ខេត្តកំពង់ឆ្នាំង ៖ សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រី បានគូសបញ្ជាក់ជាថ្មីអំពីជំហរដាច់ណាត់ក្នុងការបើកច្រកទ្វារព្រំដែនរវាងកម្ពុជា-ថៃឡើងវិញ ។ សម្តេចធិបតីនាយករដ្ឋមន្ត្រី ថ្លែងថា…
ខេត្តកំពង់ឆ្នាំង ៖ សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រី បានគូសបញ្ជាក់ជាថ្មីអំពីជំហរដាច់ណាត់ក្នុងការបើកច្រកទ្វារព្រំដែនរវាងកម្ពុជា-ថៃឡើងវិញ ។ សម្តេចធិបតីនាយករដ្ឋមន្ត្រី ថ្លែងថា ការបើកច្រកទ្វារព្រំដែនមិនលំបាកនោះទេ ពោលគឺកូនសោប្រគល់ឲ្យភាគីថៃរួចរាល់ហើយ ។ ការសម្រេចបែបណានោះស្ថិតនៅលើភាគីថៃ កម្ពុជាត្រៀមអនុវត្តតាមក្រោយ បើសិនថៃបើកព្រំដែនឡើងវិញ គឺត្រូវបើកទាំងអស់ដំណើរការដូចដើម។
ថ្លែងក្នុងឱកាសសម្ពោធប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថនៅភ្នំជុំសែនរីករាយ និងអបអរសាទរខួបលើកទី៣២ ទិវាកងរាជអាវុធហត្ថ នាព្រឹកថ្ងៃទី១៤ ខែកក្កដា ឆ្នាំ២០២៥ នៅខេត្តកំពង់ឆ្នាំង សម្ដេចបវរធិបតី ហ៊ុន ម៉ាណែត បានផ្ដល់លក្ខខណ្ឌ៣ចំណុចដល់ភាគីថៃ សម្រាប់ការបើកព្រំដែនឡើងវិញ ។
សម្ដេចបវរធិបតី ហ៊ុន ម៉ាណែត បានគូសបញ្ជាក់ថា កម្ពុជាចង់បានសាមញ្ញបំផុត រឿងបើកច្រកនេះ សុំតែ៣លក្ខខណ្ឌទេ ហើយសោប្រគល់ឲ្យភាគីថៃហើយ បើកចុះមិនចាំបាច់អង្គុយចរចាទេ ។
ទី១-ថៃប្រកាសបើកមុនជាឯកតោភាគី ហើយបញ្ជាក់ថា មិនប្រើប្រាស់វិធានការបិទជាឯកតោភាគី ហើយបើកឲ្យដូចមុនថ្ងៃទី៧ ខែមិថុនា ឆ្នាំ២០២៥ ។
ទី២-បើកម្ដង បើកគ្រប់ច្រកទាំងអស់ មិនមែនបើកមួយទុកមួយនោះទេ ។
ទី៣-បើកឲ្យដូចស្ថានភាពមុនថ្ងៃទី៧ ខែមិថុនា ឆ្នាំ២០២៥ ពោលគឺពីម៉ោង៦ព្រឹក ដល់ម៉ោង១០យប់ ។
សម្ដេចបវរធិបតី ហ៊ុន ម៉ាណែត បានលើកឡើងថា នៅពេលភាគីថៃអនុវត្តនូវលក្ខខណ្ឌ៣ចំណុចនេះហើយ យ៉ាងយូរត្រឹមរយៈពេល៥ម៉ោង កម្ពុជានឹងអនុវត្តតាម ពោលគឺបើកគ្រប់ច្រកវិញទាំងអស់ ។
សម្ដេចធិបតីបន្ដថា កម្ពុជាមិនចង់ប្រើប្រាស់វិធានក្នុងការបិទច្រកព្រំដែនោះទេ ប៉ុន្ដែទ្រាំមិនបាន ចំពោះការសម្រេចចិត្តជាឯកតោភាគីម្ដងហើយម្ដងទៀតពីសំណាក់ក្រុមយោធាថៃ ។សម្ដេចបវរធិបតីនាយករដ្ឋមន្ដ្រី បានគូសបញ្ជាក់ថា កម្ពុជាមិនចង់លេងបិទពួនដូចថៃកំពុងលេងនោះទេ មិនមែនចង់បិទក៏បិទ ចង់បើកខ្លះទុកខ្លះ ឬបិទបើកតាមទំនើងចិត្តនោះទេ ហើយកម្ពុជាយល់អំពីការលំបាករបស់ប្រជាពលរដ្ឋ ប៉ុន្ដែកម្ពុជាមានសិទ្ធិក្នុងការឆ្លើយតបចំពោះការគំរាមកំហែងរបស់ក្រុមយោធាថៃ ។
កម្ពុជាបញ្ជាក់ជំហរច្បាស់ គឺនៅពេលថៃបើកទាំងអស់ឲ្យវិលមករកប្រក្រតីភាពវិញ កម្ពុជានឹងអនុវត្តតាមក្រោយ ។ កម្ពុជាចង់បានដំណោះស្រាយមួយច្បាស់លាស់ មាននិរន្ដរភាព ហើយបញ្ឈប់ការប្រើប្រាស់វិធានបិទច្រកព្រំដែនជាឯកតោភាគីរបស់ថៃ មកធ្វើជាល្បែង ឬធ្វើជាលក្ខខណ្ឌនៃជីវភាពប្រជាជន ដើម្បីដោះស្រាយបញ្ហាវិវាទព្រំដែននោះទេ ។
សម្ដេចមហាបវរធិបតី ប្រមុខរាជរដ្ឋាភិបាលកម្ពុជាបានអះអាងថា ការជជែកលើការកែសម្រួលកងទ័ពអាចធ្វើទៅបាន ត្រូវបើកច្រកព្រំដែនឲ្យដូចដើមវិញជាមុនសិន ហើយកម្ពុជាមិនមែនជាអ្នកបង្កបញ្ហានោះឡើយ ។ ដូច្នេះកូនសោដោះស្រាយបញ្ហា គឺស្ថិតនៅលើដៃរបស់ថៃ ។ សម្តេចធិបតី ហ៊ុន ម៉ាណែត ក៏បានសង្កត់ធ្ងន់ថា កម្ពុជារក្សាសិទ្ធិប្រើប្រាស់គ្រប់មធ្យោបាយ ក្នុងការការពារបូរណភាពទឹកដី ៕
ចែករំលែកព័តមាននេះ