ប្រទេស​អា​រ៉ា​ប៊ី​សា​អូឌីត ៖ កំពូល​កីឡាករ​បាល់ទាត់​ជនជាតិ​ព័រ​ទុ​យ​ហ្គា​ល់ Cristiano Ronaldo បាន​បញ្ជាក់​យ៉ាង​ច្បាស់​ហើយ​ថា រូបគេ​ប្រាកដ​ណាស់​គឺ ១,០០០% តែ​ម្តង​នឹង​រៀប​ការ​ជាមួយ​មិត្ត​ស្រី Georgina Rodriguez ដែល​រួមរស់​ដូច​ប្តី​ប្រពន្ធ​អស់​រយៈ​ជិត​១០​ឆ្នាំ​របស់​ខ្លួន ប៉ុន្តែ​កំពុង​រង់ចាំ​ពេលវេលា​ដ៏​ត្រឹមត្រូវ​សិន​។

ក្នុង​បទ​សម្ភាសន៍​កាលពី​ពេល​ថ្មី​ៗ​នេះ​ជាមួយ​កាសែត​អេ​ស្ប៉ា​ញ Marca ខ្សែប្រយុទ្ធ​ឆ្នើម Cristiano Ronaldo បាន​និយាយ​អំពី​ការ​រំពឹង​ទុកជា​ច្រើន​ឆ្នាំ​អំពី​ទំនាក់ទំនង​ស្នេហា​រវាង​ខ្លួន​ជាមួយ​មិត្ត​ស្រី Georgina Rodriguez ដោយ​អះអាង​ថា ពិធី​មង្គល​រវាង​អ្នក​ទាំង​ពីរ​ច្បាស់​ណាស់​នៅ​កើតឡើង​នៅ​ពេលវេលា​ដ៏​ត្រឹមត្រូវ​។ ប្រធាន​ក្រុម​ជម្រើសជាតិ​ព័រ​ទុ​យ​ហ្គា​ល់​រូប​នេះ បាន​និយាយ​ថា «​វា​នឹង​កើតឡើង គឺ ១,០០០%​។ ប៉ុន្តែ​ខ្ញុំ​កំពុង​រង់ចាំ​ពេលវេលា​ដ៏​ល្អ​ឥត​ខ្ចោះ​បំផុត​។

Ronaldo បច្ចុប្បន្ន​ឈាន​ដល់​វ័យ​៤០​ឆ្នាំ​ហើយ ខណៈ​ដែល​មិត្ត​ស្រី Georgina មាន​វ័យ​ត្រឹម​២៩​ឆ្នាំ​។ អ្នក​ទាំង​ពីរ​បាន​រួមរស់​ជាមួយ​គ្នា​ដូច​ប្តី​ប្រពន្ធ​រួច​ទៅ​ហើយ ពោល​តាំងពី​ឆ្នាំ ២០១៦ មក​ម្ល៉េះ​។ ប៉ុន្មាន​ឆ្នាំ​មកនេះ ពួក​គេ​បាន​សាង​ជីវិត​ដៃគូ​ដ៏​រីករាយ​ជាមួយ​គ្រួសារ បូក​រួម​នឹង​កេរ្តិ៍ឈ្មោះ​ល្បី​ជា​អន្តរជាតិ និង​ភាព​ជោគជ័យ​នៃ​អាជីព​រៀងខ្លួន​។ Ronaldo ត្រូវ​បាន​ចាត់ជា​កីឡាករ​បាល់ទាត់​អស្ចារ្យ​បំផុត​មួយ​រូប​នៅ​ក្នុង​ប្រវត្តិសាស្ត្រ ស្រប​ពេល​ដែល Georgina កំពុង​បោះ​ជំហាន​ទៅ​មុខ​ជាមួយនឹង​អាជីព​ជាតា​រា​ម៉ូ​ដែល ខណៈ​ដែល​អ្នក​ទាំង​ពីរ​ក៏​ជា​បុគ្គល​ដ៏​មាន​មាន​ឥទ្ធិពល​នៅ​លើ​បណ្តាញ​ទំនាក់ទំនង​សង្គម​ពិភពលោក​ផង​ដែរ​។

ជា​រឿយ​ៗ គូស្នេហ៍​មួយគូ​នេះ បាន​ក្លាយជា​ប្រធានបទ​ដ៏​ក្តៅ​គគុក​នៃ​ពាក្យ​ចចាមអារ៉ាម​រាប់​មិន​អស់​ទាក់​ទង់​នឹង​ការ​ភ្ជាប់ពាក្យ​ស្ងាត់​ៗ និង​គម្រោង​រៀប​ការ​។ Ronaldo ថែម​ទាំង​បាន​ហៅ Georgina ថា ប្រពន្ធ​ពេញ​ៗ​មាត់​នៅ​ក្នុង​បទ​សម្ភាសន៍​កន្លង​មក ប៉ុន្តែ​អ្នក​ទាំង​ពីរ​នៅ​តែ​មិន​ទាន់​សម្រេចចិត្ត​ចូល​រោងការ​ជា​ផ្លូវការ​នៅឡើយ​។ នៅ​ក្នុង​បទ​សម្ភាសន៍​មួយ Ronaldo បាន​បញ្ជាក់​ថា អាពាហ៍ពិពាហ៍​សម្រាប់​ខ្លួន គឺ​លើស​ពី​ការ​ប្រកាន់ខ្ជាប់​នូវ​ច្បាប់សង្គម​ជាក់លាក់​ទៅ​ទៀត ដោយ​វា​ត្រូវ​តែ​កើតឡើង​ដោយ​គ្មាន​សម្ពាធ ការ​រំពឹង​ទុក ឬ​កាលកំណត់​។ ហើយ​សម្រាប់​ពេល​នេះ អ្នក​ទាំង​ពីរ​កំពុង​ផ្តោត​លើ​អាជីព​ផ្ទាល់ខ្លួន និង​ទំនួល​ខុស​ត្រូវ​រួម​របស់​ពួក​គេ​លើ​កូន​ទាំង​៥​នាក់ ដោយ​ក្នុង​ចំណោម​២​នាក់​ជា​កូន​ជាមួយ Georgina ។

Ronaldo បច្ចុប្បន្ន​កំពុង​ប្រកប​អាជីព​ជាមួយ​ក្រុម Al Nassr នៅ​លី​គ​កំពូល​ប្រទេស​អា​រ៉ា​ប៊ី​សា​អូឌីត​។ បើជា​ទោះ​ស្ថិត​ក្នុង​វ័យ​ជ្រេ​សម្រាប់​អាជីព​បាល់ទាត់​ក៏​ពិតមែន ប៉ុន្តែ​អតីត​ខ្សែប្រយុទ្ធ​ក្រុម Sporting Lisbon, Manchester United, Real Madrid និង Juventus រូប​នេះ នៅ​តែ​ជា​អត្ត​ព​លិ​ក​ម្នាក់​ក្នុង​ចំណោម​អត្ត​ព​លិ​ក​ដ៏​ល្បីល្បាញ​បំផុត​លើ​ពិភពលោក ដោយ​ត្រូវ​បាន​ទទួលស្គាល់​តាម​រយៈ​ការ​ប្រកាន់​ខ្ចា​ប់​វិន័យ​ដ៏​តឹង​រឹង​របស់​ខ្លួន និង​ការ​ខិតខំ​ប្រឹងប្រែង​ឥត​ឈប់​ឈរ​រហូត​ឈ្នះ​ពានរង្វាន់​ជា​ច្រើន​ជាមួយ​ក្លិប​អាជីព និង​ឈ្នះ​ពានរង្វាន់ Euro ឆ្នាំ ២០១៦ និង UEFA Nations League រដូវ​កាល ២០១៨២-១៩ ជាមួយ​ព័រ​ទុ​យ​ហ្គា​ល់ ពិសេស​ការ​ឈ្នះ​ពាន​ឯកត្តជន Ballon d’Ors ៥​សម័យកាល​ផង​ដែរ​។

Ronaldo ទើបតែ​សម្រេច​បាន​កំណត់​ត្រា​ពិភពលោក​ថ្មី​មួយទៀត​ក្នុង​ចំណោម​កំណត់​ត្រា​ជា​ច្រើន​ផ្សេង​ទៀត​របស់​ខ្លួន នៅ​ក្នុង​សៀវភៅ Guinness World Records ដោយ​ក្លាយជា​កីឡាករ​បាល់ទាត់​ដំបូង​គេ​ឈ្នះ​ការ​ប្រកួត​ជាមួយ​ក្រុម​ជម្រើសជាតិ​ច្រើន​ជាងគេ​នៅ​ក្នុង​ប្រវត្តិសាស្ត្រ ពោល​១៣២​ប្រកួត​ក្នុង​ចំណោម​ការ​បង្ហាញខ្លួន​សរុប ២១៩​ប្រកួត​ជាមួយ​ព័រ​ទុ​យ​ហ្គា​ល់​។ កំណត់​ត្រា​ថ្មី​នេះ សម្រេច​បាន​នៅ​ក្នុង​ការ​ប្រកួត​ដែល​រូបគេ​រួមចំណែក​យ៉ាង​សំខាន់​ជួយ​ព័រ​ទុ​យ​ហ្គា​ល់​យកឈ្នះ​ដា​ណឺ​ម៉ាក បន្ត​ឡើង​ទៅ​វគ្គ​ពាក់កណ្តាល​ផ្តាច់ព្រ័ត្រ​ពានរង្វាន់ UEFA Nations League រដូវ​កាល ២០២៤-២៥ ដោយ​ត្រូវ​ជួប​ក្រុម​ឥន្ទ្រី​ដែក​អា​ល្លឺ​ម៉​ង់​៕ ប្រភព ៖ VnExpress