រាជធានីភ្នំពេញ ៖ បន្ទាប់ពីសារព័ត៌មានកោះសន្ដិភាពចេញផ្សាយថ្ងៃចន្ទ ទី១៧ តុលា ឆ្នាំ២០១១ នូវអត្ថបទក្រោមចំណងជើងថា «ទាល់ច្រកអស់សង្ឃឹមក្នុងជីវិតយកកាំបិតចាក់ចុងដង្ហើមបញ្ចប់ជីវិត» មក មានសប្បុរសជនអាណិតអាសូរបានផ្ដល់ទឹកប្រាក់ចំនួន៣ម៉ឺនរៀលជួយឧបត្ថម្ភដល់បុរសរងគ្រោះ។ ប្រាក់អំណោយនេះជារបស់លោកសេង គី លក់ទាខ្វៃនៅផ្ទះលេខ៤០Eo ផ្លូវជាតិលេខ១ សង្កាត់ច្បារអំពៅ១ ខណ្ឌមានជ័យ រាជធានីភ្នំពេញ ។
សូមរំលឹកថា ដោយសារតែតូចចិត្ដនឹងជីវភាពក្រីក្ររកប្រាក់ចិញ្ចឹមប្រពន្ធកូនមិនបាន ធ្វើឱ្យបុរសម្នាក់សម្រេចចិត្ដធ្វើអត្តឃាតដោយយកកូនកាំបិតចាក់ចុងដង្ហើមរបស់ខ្លួន ប៉ុន្ដែសំណាងល្អបានក្រុមគ្រួសារដឹកទៅមន្ទីរពេទ្យទាន់ពេលវេលា។ ហេតុការណ៍នេះកើតឡើងកាលពីវេលាម៉ោង៥និង៣០នាទីភ្លឺ ថ្ងៃទី១១ តុលា កន្លងមកនេះ នៅក្នុងភូមិដើមចាន់ សង្កាត់ច្បារអំពៅទី២ ខណ្ឌមានជ័យ។ បច្ចុប្បន្នបុរសនេះកំពុងសម្រាកព្យាបាលនៅមន្ទីរពេទ្យព្រះកុសុមៈ ។
បុរសគិតខ្លីចាក់សម្លាប់ខ្លួននេះឈ្មោះសន កេសាណា អាយុ២៩ឆ្នាំ មុខរបរកម្មករសំណង់មានប្រពន្ធនិងកូន២នាក់ បច្ចុប្បន្នប្រពន្ធកំពុងមានផ្ទៃពោះ៧ខែទៀត។ តាមការរៀបរាប់ទាំងទឹកភ្នែកហូររហាមពីស្ដ្រីឈ្មោះគង់ ថារឿន អាយុ៥៩ឆ្នាំ ប្រកបរបរលក់បាយសម្លនៅមុខផ្ទះក្នុងភូមិកើតហេតុខាងលើ បានឱ្យដឹងទាំងអួលដើម.កថា ជនរងគ្រោះត្រូវជាកូនរបស់គាត់ស្នាក់នៅជាមួយគាត់រហូតមក។ ដោយសារផ្ទះលិចទឹក ទើបជាងមួយខែកន្លងមកនេះ កូននិងកូនប្រសាស្រី ព្រមទាំងចៅបានទៅរស់នៅបណ្ដោះអាសន្នជាមួយម្ដាយក្មេកនៅស្រុកកៀនស្វាយ ខេត្ដកណ្ដាល ។
ស្ដ្រីជាម្ដាយរៀបរាប់បន្ដថា ដោយសារតែជីវភាពក្រីក្រ ធ្វើកម្មករសំណង់រាល់ថ្ងៃរកប្រាក់កម្រៃចិញ្ចឹមប្រពន្ធកូនមិនគ្រប់ ពេលជួបមិត្ដភក្ដិដែលទៅធ្វើកម្មករនៅប្រទេសថៃបបួលឱ្យទៅធ្វើការជាមួយបានប្រាក់ច្រើន កូនគាត់បានសម្រេចចិត្ដទៅប្រទេសថៃជាមួយមិត្ដភក្ដិ។ នៅថ្ងៃទី៩ តុលា កូនប្រុសគាត់បាននាំប្រពន្ធ និងកូនយកមកផ្ញើគាត់ជាម្តាយឱ្យជួយមើលថែផង ពេលរូបគេចេញទៅធ្វើការនៅប្រទេសថៃ និងបានយកលុយមកផ្ញើគាត់ទុកចំនួន៥ម៉ឺនរៀល ហើយក៏ត្រឡប់ទៅផ្ទះម្ដាយក្មេកវិញ។ លុះនៅថ្ងៃទី១០ តុលា កូនប្រុសបានមកផ្ទះគាត់តែម្នាក់ឯងទេ ដើម្បីត្រៀមខ្លួនចេញទៅប្រទេសថៃនៅថ្ងៃទី១២ តុលា ហើយនៅល្ងាចនោះកូនប្រុសគាត់បានខ្ចីប្រាក់អង្គការដើម្បីយកមកធ្វើសោហ៊ុយទៅខ្លះ និងទុកឱ្យប្រពន្ធកូនខ្លះ ប៉ុន្ដែខ្ចីមិនបានក៏ត្រឡប់មកផ្ទះវិញ។ នៅយប់កើតហេតុកូនប្រុសដេកក្នុងមុងជាមួយគាត់ជាម្ដាយ ហើយដេកមិនលក់សោះនិងក្ដៅខ្លួនទៀតផង គាត់ក៏យកថ្នាំឱ្យលេបពីរដងបានត្រជាក់ខ្លួនធម្មតាវិញ និងបានសម្ងំដេកទៅ។
ស្ដ្រីជាម្ដាយបាននិយាយថា ពេលដែលគាត់សម្ងំដេកកូនគាត់ស្មានតែគាត់ដេកលក់ក៏យកដៃគាត់ទៅថើបហើយនិយាយថា អ្នកមានគុណកូនសុំទោស ហើយចេះតែស្ទាបអង្អែលគាត់រហូតធ្វើឱ្យគាត់ដេកមិនបានក៏ងើបទៅដេកក្នុងមុងជាមួយកូនស្រីនៅជិតនោះដែរ។ លុះដល់ម៉ោង៥ភ្លឺថ្ងៃទី១១ តុលា ស្រាប់តែកូនគាត់បើកមុងដើរចូលទៅផ្ទះបាយយកកាំបិតមុខ៣ធ្នាប់ដៃមកអារ.កដៃឆ្វេងខ្លួនឯង។ ឃើញដូច្នេះគាត់ស្ទុះចេញពីមុងស្រែកឃាត់ ស្រាប់តែកូនគាត់យកកាំបិតនោះចាក់ចំចុងដង្ហើមរួចទាញដកចេញមកវិញប្រុងចាក់មួយកាំបិតទៀត តែគាត់ជាម្ដាយចាប់ឃាត់មិនឱ្យចាក់ទៀតទេ។ ពេលចាក់នោះ កូនគាត់រូបនេះស្រែកថាតូចចិត្ដណាស់មិនចង់រស់នៅទេ ចង់តែស្លាប់ឱ្យបាត់ទៅ ។
ស្ដ្រីជាម្ដាយបាននិយាយថា ក្រហើយជាន់លើក្រទៀត រាល់ថ្ងៃរកប្រាក់ចិញ្ចឹមជីវិតមិនចង់រស់ផង មានប្រាក់ឯណាយកមកព្យាបាលកូនទៀតនោះ។ ពេលមកដល់មន្ទីរពេទ្យគាត់មិនមានលុយទាល់តែសោះ សូម្បីតែថ្លៃវះកាត់ក៏គ្មានប្រាក់បង់ឱ្យមន្ទីរពេទ្យដែរ។ ដោយសារតែឃើញកូនគាត់ជាជនក្រីក្រ គ្រូពេទ្យមិនយកថ្លៃវះកាត់និងព្យាបាលប្រចាំថ្ងៃទេ៕
ចែករំលែកព័តមាននេះ