ប្រទេសកូរ៉េខាងជើង ៖ យោងតាមរបាយការណ៍ពីទីភ្នាក់ងារទេសចរណ៍មួយបានឱ្យដឹងថា បណ្តាអ្នករត់ស្ម័គ្រចិត្តបរទេសមួយចំនួន កាលពីថ្ងៃព្រហស្បតិ៍បានហោះហើរចេញពីទីក្រុងប៉េកាំងប្រទេសចិនទៅកាន់ប្រទេសកូរ៉េខាងជើង ដើម្បីចូលរួមព្រឹត្តិការណ៍រត់ម៉ារ៉ាតុងអន្តរជាតិទីក្រុងព្យុងយ៉ាង (Pyongyang Marathon) ជាលើកដំបូងក្នុងរយៈពេល៦ឆ្នាំ។ នេះបើយោងតាមប្រភពពីទីភ្នាក់ងារសារព័ត៌មាន AFP បានចេញផ្សាយ។
ព្រឹត្តិការណ៍រត់ម៉ារ៉ាតុង គឺជាផ្នែកមួយនៃការប្រារព្ធពិធីរំលឹកដល់ថ្ងៃខួបកំណើតអតីតមេដឹកនាំកំពូល និងជាស្ថាបនិករបស់ប្រទេសកូរ៉េខាងជើង លោក គីម អ៊ីលស៊ុង (Kim Il-Sung) ក្នុងឆ្នាំ ១៩១២ និងជាព្រឹត្តិការណ៍កីឡាអន្តរជាតិដ៏ធំបំផុតក្នុងប្រទេសកុម្មុយនីសដ៏តឹងរ៉ឹងបំផុតមួយនេះ។
ព្រឹត្តិការណ៍នៅឆ្នាំនេះ ប្រព្រឹត្តទៅនៅថ្ងៃទី៦ ខែមេសា ដោយបានផ្តល់ឱកាសដ៏កម្រមួយ ដើម្បីអ្នកចូលរួមរត់កាត់ផ្លូវនានានៃរដ្ឋធានី ក្រោមការគ្រប់គ្រងយ៉ាងតឹងរ៉ឹង។ ព្រឹត្តិការណ៍ចុងក្រោយនៃការរត់ម៉ារ៉ាតុងទីក្រុងព្យុងយ៉ាង ត្រូវបានធ្វើឡើងកាលពីឆ្នាំ ២០១៩ បន្ទាប់មកក៏ត្រូវបានផ្អាកដោយសារតែជំងឺរាតត្បាតកូវីដ-១៩ ដែលបានជំរុញឱ្យរដ្ឋកុម្មុយនីស ស្ថិតក្រោមការដឹកនាំរបស់មេដឹកនាំបច្ចុប្បន្ន លោក គីម ជុងអ៊ុន (Kim Jong Un) ដែលជាចៅលោក គីម អ៊ីលស៊ុង រូបនេះ សម្រេចបិទព្រំដែនរបស់ខ្លួនក្នុងកិច្ចខិតខំប្រឹងប្រែងដើម្បីទប់ស្កាត់ការឆ្លងរីករាលដាល។
ជាមួយនឹងការបើកព្រំដែនឡើងវិញដោយកូរ៉េខាងជើង អ្នកចូលរួមរត់បរទេសបានចាកចេញពីប្រទេសចិនទៅកាន់កូរ៉េខាងជើងរយៈពេល៦ថ្ងៃ ដែលរៀបចំឡើងដោយក្រុមហ៊ុនទេសចរណ៍ Koryo Tours ។ ទីភ្នាក់ងារទេសចរណ៍នេះមានឯកទេសក្នុងការធ្វើដំណើរទៅកាន់ប្រទេសកូរ៉េខាងជើង ហើយពិពណ៌នាខ្លួនថាជាដៃគូទេសចរណ៍ផ្តាច់មុខនៃការរត់ម៉ារ៉ាតុងទីក្រុងព្យុងយ៉ាង។
ជនបរទេសមួយក្រុមត្រូវបានគេឃើញឡើងជើងហោះ Air Koryo ចេញពីទីក្រុងប៉េកាំងទៅកាន់ទីក្រុងព្យុងយ៉ាងក្នុងវីដេអូដែលបានបង្ហោះនៅលើគណនី Instagram ក្រុមហ៊ុនផ្ទាល់។ ក្រុមហ៊ុនដែលមានមូលដ្ឋាននៅទីក្រុងប៉េកាំងមួយនេះ បានបញ្ជាក់លើគេហទំព័ររបស់ខ្លួនថា «ការរត់ម៉ារ៉ាតុងទីក្រុងព្យុងយ៉ាងជាបទពិសោធន៍ដ៏ពិសេសបំផុតព្រោះវាផ្តល់ឱកាសក្នុងការប្រាស្រ័យទាក់ទងជាមួយប្រជាជនកូរ៉េខាងជើង»។
ការរត់ម៉ារ៉ាតុងទីក្រុងព្យុងយ៉ាង ត្រូវបានចុះបញ្ជីក្នុងគេហទំព័ររបស់ស្ថាប័នគ្រប់គ្រងការត់ម៉ារ៉ាតុងពិភពលោក World Athletics។ តួយ៉ាង កាលពីឆ្នាំ ២០១៩ អ្នករត់មកពីបស្ចិមប្រទេសប្រហែល៩៥០នាក់បានចូលរួមព្រឹត្តិការណ៍នេះ កើនឡើងពីចំនួនប្រហែលត្រឹម ៤៥០នាក់ ដែលបានកត់ត្រាកាលពីឆ្នាំ ២០១៨។
បើតាមលោក Simon Cockerell អ្នកគ្រប់គ្រងទូទៅនៃក្រុមហ៊ុន Koryo Tours កាលពីថ្មីៗនេះបានប្រាប់ទូរទស្សន៍អូស្ត្រាលី SBS ថា នៅឆ្នាំនេះ អ្នករត់បរទេសប្រហែល២០០នាក់ត្រូវបានរំពឹងថានឹងប្រកួតប្រជែងជាមួយអ្នករត់ម្ចាស់ស្រុកជាង ២០០នាក់។ លោកបានបន្តថា ១កូរ៉េខាងជើងគឺជាកន្លែងដ៏ស្មុគស្មាញ និងទាក់ទាញខ្លាំង ដែលធ្វើឱ្យគ្រប់គ្នាចាប់អារម្មណ៍ ហើយទោះបីជាទីនោះមិនមែនសម្រាប់មនុស្សគ្រប់គ្នាក៏ដោយ ក៏វាពិតជាទាក់ទាញដល់អ្នកដែលចង់ដឹងចង់ឃើញអំពីបទពិសោធន៍នៃការទៅលេងប្រទេសបែបនេះ និងឃើញអំអ្វីដែលពួកគេអាចធ្វើបាន»៕ ប្រភព ៖ AFP

ចែករំលែកព័តមាននេះ