡូចុងក្រោយ។ នេះគឺជាជោគជ័យលើកទី៧ហើយសម្រាប់នាងសេងនៅក្នុងប្រទេសរបស់ខ្លួននិងនិយាយដោយឡែកជាជោគជ័យកម្រិតអន្តរជាតិលើកទី១១ក្នុងរដូវកាលប្រកួតឆ្នាំនេះ។ នាងនិយាយថា៖«វាពិតជាពិសេសខ្លាំងណាស់ប្រសិនជាអាចយកឈ្នះជើងឯកនៅជុំផ្តាច់ព្រ័ត្រ។ វាពិសេសក៏ព្រោះតែជាលើកទី១ដែលមានមនុស្សមកមើលការប្រកួតយ៉ាងច្រើន។ ខ្ញុំគិតថានេះពិតជាកិត្តិយសសម្រាប់ខ្ញុំ»។
នាងNordqvistដែលបានយកឈ្នះពានជើងឯករបស់ LPGA Tourចំនួន២លើកក្នុងជុំទី៣ធ្វើបាន៣អាន់ឌ័រប៉ា ៧១នាំមុខកីឡាការិនីអេស្ប៉ាញ Azahara Munozដែលធ្វើបាន៣អាន់ឌ័រ ប៉ា ៧២។ នាងនិយាយថា៖«ខ្ញុំពិតជាមានក្តីរំភើបខ្លាំងចំពោះការប្រកួតក្នុងជុំផ្តាច់ព្រ័ត្រជាពិសេសការប្រជែងជាមួយនាងយ៉ានី សេងនិងនាងMunoz។ នេះពិតជារឿងដែលរំភើបបំផុតមែន។ គ្រប់ពេលដែលអ្នកណាម្នាក់ស្ថិតនៅក្នុងចំណាត់ថ្នាក់ប្រជែងយកឈ្នះបាន វាគឺជាអ្វីដែលមនុស្សទូទៅក៏ដូចជារូបខ្ញុំតែងតែស្រមៃចង់បាន»។
កីឡាការិនីកូរ៉េខាងត្បូងអាមី យ៉ាងដែលកំពុងតែស្វះស្វែងដណ្តើមយកពានជើងឯក LPGA Tourជាលើកទី១នៅក្នុងអាជីពបញ្ចប់ការប្រកួត៣ជុំធ្វើបានលទ្ធផលសរុប៩អាន់ឌ័រ ២១០ស្ថិតនៅលំដាប់ទី៤ ។
កីឡាការិនីជប៉ុនអៃ មីយ៉ាហ្សាតុបញ្ចប់ការប្រកួតក្នុងលំដាប់ទី១៤។ នាងធ្វើបានលទ្ធផលពិន្ទុ២អាន់ឌ័រ ២១៥នាំមុខ១ស្ត្រូកលើកីឡាការិនីមិត្តរួមជាតិខ្លួនមីកា មីយ៉ាហ្សាតុនិងកីឡាការិនីស៊ុយអែតកាទ្រីយ៉ូណា ម៉ាតទូ៕
ចែករំលែកព័តមាននេះ