ខេត្តឧត្តរមានជ័យ ៖ កៅស៊ូតង់ចំនួន១៥០ ដែលជាអំណោយរបស់ឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្តេចធិបតីនាយករដ្ឋមន្ត្រី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត បាននាំយកទៅចែកជូនដល់កងកម្លាំងជួរមុខនៅពេលរដូវភ្លៀងធ្លាក់នេះ…
ខេត្តឧត្តរមានជ័យ ៖ កៅស៊ូតង់ចំនួន១៥០ ដែលជាអំណោយរបស់ឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្តេចធិបតីនាយករដ្ឋមន្ត្រី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត បាននាំយកទៅចែកជូនដល់កងកម្លាំងជួរមុខនៅពេលរដូវភ្លៀងធ្លាក់នេះ ។
ការចែកជូននេះ បានធ្វើឡើងកាលពីរសៀលថ្ងៃ១២ ខែសីហា ឆ្នាំ២០២៥កន្លងទៅ នៅចំណុចរង្វង់មូលច្រកជប់គគីរ ស្ថិតក្នុងស្រុកបន្ទាយអំពិល ។លោក សេង រាជសី ថ្លែងថា អំណោយកៅស៊ូតង់ចំនួន១៥០ មួយៗមានទំហំ៣ម៉ែត្រគុណ៤ម៉ែត្រ គឺជាអំណោយរបស់ឯកឧត្តម ប៉ាន់ខែមប៊ុនថន រួមជាមួយលោក យ៉ា គឹមហ៊ុយ លោក ឌឹម សំបូរ និងក្រុមគ្រួសារ នាំយកមកចែកជូនដល់កងកម្លាំងជួរមុខទិសទី៣ នៅជួរភ្នំដងរែក ក្នុងភូមិសាស្ត្រច្រកជប់គគីរ ប្រាសាទតាក្របី និងប្រាសាទតាមាន់ធំ ។លោកបន្តថា នេះជាលើទី២ហើយដែលឯកឧត្តម ប៉ាន់ខែម ប៊ុនថន ឱ្យក្រុមការងារនាំយកអំណោយមានកៅស៊ូតង់ជិត ១ ០០០ ចែកជូនដល់កងកម្លាំងជួរមុខ សម្រាប់រដូវវស្សាដែលមានភ្លៀងធ្លាក់ជោកជាំជួបការលំបាក ។
លោកវរសេនីយ៍ឯក តូ ថន មេបញ្ជាការរងកងពលតូចអន្តរាគមន៍លេខ២ និងជាមេបញ្ជាការទិសទី៣ បានថ្លែងអំណរគុណឯកឧត្តម ប៉ាន់ខែម ប៊ុនថន និងក្រុមការងារដែលបាននាំយកកៅស៊ូតង់ចំនួន១៥០ មកផ្ដល់ជូនកងកម្លាំងជួរមុខឈរជើងនៅជួរភ្នំដងរែក តាមបន្ទាត់ព្រំដែនក្នុងភូមិសាស្ត្រច្រកជប់គគីរ ប្រាសាទតាក្របី និងប្រាសាទតាមាន់ធំ ដែលជាតំបន់ក្ដៅក្នុងការប្រឈមមុខការពារបូរណភាពទឹកដី និងមាតុភូមិកម្ពុជាទល់នឹងកងទ័ពសៀមឈ្លានពាន ។
ក្នុងឱកាសនោះ លោក ម៉ុង ចន្នី ក្រុមការងារបានជូនទូរស័ព្ទ១គ្រឿងតម្លៃជាង៤០ម៉ឺនរៀល ជូនកងកម្លាំង១រូបនៅជួរមុខ ដែលបែកទូរស័ព្ទគ្មានអ្វីប្រើ និងកងកម្លាំង៥រូបដែលមកទទួលកៅស៊ូតង់ ម្នាក់ៗទទួលបាន១០ម៉ឺនរៀល ៕
ចែករំលែកព័តមាននេះ