ប្រទេសព័រទុយហ្គាល់ ៖ កីឡាករ Cristiano Ronaldo សម្រេចបានកំណត់ត្រាពិភពលោក ក្លាយជាកីឡាករបាល់ទាត់ឈ្នះការប្រកួតជាមួយក្រុមជម្រើសជាតិច្រើនជាងគេក្នុងប្រវត្តិសាស្ត្រ ពោល១៣២ប្រកួតក្នុងចំណោមការបង្ហាញខ្លួនសរុប ២១៩ប្រកួតជាមួយព័រទុយហ្គាល់។ កំណត់ត្រាចារក្នុងសៀវភៅ…
ប្រទេសព័រទុយហ្គាល់ ៖ កីឡាករ Cristiano Ronaldo សម្រេចបានកំណត់ត្រាពិភពលោក ក្លាយជាកីឡាករបាល់ទាត់ឈ្នះការប្រកួតជាមួយក្រុមជម្រើសជាតិច្រើនជាងគេក្នុងប្រវត្តិសាស្ត្រ ពោល១៣២ប្រកួតក្នុងចំណោមការបង្ហាញខ្លួនសរុប ២១៩ប្រកួតជាមួយព័រទុយហ្គាល់។
កំណត់ត្រាចារក្នុងសៀវភៅ Guinness World Records របស់ Ronaldo មួយនេះ កើតឡើងក្នុងជ័យជម្នះរបស់ម្ចាស់ផ្ទះព័រទុយហ្គាល់លើដាណឺម៉ាកលទ្ធផល ៥ទល់នឹង២ នៅឯកីឡដ្ឋាន José Alvalade នាទីក្រុងលីសបោន សម្រាប់ការប្រកួតជើងទីពីរ វគ្គ៨ក្រុមចុងក្រោយ ពានរង្វាន់ UEFA Nations League រដូវកាល ២០២៤-២៥ ដើម្បីបន្តឡើងទៅវគ្គពាក់កណ្តាលផ្តាច់ព្រ័ត្រ កាលពីថ្ងៃទី២៣ ខែមីនា ឆ្នាំ២០២៥។ ដ្បិតក្នុងការប្រកួតនោះ ប្រធានក្រុមព័រទុយហ្គាល់វ័យ៤០ឆ្នាំរូបនេះ ក៏រកបាន១គ្រាប់ផងដែរ។
ម្ចាស់ពានរង្វាន់ Ballon d’Or ៥សម័យកាលរូបនេះ បានក្លាយជាកីឡាករឈ្នះការប្រកួតជាមួយក្រុមជម្រើសជាតិច្រើនជាងគេក្នុងប្រវត្តិសាស្ត្រ ដោយបានវ៉ាដាច់កំណត់ត្រាឈ្នះ ១៣១ប្រកួតរបស់អតីតមិត្តរួមក្រុម Real Madrid របស់គេ គឺខ្សែការពារ Sergio Ramos ដែលបានបង្ហាញខ្លួនសរុប ១៨០ប្រកួតជាមួយអេស្ប៉ាញ។
ក្រោយបញ្ចប់ការប្រកួតកាលពីថ្ងៃទី២៣ ខែមីនា ឆ្នាំ២០២៥ ពានរង្វាន់ UEFA Nations League រដូវកាល ២០២៤-២៥ បានរកឃើញ៤ក្រុមឡើងទៅកាន់វគ្គពាក់កណ្តាលផ្តាច់ព្រ័ត្រ ដោយឥន្ទ្រីដែកអាល្លឺម៉ង់ត្រូវប៉ះបញ្ចខែលព័រទុយហ្គាល់ ស្របពេលដែលគោជល់អេស្ប៉ាញត្រូវតទល់នឹងមាន់គកបារាំង។
ការប្រកួតវគ្គ៨ក្រុមចុងក្រោយ អាល្លឺម៉ង់យកឈ្នះអ៊ីតាលីសរុបទាំងពីរជើង លទ្ធផល ៥ទល់នឹង៤ ខណៈព័រទុយហ្គាល់យកឈ្នះដាណឺម៉ាកលទ្ធផល ៥ទល់នឹង៣។ ចំណែកឯអេស្ប៉ាញយកឈ្នះហូឡង់ដោយការទាត់បាល់១១ម៉ែត្រកាត់សេចក្តី នៅក្នុងលទ្ធផល ៥ទល់នឹង៤ ក្រោយលទ្ធផលសរុបទាំងពីរជើងស្មើគ្នា ៥ទល់នឹង៥ ស្របពេលដែលបារាំងក៏បានយកឈ្នះក្រូអាតតាមរយៈការទាត់បាល់១១ម៉ែត្រកាត់សេចក្តីផងដែរ ដោយលទ្ធផល ៥ទល់នឹង៤ ក្រោយលទ្ធផលទាំងពីរជើងស្មើគ្នា ២ទល់នឹង២។
ហើយបើតាមការសម្រេចពីសហព័ន្ធបាល់ទាត់ទ្វីបអឺរ៉ុប UEFA បានបញ្ជាក់ថា ចាប់ពីការប្រកួតវគ្គពាក់កណ្តាលផ្តាច់ព្រ័ត្រ ការប្រកួតដណ្តើមចំណាត់ថ្នាក់លេខ៣ និងវគ្គផ្តាច់ព្រ័ត្រ ត្រូវធ្វើឡើងនៅក្នុងប្រទេសអាល្លឺម៉ង់។
ការប្រកួតវគ្គពាក់កណ្តាលផ្តាច់ព្រ័ត្រ ៖
-ថ្ងៃទី៤ ខែមិថុនា អាល្លឺម៉ង់ ប៉ះ ព័រទុយហ្គាល់ នៅកីឡដ្ឋាន Allianz Arena
-ថ្ងៃទី៥ ខែមិថុនា អេស្ប៉ាញ ប៉ះ បារាំង នៅកីឡដ្ឋាន MHPArena
គួរបញ្ជាក់ថា ពានរង្វាន់ UEFA Nations League ត្រូវបានបង្កើតឡើងជាលើកដំបូងនៅឆ្នាំ ២០១៨ ដោយម្ចាស់ជើងឯកបានលើព័រទុយហ្គាល់នៅរដូវកាល ២០១៨-១៩ រីឯនៅរដូវកាលឆ្នាំ ២០២០-២១ បារាំងគឺជាម្ចាស់ជើងឯក ចំណែកនៅរដូវកាល ២០២២-២៣ អេស្ប៉ាញគឺជាម្ចាស់ជើងឯក។ ដូច្នេះបានន័យថា ព័រទុយហ្គាល់ បារាំង និងអេស្ប៉ាញ កំពុងបន្តដំណើរប្រជែងតំណែងជើងឯកជាលើកទី២ ខណៈដែលអាល្លឺម៉ង់កំពុងស្វែងរកការឈ្នះជើងឯកជាលើកដំបូងរបស់ខ្លួន៕
ចែករំលែកព័តមាននេះ