ប្រទេសមីយ៉ាន់ម៉ា ៖ កីឡាករប្រដាល់គុនចម្រុះដ៏ល្បីរបស់មីយ៉ាន់ម៉ា Aung La Nsang ជើងខ្លាំងប្រចាំសង្វៀន ONE Championship កំពុងកៀងគររកជំនួយសម្រាប់ប្រទេសកំណើតជាទីគោរពស្រលាញ់របស់ខ្លួន…
ប្រទេសមីយ៉ាន់ម៉ា ៖ កីឡាករប្រដាល់គុនចម្រុះដ៏ល្បីរបស់មីយ៉ាន់ម៉ា Aung La Nsang ជើងខ្លាំងប្រចាំសង្វៀន ONE Championship កំពុងកៀងគររកជំនួយសម្រាប់ប្រទេសកំណើតជាទីគោរពស្រលាញ់របស់ខ្លួន បន្ទាប់ពីរងផលប៉ះពាល់ដ៏អាក្រក់ពីគ្រោះរញ្ជួយដី កាលពីពេលថ្មីៗនេះ។
ប្រភពពីទីភ្នាក់ងារសារព័ត៌មាន Reuters នៅថ្ងៃទី១ ខែមេសា ឆ្នាំ២០២៥ ដោយស្រង់របាយការណ៍ពីអាជ្ញាធរមីយ៉ាន់ម៉ាបានឱ្យដឹងថា ចំនួនអ្នកស្លាប់ដោយគ្រោះរញ្ជួយដីដ៏អាក្រក់នៅមីយ៉ាន់ម៉ាកើនឡើងដល់យ៉ាងតិច ២០៦៥នាក់ អ្នករបួសជាង ៣,៩០០នាក់ និងជាង ២៧០នាក់បានបាត់ខ្លួន។ ចំនួនអ្នកស្លាប់អាចនឹងកើនឡើង ខណៈអាជ្ញាធរបន្តវាយតម្លៃពីទំហំនៃការខូចខាតទាំងស្រុង។
កីឡាករ Aung La អតីតជើងឯក MMA ទម្ងន់មធ្យម និងទម្ងន់ស្រាលរបស់ ONE បានប្រកាសនៅលើប្រព័ន្ធផ្សព្វផ្សាយសង្គមថា ខ្លួននឹងដេញថ្លៃស្រោមដៃប្រកួតឈ្នះកីឡាករកាមេរូន Alain Ngalani នៅទីក្រុងយ៉ាំងហ្គោន កាលពីឆ្នាំ ២០១៧ ដើម្បីយកថវិកាជួយជនរងគ្រោះ។ Aung La ក៏បានប្រាប់កាសែតបាងកកប៉ុស្តិ៍ថា ខ្លួនគ្រោងបង្កើតគណនី GoFundMe ដើម្បីរៃអង្គាសប្រាក់សម្រាប់អ្នកនៅរស់រានមានជីវិត ហើយនឹងរៀបចំក្រុមការងារដើម្បីផ្តល់ជំនួយផ្ទាល់។
អ្នកប្រដាល់គុនចម្រុះរហស្សនាមថា «ពស់ថ្លាន់កំណាចភូមា» វ័យ៣៩ឆ្នាំរូបនេះ គឺជាវីរបុរសប្រដាល់ជាតិមីយ៉ាន់ម៉ាមួយរូប ហើយរូបសំណាកពណ៌ទឹកមាសស្ពាយខ្សែក្រវាត់ជើងឯក ONE Championship ពីរប្រភេទទម្ងន់របស់កីឡាកររូបនេះ ត្រូវបានដាក់តាំងកាលពីឆ្នាំ ២០១៨ នៅឧទ្យានជាតិ Kachin Manau ទីក្រុង Myitkyina ដែលជាស្រុកកំណើតរបស់កីឡាកររូបនេះ។
Aung La បានរស់នៅសហរដ្ឋអាមេរិកតាំងពីឆ្នាំ ២០០៣ ជាកន្លែងដែលរូបគេបានបន្តក្តីសម្រៃក្លាយជាអ្នកប្រយុទ្ធ MMA អាជីព។ Aung La បានបញ្ជាក់ក្នុងសេចក្តីថ្លែងការណ៍មួយថា «ប្រទេសមីយ៉ាន់ម៉ា គឺជាផ្ទះរបស់ខ្ញុំ បេះដូងរបស់ខ្ញុំ និងជាឫសគល់របស់ខ្ញុំ។ សព្វថ្ងៃនេះ ប្រជាជនយើងកំពុងប្រឈមមុខនឹងការបំផ្លិចបំផ្លាញមិនអាចនឹកស្មានដល់។ គ្រួសារមីយ៉ាន់ម៉ាបានបាត់បង់អ្វីៗគ្រប់យ៉ាង ផ្ទះសម្បែងត្រូវបានដួលរលំ និងសហគមន៍ទាំងមូលកំពុងតែតស៊ូដើម្បីកសាងឡើងវិញ។ ស្ថិតក្នុងពេលវេលាបែបនេះ យើងត្រូវតែឈរជាមួយគ្នា»។
ការដេញថ្លៃសម្រាប់ស្រោមដៃរបស់កីឡាករ Aung La បានចាប់ផ្តើមពីតម្លៃ ៦,៥០០ដុល្លារឡើងទៅ នៅថ្ងៃទី៣១ ខែមីនា នៅវិចិត្រសាល Ohmar ក្នុងទីក្រុងយ៉ាំងហ្គោន ជាកន្លែងដែលពួកគេដាក់តាំងបង្ហាញ។ Aung La បានបន្ថែមថា «រាល់ការដេញថ្លៃ និងរាល់ប្រាក់ដុល្លារទាំងអស់ នឹងបញ្ជូនដោយផ្ទាល់ទៅកាន់អង្គការសប្បុរសធម៌ដែលផ្តល់អាហារ ទីជម្រក និងជំនួយផ្នែកវេជ្ជសាស្ត្រដល់ជនរងគ្រោះមីយ៉ាន់ម៉ា។ ស្រោមដៃនេះ គឺជានិមិត្តសញ្ញានៃភាពធន់ ការតស៊ូ និងកម្លាំង គឺជាកម្លាំងដូចគ្នាដែលប្រជាជនយើងត្រូវតែងើបឈរឡើងវិញ»៕ ប្រភព ៖ Bangkok Post
ចែករំលែកព័តមាននេះ