រាជធានីភ្នំពេញ ៖ យោងតាមព្រះរាជក្រិត្យចុះថ្ងៃទី២២ កញ្ញា ២០១១ ដែលកោះសន្តិភាពបានទទួលកាលពីព្រឹកថ្ងៃទី១៦ តុលា ២០១១ ឱ្យដឹងថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានលើកលែងទោសដល់ «ក្រុមអ្នកប្រយុទ្ធកម្ពុជាដើម្បីសេរីភាព (CFF)»
រាជធានីភ្នំពេញ ៖ យោងតាមព្រះរាជក្រិត្យចុះថ្ងៃទី២២ កញ្ញា ២០១១ ដែលកោះសន្តិភាពបានទទួលកាលពីព្រឹកថ្ងៃទី១៦ តុលា ២០១១ ឱ្យដឹងថា ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានលើកលែងទោសដល់ «ក្រុមអ្នកប្រយុទ្ធកម្ពុជាដើម្បីសេរីភាព (CFF)» ចំនួន៥នាក់ឱ្យមានសេរីភាពឡើងវិញ ។ព្រះរាជក្រិត្យបង្ហាញថា មាត្រា១ត្រូវលើកលែងទោសឱ្យទណ្ឌិតចំនួន៥រូប ដូចមានរាយឈ្មោះដូចតទៅ ៖
១-ទណ្ឌិតឈ្មោះសេង ណារិន ភេទប្រុស អាយុ៥២ឆ្នាំ ត្រូវបានចាប់ខ្លួនកាលពីថ្ងៃទី៣០ វិច្ឆិកា ២០០០ ពីបទភេរវកម្ម និងប្រដាប់អាវុធខុសច្បាប់ ហើយត្រូវបានតុលាការសម្រេចផ្តន្ទាទោសដាក់ពន្ធនាគារ១៥ឆ្នាំ។
២-ទណ្ឌិតឈ្មោះទម្លាប់ មិល ភេទប្រុស អាយុ៥២ឆ្នាំ ត្រូវបានចាប់ខ្លួនកាលពីថ្ងៃទី៣០ វិច្ឆិកា ២០០០ ពីបទភេរវកម្ម និងប្រដាប់អាវុធខុសច្បាប់ ហើយត្រូវបានតុលាការសម្រេចផ្តន្ទា ទោសដាក់ពន្ធនាគារ១៥ឆ្នាំ។
៣-ទណ្ឌិតឈ្មោះប៊ុន ចាន់តូ ភេទប្រុស អាយុ៤៨ឆ្នាំ ត្រូវបានចាប់ខ្លួនកាលពីថ្ងៃទី៣០ វិច្ឆិកា ២០០០ ពីបទភេរវកម្ម និងប្រដាប់អាវុធ ខុសច្បាប់ ហើយត្រូវបានតុលាការសម្រេចផ្តន្ទាទោសដាក់ពន្ធនាគារ១៥ឆ្នាំ ។
៤-ទណ្ឌិតឈ្មោះហែម ប៊ុនធឿន ហៅហែម អេម ភេទប្រុស អាយុ៤៥ឆ្នាំ ត្រូវបានចាប់ខ្លួនកាលពីថ្ងៃទី២៩ វិច្ឆិកា ២០០០ ពីបទភេរវកម្ម និងប្រដាប់អាវុធខុសច្បាប់ ហើយត្រូវបានតុលាការសម្រេចផ្តន្ទាទោសដាកពន្ធនាគារ១៥ឆ្នាំ។
៥-ទណ្ឌិតឈ្មោះចាន់ ប៊ុនខេន ភេទប្រុស អាយុ៤២ឆ្នាំ ត្រូវបានចាប់ខ្លួនកាលពីថ្ងៃទី៣០ វិច្ឆិកា ២០០០ ពីបទភេរវកម្ម និងប្រដាប់អាវុធខុសច្បាប់ ហើយត្រូវបានតុលាការសម្រេចផ្តន្ទាទោសដាក់ពន្ធនាគារ១៥ឆ្នាំ ។
ព្រះរាជក្រិត្យមានខ្លឹមសារទៀតថា មាត្រា២៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវអនុវត្តឱ្យបានសម្រេចនូវព្រះរាជក្រិត្យនេះ។
គេនៅចាំបានថា កាលពីអំឡុងឆ្នាំ២០០០ មានចលនាមួយដែលបានហៅខ្លួនឯងថា «ចលនាអ្នកប្រយុទ្ធកម្ពុជាដើម្បីសេរីភាព» បានធ្វើការវាយប្រហារមួយប្រាវមកលើអគាររដ្ឋាភិបាល។ ក្រោយមកមានមនុស្សជាច្រើននាក់ត្រូវបានចាប់ខ្លួនជាបន្តបន្ទាប់ ដោយសមត្ថកិច្ចនៃរាជរដ្ឋាភិបាល និងត្រូវបានចោទប្រកាន់ដោយតុលាការពីបទភេរវកម្ម និងប្រដាប់អាវុធខុសច្បាប់ ។ ចំណែកឯឈុន យ៉ាសិទ្ធិ ដែលជាមេខ្លោង (មេដឹកនាំ) របស់ពួកគេ ក៏ត្រូវបានតុលាការសហព័ន្ធនៃរដ្ឋាភិបាលអាេមរិកកាត់ទោសផងដែរ៕
ចែករំលែកព័តមាននេះ