ខេត្តក្រចេះ ៖ បើគេនិយាយអំពីរ៉ែថ្មម៉ាប ជាប្រភេទធនធានរ៉ែដ៏កម្រ ដែលមានសក្តានុពលនិងតម្លៃខ្ពស់គួរសម សមស្រប ក្នុងការផលិតនាំចេញទៅប្រទេសវៀតណាម រហូតទៅដល់ពិភពលោក និងតម្រូវការក្នុងស្រុក។ ប្រភពរ៉ែថ្មម៉ាបដែលកំពុងដំណើរការ…
ខេត្តក្រចេះ ៖ បើគេនិយាយអំពីរ៉ែថ្មម៉ាប ជាប្រភេទធនធានរ៉ែដ៏កម្រ ដែលមានសក្តានុពលនិងតម្លៃខ្ពស់គួរសម សមស្រប ក្នុងការផលិតនាំចេញទៅប្រទេសវៀតណាម រហូតទៅដល់ពិភពលោក និងតម្រូវការក្នុងស្រុក។
ប្រភពរ៉ែថ្មម៉ាបដែលកំពុងដំណើរការ អារកាត់យក បច្ចុប្បន្នមានដូចជា៖ ស្រុកអូរគ្រៀងសែនជ័យ (អូរត្រូន ឃុំក្បាលដំរី)ស្រុកស្នួល (ភ្នំព្រិច ឃុំស្វាយជ្រះ)និងស្រុកសំបូរ(ឃុំកំពង់ចាម)។
ទាក់ទិនទៅនឹងផលិតផលមិនទាន់សម្រេច(ថ្មដុំ) គេពុំបានដឹងថា ថ្មទាំងនោះត្រូវដឹកជញ្ជូនបែងចែកទៅខាងណា មកខាងណានោះទេ ។ តែគេបានត្រឹមដឹងថា ក្រោយការអារកាត់ពីភ្នំនាំចេញពីការដ្ឋានរបស់ក្រុមហ៊ុន ថ្ម១ដុំៗទម្ងន់ជិត១០តោន ដឹកតាមរថយន្តធុនធំខ្លះឆ្ពោះ ទៅកាន់ទីតាំងស្តុកចំនួន២កន្លែងក្នុងរោងចក្រភ្នំព្រិច និងរោងចក្រត្រពាំងស្រែតំបន់សេដ្ឋ កិច្ចពិសេស ជាប់ព្រំដែនប្រទេសវៀតណាម ហើយក៏ជិតនឹងច្រកទ្វារអន្តរជាតិត្រពាំងស្រែផងដែរ។
ប្រភពឱ្យដឹងថាក្នុងការដ្ឋានក្រុម ហ៊ុនថ្មម៉ាបនីមួយៗមានទំហំធំល្វឹងល្វើយ រណ្ដៅការដ្ឋានទាំងនោះប្រៀបដូចទីលានវាយកូនហ្គោល ឬមើលទៅរាបដូចសមុទ្រខ្សាច់ ជាមួយគ្រឿងចក្ររាប់សិបគ្រឿងផងដែរ។
លោក ឈា ផល្លី អភិបាលស្រុកអូររៀងសែនជ័យអាយដឹងថា ខ្ញុំដឹងដែរ គ្រាន់តែដឹងថាគេមានកន្លែងធ្វើនៅភ្នំព្រិចក្នុងស្រុកស្នួល ។ លោកថា ពាក់ព័ន្ធការដឹកទៅណាទៀតយើងមិនអាចគ្រប់គ្រងបានទេ យើងដឹងត្រឹមតែស្រុកយើង ។ ហើយពាក់ព័ន្ធនៅក្នុងការនាំចេញ លោកថា ចង់ដឹងទាល់តែសួរទៅខាងមន្ទីរជំនាញ ព្រោះអាហ្នឹងមន្ទីរជំនាញ គេអ្នកគ្រប់គ្រងព្រោះសួយសារអីៗគេបង់ទៅតាមមន្ទីរជំនាញ។
ចំណែកប្រធានមន្ទីរ៉ែនិងថាមពលខេត្តក្រចេះ លោក រ័ត្ន តុលា បានចូលមើលសារក្នុងប្រព័ន្ធតេឡេក្រាម ដែលកោះសន្តិភាពសុំការបំភ្លឺចំណុចខ្លះៗ ព្រោះលោកជាម្ចាស់រ៉ែ តែលោកមិនបានខ្វាយខ្វល់នឹងសំណួរអ្វីទាំងអស់ បើទោះបីជាកោះសន្តិភាពបានដាក់សំណួរសួរទៅលោកកាលពីថ្ងៃទី៧ កក្កដា២០២៥ រហូតទល់បច្ចុប្បន្ន។
រីឯអភិបាលស្រុកស្នួលលោក សាម ណាល់ បានឲ្យដឹងថា ក្រុមហ៊ុនគេកាល ណាគេតម្រូវទៅខេត្តព្រះសីហនុគេមានដឹកទៅខាងខេត្តព្រះសីហនុ បើសិនភ្ញៀវគេត្រូវការទៅខាងវៀតណាមគេដឹកទៅតាមច្រកអន្តរជាតិត្រពាំងស្រែវៀតណាម ។ ឯខាងផលិតនាំចេញទាល់តែសួរខាងគយ ។ លោកថា រោងចក្រកាលពីមុនដូចជាមិនទាន់កែច្នៃជាថ្មសន្លឹកអីទេ… ក្រោយមកទើបមានថ្មសន្លឹកនៅឆ្នាំ២០១២-២០១៣ ។ លោកថា សម្រាប់ផលិតផលមិនទាន់សម្រេចលោកដឹងតែខាងស្រុកស្នួលទេគឺនៅខាងស្វាយជ្រះ ក្រៅពីហ្នឹងមិនដឹងទេឃើញតែគេដឹកទៅដឹកមក។
ទាក់ទិនករណីការនាំចេញផលិតផលថ្មម៉ាបកោះសន្តិភាពបានទំនាក់ ទំនងទៅប្រធានច្រកទ្វារអន្តរជាតិត្រពាំងស្រែ លោក លាង មេងគីម ពុំបានឆ្លើយអ្វីនោះទេ ។ ដោយបង្វែរសំណួរ សុំឲ្យដាក់សំណើសុំរបាយការណ៍ពាក់ព័ន្ធការនាំចេញទៅរដ្ឋបាលខេត្ត។ លោក ម៉ែន វណ្ណា នាយករដ្ឋបាល សាលាខេត្តក្រចេះបានប្រាប់កោះសន្តិភាព នាព្រឹកថ្ងៃទី១៤ កក្កដា ឆ្នាំ២០២៥ នេះថា ពាក់ព័ន្ធទៅនឹងរបាយការណ៍ នាំចេញរ៉ែថ្មម៉ាបបែបណានោះ លោកអត់មានទេ តែបើខាងគយ និងមន្ទីររ៉ែ អាចមាន ។
បញ្ហារ៉ែថ្មម៉ាបរបស់ខ្មែរយើង ត្រូវគេដឹងត្រួសៗថា មានក្រុមហ៊ុនច្រើនណាស់ ជាពិសេសក្រុមហ៊ុនចិន និងវៀតណាម ។
អ្នកខេត្តក្រចេះនិយាយថា ថ្មម៉ាបរបស់ខ្មែរត្រូវក្រុមហ៊ុនជាច្រើន មានខ្មែរឈរឈ្មោះឱ្យវៀតណាម អារច្រៀក ដឹកជញ្ជូនទៅវៀតណាមយូរឆ្នាំហើយ ដោយរលូន ។
ឆ្នាំនេះដែលមានថ្មម៉ាបក្លាយជាវាលរាបដូចសមុទ្រទៅហើយ…មិនដឹងថា ស្របច្បាប់ដែរឬអត់ទេ ។
បានទំនាក់ទំនងសុំការបំភ្លឺពីមន្ទីររ៉ែ និងថាមពលខេត្តដែរ តែគ្មានចម្លើយសោះ ហាក់ដូចជាមានអាថ៌កំបាំងពេកក្រៃ ។
ក្រុមហ៊ុនបានដឹកថ្មម៉ាបឆ្ពោះទៅវៀតណាមយ៉ាងតិច១០ឆ្នាំជាងមកហើយ គឺកាត់ថ្មជាផ្ទាំងធំៗដូចទូកុងតឺន័រដឹកឆ្ពោះទៅវៀតណាមយ៉ាងត្រជាក់ពង ដែលមានខ្មែរឈរឈ្មោះឱ្យថៅកែវៀតណាមដែលមិនអាចស្វែងរកឈ្មោះបានឡើយ ។
ព័ត៌មានបន្ថែមនឹងមានផ្សាយបន្តទៀតនៅលើកាសែតកោះសន្តិភាព ៕
ចែករំលែកព័តមាននេះ