រាជធានីភ្នំពេញ ៖ ព្រឹត្តិការណ៍កីឡាកុមារអូឡាំពិក លើកទី១ ដែលផ្ដួចផ្ដើមគំនិតឡើងដោយគណៈកម្មាធិការជាតិអូឡាំពិកកម្ពុជា (NOCC) នឹងប្រព្រឹត្តទៅ នៅថ្ងៃទី១ ខែកុម្ភៈ ឆ្នាំ២០២៦…
រាជធានីភ្នំពេញ ៖ ព្រឹត្តិការណ៍កីឡាកុមារអូឡាំពិក លើកទី១ ដែលផ្ដួចផ្ដើមគំនិតឡើងដោយគណៈកម្មាធិការជាតិអូឡាំពិកកម្ពុជា (NOCC) នឹងប្រព្រឹត្តទៅ នៅថ្ងៃទី១ ខែកុម្ភៈ ឆ្នាំ២០២៦ ដែលមានទីតាំងស្ថិតនៅផ្សារទំនើបអ៊ីអន០៣ ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានមានប្រសាសន៍ក្នុងសន្និសីទសារព័ត៌មានមួយ កាលពីថ្ងៃទី៣០ ខែកញ្ញា ឆ្នាំ២០២៥ ថា ៖ «ការបង្កើតឲ្យមានព្រឹត្តិការណ៍កីឡាកុមារអូឡាំពិកនេះឡើង ក្នុងគោលបំណងជម្រុញការផ្សព្វផ្សាយស្មារតីចលនាអូឡាំពិក ឬគុណតម្លៃអូឡាំពិក ទៅដល់កុមារតូចៗ ឲ្យយល់ដឹងពីតម្លៃកីឡាអូឡាំពិក។ ហើយសកម្មភាពនេះ ត្រូវបានរៀបចំឲ្យការដាក់ឲ្យប្រកួត នូវកីឡាចំនួន១០ប្រភេទផ្សេងៗគ្នា»។
ឯកឧត្តមបានឲ្យដឹងទៀតថា៖ «សម្រាប់ដំណើរការប្រកួតលើកទី១នេះ គឺតម្រូវឲ្យកុមារតូចៗ ចុះឈ្មោះត្រឹមតែ៥០០នាក់ប៉ុណ្ណោះ ដែលមានអាយុចាប់ពី១ឆ្នាំដល់៧ឆ្នាំ»។
ចំពោះព្រឹត្តិការណ៍នេះ ត្រូវបានកត់សម្គាល់ឃើញថា ជាគំនិតឆ្នៃប្រឌិតឡើងក្នុងការបំផុសដល់កុមារ ឲ្យចេះស្រឡាញ់កីឡា ជាពិសេសនៅពេលដែលគេស្ថិតនៅក្នុងវ័យកុមារ ។
ព្រឹត្តិការណ៍កីឡាកុមារអូឡាំពិកនេះ មិនត្រឹមតែផ្ដល់នូវការសប្បាយប៉ុណ្ណោះទេ ប៉ុន្តែជាវេទិកាមួយក្នុងការជម្រុញ និងអភិវឌ្ឍន៍វ័យកុមារ តាមរយៈការធ្វើចលនា ការលេង និងការចូលរួមនៅក្នុងសង្គម ហើយក៏ជាកម្មវិធីមួយដើម្បីលើកកម្ពស់ការយល់ដឹងផ្នែកសុខភាពផងដែរ។
ឯកឧត្តមបានសង្កត់ធ្ងន់ថា៖ «ព្រឹត្តិការណ៍កីឡាកុមារអូឡាំពិកនេះ នឹងប្រព្រឹត្តជារៀងរាល់១ឆ្នាំម្ដង ដែលចំនួន នៃការចុះឈ្មោះចូលរួមប្រកួត អាចនឹងកើនឡើងលើសពីឆ្នាំដំបូង» ៕
ចែករំលែកព័តមាននេះ