ខេត្តកំពង់ឆ្នាំង ៖ លោកបណ្ឌិត ទូច ម៉ារីម អភិបាលខេត្តកំពង់ឆ្នាំង ព្រមទាំងមន្ត្រីរាជការក្នុងខេត្តកាលពីព្រឹកថ្ងៃទី១៨ តុលា បានអញ្ជើញចុះចែកអំណោយដល់ប្រជាពលរដ្ឋរងគ្រោះដោយទឹកជំនន់នៅស្រុកជលគីរីចំនួន៦២៣គ្រួសារ ដែលពិធីចែកអំណោយនេះធ្វើឡើងនៅបរិវេណវត្តត្រពាំងជុំ ភូមិសែប ឃុំសែប ស្រុកកំពង់ត្រឡាច ។
លោកយិន សាវ៉េន អភិបាលស្រុកជលគីរីបានអានរបាយការណ៍ថា នៅស្រុកជលគិរីមានប្រជាពលរដ្ឋលិចផ្ទះចំនួន៥.១៩៨ខ្នង ខូចខាតស្រូវ១.៧៣៨ហិកតា លិចសាលារៀន១០កន្លែង វត្តចំនួន៩ មណ្ឌលសុខភាព៣ សាលាឃុំ៤ និងប៉ុស្តិ៍ចំនួន៥ ជម្លៀសប្រជាពលរដ្ឋ៤.១៣៧គ្រួសាររកទីទួលមានសុវត្ថិភាព ។
អំណោយដែលត្រូវចែកជូនប្រជាពលរដ្ឋនៅព្រឹកនោះមានចំនួន៦២៣គ្រួសារមកពី១៥ភូមិ និងឃុំពីរដែលក្នុងមួយគ្រួសារទទួលបានអង្ករ២៥គីឡូក្រាម ក្រមា១ មុង១ ភួយ១ សារុង១ និងត្រីខ១០កំប៉ុង ។ ដោយឡែកប្រជាពលរដ្ឋដែលរងគ្រោះដោយលង់ទឹក ទទួលបានថវិកា២លានរៀល ជាអំណោយផ្ទាល់របស់សម្តេចហ៊ុន សែន និងលោកជំទាវ ។
លោកទូច ម៉ារីម បានមានប្រសាសន៍ថា អំណោយដែលចែកជូនបងប្អូនក្នុងថ្ងៃនេះ គឺជាអំណោយរបស់កាកបាទក្រហមខេត្តចែកជូនប្រជាពលរដ្ឋរងគ្រោះដោយទឹកជំនន់ដោយមិនប្រកាន់និន្នាការនយោបាយឡើយ មិនដូចជនឆ្លៀតឱកាសខ្លះលើកឡើងថា ចែកតែគ្រួសារនិងបក្សពួកឡើយ ។ លោកក៏បានផ្តាំផ្ញើដល់បងប្អូនប្រជាពលរដ្ឋត្រូវប្រុងប្រយ័ត្នកូនចៅកុំឱ្យធ្លាក់ទឹក និងអនាម័យម្ហូបអាហារចៀសវាងរាករួស និងជំងឺតម្កាត់ផ្សេងៗ ។ ជាងនេះទៀតត្រូវមានស្មារតីក្នុងការដាំដុះឡើងវិញពេលទឹកស្រក ដើម្បីធានាបាននូវសុវត្ថិភាពស្បៀងផ្ទាល់ខ្លួន៕
ចែករំលែកព័តមាននេះ