តាមការអង្កេតមួយដែលធ្វើឡើងដោយអង្គការទស្សនៈពិភពលោកប្រចាំកម្ពុជា ដែលបានធ្វើនៅតាមជំរុំជនភៀសសឹកចំនួន៤៣កន្លែង ពោល គឺក្នុងខេត្តព្រះវិហារ៧កន្លែង, បន្ទាយមានជ័យ១៥កន្លែង, និងសៀមរាប២១កន្លែង បានរកឃើញថា ជិតពីរភាគបី ឬប្រហែល ៦៦%នៃគ្រួសារជនភៀសសឹកនៅកម្ពុជាកំពុងរងការប៉ះពាល់ចិត្តយ៉ាងធ្ងន់ធ្ងរ…
តាមការអង្កេតមួយដែលធ្វើឡើងដោយអង្គការទស្សនៈពិភពលោកប្រចាំកម្ពុជា ដែលបានធ្វើនៅតាមជំរុំជនភៀសសឹកចំនួន៤៣កន្លែង ពោល គឺក្នុងខេត្តព្រះវិហារ៧កន្លែង, បន្ទាយមានជ័យ១៥កន្លែង, និងសៀមរាប២១កន្លែង បានរកឃើញថា ជិតពីរភាគបី ឬប្រហែល ៦៦%នៃគ្រួសារជនភៀសសឹកនៅកម្ពុជាកំពុងរងការប៉ះពាល់ចិត្តយ៉ាងធ្ងន់ធ្ងរ ដោយសារជម្លោះនៅតាមបណ្តោយព្រំដែន ។
បទពិសោធន៍ប៉ះពាល់ផ្លូវចិត្តទាំងនោះ រួមមានការជម្លៀសចេញពីផ្ទះសម្បែង បានឃើញផ្ទាល់ហេតុការណ៍នៃការផ្ទុះគ្រាប់បែក និងការបាញ់ប្រហារ ក៏ដូចជា ការបាត់បង់សមាជិកគ្រួសារ ។
អង្គការទស្សន:ពិភពលោកប្រចាំកម្ពុជាបានបង្ហាញថា ទោះបីជាជាងពាក់កណ្តាល ពោល គឺ៥៦ភាគរយនៃមនុស្សពេញវ័យមានអារម្មណ៍កក់ក្តៅ និងមានសុវត្ថិភាព នៅក្នុងជំរំភៀសសឹកក៏ដោយ ប៉ុន្តែភាគច្រើននៅតែមានអារម្មណ៍នឹកផ្ទះ និងព្រួយបារម្ភអំពីសមាជិកគ្រួសារ និងបញ្ហាហិរញ្ញវត្ថុ ។
កុមារបានបង្ហាញអារម្មណ៍លាយឡំគ្នា ដោយក្នុងនោះ៤២ភាគរយ មានអារម្មណ៍សប្បាយរីករាយ និងមានសុវត្ថិភាព ប៉ុន្តែ៥៨% មានអារម្មណ៍ភ័យខ្លាចពីការប៉ះពាល់នៃការផ្ទុះអាវុធ ការផ្ទុះគ្រាប់បែក និងការជម្លៀសចេញពីផ្ទះសម្បែង ។
ការប៉ះទង្គិចផ្លូវចិត្តមានការរីករាលដាលយ៉ាងខ្លាំង ដោយអ្នកដែលត្រូវបានសម្ភាសបានរៀបរាប់ពីអាការៈមួយចំនួន ដូចជាភ័យខ្លាច ខឹង ពិបាកគេង បាត់បង់ចំណង់អាហារ មានអារម្មណ៍ព្រួយបារម្ភ និងពិបាកផ្ចង់អារម្មណ៍ ។
កុមារបានបញ្ជាក់ថា ការអប់រំ និងសម្ភារៈលេង គឺជាការចាំបាច់បំផុតខណៈដែលមនុស្សពេញវ័យបានផ្តល់អាទិភាពលើអង្ករ គ្រឿងផ្សំសម្រាប់ចម្អិនអាហារ តង់ និងសម្ភារៈចាំបាច់ផ្សេងទៀតដូចជា សាប៊ូ កម្រាលគេង និងការស្វែងរកជំនួយផ្នែកវេជ្ជសាស្ត្រ ៕
ចែករំលែកព័តមាននេះ