Alves ជប់លៀងដាច់យប់អបអរ ក្រោយការផ្ដន្ទាទោសនៅអេស្ប៉ាញត្រូវបានលុបចោល
ប្រទេសប្រេស៊ីល ៖ កីឡាករ Dani Alves អតីតខ្សែការពារឆ្នើមក្រុម Barcelona និងក្រុមជម្រើសជាតិប្រេស៊ីលបានប្រារព្ធពិធីជប់លៀងដាច់យប់ជាមួយប្រពន្ធ Joana Sanz…
ប្រទេសប្រេស៊ីល ៖ កីឡាករ Dani Alves អតីតខ្សែការពារឆ្នើមក្រុម Barcelona និងក្រុមជម្រើសជាតិប្រេស៊ីលបានប្រារព្ធពិធីជប់លៀងដាច់យប់ជាមួយប្រពន្ធ Joana Sanz ដែលជាតារាបង្ហាញម៉ូត បន្ទាប់ពីតុលាការកំពូលនៃតំបន់កាតាឡាន់ ប្រទេសអេស្ប៉ាញ បានលុបចោលការផ្តន្ទាទោសពីបទរំលោ.ភផ្លូវភេ.ទលើនារីអាយុ២៣ឆ្នាំម្នាក់។
តុលាការបានសម្រេចថា សាលក្រមដើមមានភាពមិនស៊ីសង្វាក់ និងផ្ទុយគ្នា ដែលនាំទៅដល់ការលុបចោលការផ្តន្ទាទោសលើ Dani Alves កាលពីថ្ងៃទី២៨ ខែមីនា។ តុលាការ បានកាត់ទោស Dani Alves ដាក់ពន្ធនាគាររយៈពេល៤ឆ្នាំកន្លះពីបទរំលោ.ភផ្លូវភេ.ទលើនារីអាយុ២៣ឆ្នាំម្នាក់ក្នុងក្លិបកម្សាន្តរាត្រីមួយកន្លែង នៅទីក្រុងបាសេឡូណា ដែលបានកើតឡើងកាលពីថ្ងៃទី៣១ ខែធ្នូ ឆ្នាំ ២០២២ ខណៈដែលខ្សែការពារស្លាបស្តាំវ័យ៤១ឆ្នាំរូបនេះ បានបដិសេធទាំងស្រុងពីការចោទប្រកាន់នេះ។
យោងតាមកាសែតអេស្ប៉ាញ Marca បន្ទាប់ពីសាលក្រមត្រូវបានប្រកាស Alves បានត្រឡប់ទៅផ្ទះខ្លួននៅឯទីក្រុងបាសេឡូណាវិញនៅវេលារសៀល ប៉ុន្តែបានបដិសេធការធ្វើអត្ថាធិប្បាយលើសេចក្តីសម្រេចនេះ។ មិត្តជិតស្និទ្ធបំផុតកីឡាកររូបនេះ ដែលបាននៅជាមួយគ្នានៅយប់កើតហេតុនោះ ក៏បានទៅកាន់ផ្ទះ Alves ភា្លមៗផងដែរ ហើយមួយម៉ោងក្រោយមកទៀត ប្រពន្ធ Alves អ្នកនាង Joana Sanz ក៏បានត្រឡប់ទៅផ្ទះវិញដូចគ្នា។ បើតាមប្រភពពី Marca បានរាយការណ៍ថា សំឡេងភ្លេងរាំរែកដើម្បីអបអរក៏បានចាប់ផ្តើមឡើង ហើយពិធីជប់លៀងបានបន្តឆ្លងថ្ងៃតែម្តង។
អ្នកនាង Joana Sanz ក៏បានបង្ហាញអារម្មណ៍ពិតលើការបង្ហោះសារលើបណ្ដាញសង្គមដោយបានសរសេរថា «ខ្ញុំត្រូវបានគេរិះគន់ ប្រមាថ គំរាមកំហែង និងធ្វើបាបផ្លូវចិត្តអស់ពេល២ឆ្នាំមកហើយ។ ថ្វីបើមានការរិះគន់ ប្រមាថកាតទានលើប្រព័ន្ធផ្សព្វផ្សាយ និងសាធារណជនក៏ដោយ ក៏ខ្ញុំបានប្រកាន់ជំហររឹងមាំមិនបោះបង់តាមការវាយប្រហារនោះទេ ហើយរក្សាការជឿជាក់របស់ខ្ញុំ និងការពារគំនិតរបស់ខ្ញុំដោយមិនធ្វើតាមអ្នកដទៃដោយភាពងងឹតងងុលឡើយ។ ដូច្នេះសូមឈប់បង្ហាញការស្អប់ខ្ពើមចំពោះមនុស្សដែលអ្នកស្ទើរតែមិនស្គាល់ និងមិនដឹងអំពីគេអី»។
សូមជម្រាបជូនថា Alves និង Sanz បានចាប់ផ្តើមទំនាក់ទំនងស្នេហាក្នុងឆ្នាំ ២០១៥ ហើយបានរៀបការនៅកោះ Ibiza ប្រទេសអេស្ប៉ាញក្នុងឆ្នាំ ២០១៧។ បន្ទាប់ពីការចាប់ខ្លួន Alves អ្នកនាង Sanz បានដាក់ពាក្យសុំលែងលះដោយបានគូសបញ្ជាក់ថាមិនមែនដោយសារការចោទប្រកាន់ពីបទរំលោភផ្លូវភេទទេ ប៉ុន្តែដោយសារតែភាពមិនស្មោះត្រង់របស់ Alves។ ទោះជាយ៉ាងណាក៏ដោយ នៅពេលដែលនាងបង្ហាញខ្លួនជាសាក្សីនៅក្នុងតុលាការ នាងបានបំភ្លឺថា ពួកគេមិនបានលែងលះគ្នាជាផ្លូវការនោះទេ ហើយបើទោះជាមានបញ្ហាប្រឈមក៏ដោយ ក៏ Alves និង Sanz នៅតែរស់នៅជាមួយគ្នា។ បន្ទាប់ពី Alves ចេញពីពន្ធនាគារ ប្តីប្រពន្ធមួយគូនេះ បានចែករំលែករូបថតដ៏ស្និទ្ធស្នាលនៅលើបណ្តាញសង្គមថែមទៀតផង។
អាជីពបាល់ទាត់របស់ Dani Alves រកបានជិត៦០លានដុល្លារក្នុងរយៈពេលប៉ុន្មានឆ្នាំមកនេះ រួមទាំងប្រាក់បៀវត្សរ៍១១លានដុល្លារក្នុងមួយឆ្នាំៗ អំឡុងពេលប្រកបអាជីពជាមួយក្លិប Barcelona ។ បន្ទាប់ពីផ្លាស់ទៅចូលរួមក្លិប UNAM នៅប្រទេសម៉ិកស៊ិកក្នុងឆ្នាំ ២០២២ Alves ទទួលបានថ្លៃពលកម្ម ៣២៥,០០០ដុល្លារក្នុងមួយសប្តាហ៍។ ទោះជាយ៉ាងណាបន្ទាប់ពីការចាប់ខ្លួន ក្លិប UNAM បានសម្រេចបញ្ចប់កុងត្រារបស់ Alves និងទាមទារសំណងទឺកប្រាក់ ៥លានដុល្លារផងដែរ។
ឥឡូវនេះការផ្តន្ទាទោសត្រូវបានលុបចោល Alves កំពុងពិចារណាលើបណ្តឹងប្រឆាំងនឹងក្លិប UNAM សម្រាប់ការបញ្ចប់កុងត្រារបស់ខ្លួនដោយគ្មានមូលហេតុ ដោយគ្រោងនឹងប្តឹងទាមទារសំណងចំនួន២លានដុល្លារវិញ និងបន្តចាត់វិធានការផ្លូវច្បាប់ចំពោះការខូចខាតខាងសីលធម៌ ការបរិហារកេរ្តិ៍ និងការបណ្តេញចេញពីការងារដោយអយុត្តិធម៌។
កីឡាករ Dani Alves ត្រូវបានចាត់ទុកថាជាខ្សែការពារដ៏ល្អបំផុតម្នាក់គ្រប់ពេល ហើយក៏ជាកីឡាករដ៏ជោគជ័យបំផុតជាមួយការឈ្នះពានរង្វាន់ចំនួន ៤២ ដោយធ្លាប់លេងឱ្យក្លឹបធំៗនៅអឺរ៉ុបដូចជា Barcelona, Juventus និង PSG ៕ ប្រភព ៖ VnExpress
ចែករំលែកព័តមាននេះ