ទីក្រុង​អ៊ូ​ក​ឡែ​ន ៖ ក្រុម​ជម្រើសជាតិ​នូ​វែ​ល​សេ​ឡង់ កាលពី​ថ្ងៃ​ទី​២៤ ខែមីនា ឆ្នាំ​២០២៥ បាន​ក្លាយជា​ក្រុម​ទី​២ បន្ទាប់​ពី​ក្រុម​ជម្រើសជាតិ​ជប៉ុន ដែល​កក់​កៅអី​ការ​ប្រកួត​ជុំ​ចុង​ក្រោយ​ព្រឹត្តិការណ៍​បាល់ទាត់​ពិភពលោក FIFA World Cup ឆ្នាំ ២០២៦ ដែល​មាន​សហ​ម្ចាស់ផ្ទះ​កា​ណា​ដា ម៉ិ​ក​ស៊ិ​ក និង​សហរដ្ឋអាមេរិក​រង់ចាំ​ជា​ស្រេច បន្ទាប់​ពី​យកឈ្នះ​ក្រុម​ជម្រើសជាតិ​នូ​វែ​ល​កាឡេ​ដូ​នី (New Caledonia) ដោយ​លទ្ធផល ៣​ទល់​នឹង​០ វគ្គ​ផ្តាច់ព្រ័ត្រ ការ​ប្រកួត​ជម្រុះ​ទ្វីបអូសេអានី​។

ខ្សែការពារ Michael Boxall ខ្សែបម្រើ​ស្លាប Kosta Barbarouses និង​ខ្សែបម្រើ​ស្លាប Elijah Just គឺជា​អ្នករក​គ្រាប់​ជ័យជម្នះ​នៅ​ឯ​កីឡដ្ឋាន Eden Park ដែល​មាន​មូលដ្ឋាន​នៅ​ទីក្រុង​អ៊ូ​ក​ឡែ​ន ដើម្បី​រុញ​នូ​វែ​ល​សេ​ឡង់​ក្លាយជា​ក្រុម​ទី​២ បន្ទាប់​ពី​ក្រុម​សាំ​មូ​រ៉ៃ​ជប៉ុន​ដែល​មិនមែន​ជា​ក្រុម​ម្ចាស់ផ្ទះ​ព្រឹត្តិការណ៍ (Non-host) ឈ្នះ​សំបុត្រ​យន្តហោះ​ទៅ​ចូលរួម​ការ​ប្រកួត​ជុំ​ចុង​ក្រោយ​ព្រឹត្តិការណ៍ FIFA World Cup ឆ្នាំ ២០២៦​។

ជប៉ុន​ក្រោម​ការ​ដឹកនាំ​របស់​លោកគ្រូ​បង្វឹក Hajime Moriyasu កាលពី​ថ្ងៃ​ទី​២០ ខែមីនា ឆ្នាំ​២០២៥ ក្លាយជា​ក្រុម​ជម្រើសជាតិ​ដំបូង​គេ​កក់​កៅអី​ព្រឹត្តិការណ៍ FIFA World Cup ឆ្នាំ ២០២៦ បន្ទាប់​ពី​យកឈ្នះ​លើ​បា​រ៉ែ​ន​ដោយ​លទ្ធផល ២​ទល់​នឹង​០ នៅ​ក្នុង​ការ​ប្រកួត​ជម្រុះ​ជុំ​ទី​៣ ទ្វីបអាស៊ី​។

ក្រុម​ជម្រើសជាតិ​នូ​វែ​ល​សេ​ឡង់ ក្រោម​ការ​ដឹកនាំ​របស់​គ្រូបង្វឹក​ជនជាតិ​អង់គ្លេស លោក Darren Bazeley បាន​បញ្ចប់​នៅ​កំពូល​តារាង​ពូ​ល B ការ​ប្រកួត​ជម្រុះ​ជុំ​ទី​២ ជាមួយនឹង​កំណត់​ត្រា​ឈ្នះ​ទាំងអស់ ក្រោយ​ឆ្លងកាត់​៣​ប្រកួត​យកឈ្នះ​លើ​ក្រុម​ជម្រើសជាតិ Tahiti, Vanuatu និង​សា​ម័​រ (Samoa) ដែល​រួម​ពូ​ល ហើយ​បន្ត​យកឈ្នះ​ក្រុម​ជម្រើសជាតិ​ហ្វី​ជី (Fiji) នៅ​វគ្គ​ពាក់កណ្តាល​ផ្តាច់ព្រ័ត្រ មុន​ពេល​យកឈ្នះ​លើ​នូ​វែ​ល​កាឡេ​ដូ​នី កាលពី​ថ្ងៃ​ទី​២៤ ខែមីនា ឆ្នាំ​២០២៥​។

នេះ​គឺជា​លើក​ទី​៣ សម្រាប់​ក្រុម​ជម្រើសជាតិ​នូ​វែ​ល​សេ​ឡង់ ដែល​ឈាន​ដល់​ការ​ប្រកួត​ជុំ​ចុង​ក្រោយ​ព្រឹត្តិការណ៍ FIFA World Cup​។ លើក​ទី​១ នៅ​ឆ្នាំ ១៩៨២ ដែល​អេ​ស្ប៉ា​ញ​ធ្វើ​ជា​ម្ចាស់ផ្ទះ ពួក​គេ​ធ្លាក់​ត្រឹម​វគ្គ​សន្សំ​ពិន្ទុ​ក្នុង​ពូ​ល និង​លើក​ទី​២ នៅ​ឆ្នាំ ២០១០ ដែល​អាហ្វ្រិក​ខាងត្បូង​ធ្វើ​ជា​ម្ចាស់ផ្ទះ ក៏​ពួក​គេ​ធ្លាក់​ត្រឹម​វគ្គ​សន្សំ​ពិន្ទុ​ក្នុង​ពូ​ល​ដូច​គ្នា​។

ក្រុម​រងជើង​ឯក​ពី​ទ្វីបអូសេអានី គឺ​ក្រុម​ជម្រើសជាតិ​នូ​វែ​ល​កាឡេ​ដូ​នី នឹង​ត្រូវ​រង់ចាំ​ប្រកួត​ជម្រុះ​អន្តរទ្វីប (Inter-confederation play-offs) ជាមួយនឹង​១​ក្រុម​មក​ពី​អាស៊ី (AFC) អាហ្វ្រិក (CAF) អា​មេ​រិ​ក​ខាងត្បូង (CONMEBOL) និង​២​ក្រុម​មក​ពី​តំបន់​អា​មេ​រិ​ក​ខាងជើង អា​មេ​រិ​ក​កណ្តាល និង​ការី​បៀ​ន (CONCACAF)​។

គួរ​បញ្ជាក់​ជូន​ថា ព្រឹត្តិការណ៍ World Cup ឆ្នាំ ២០២៦ គ្រោង​ប្រព្រឹត្ត​ទៅ​នៅ​ថ្ងៃ​ទី​១១ ខែមិថុនា រហូត​ដល់​ថ្ងៃ​ទី​១៩ ខែកក្កដា បាន​ចាប់ផ្តើម​អនុវត្ត​ទម្រង់​ថ្មី​របស់​ខ្លួន ដោយ​បង្កើន​ចំនួន​ក្រុម​ពី ៣២​ក្រុម​រហូត​ដល់ ៤៨​ក្រុម​ជា​លើក​ដំបូង​ក្នុង​ប្រវត្តិសាស្ត្រ​៕