ខេត្តបាត់ដំបង ៖ អ្នកបើកត្រាក់ទ័រម្នាក់បានស្លាប់ ពេលបញ្ជូនដល់មន្ទីរពេទ្យ ក្រោយពីបើកត្រាក់ទ័រភ្ជួរដីចម្ការកិនប៉ះចំគ្រាប់មីនតោន ដែលសេសសល់ពីសម័យសង្គ្រាម បណ្ដាលឲ្យផ្ទុះ កាលពីល្ងាចថ្ងៃទី១៣ កក្កដា ស្ថិតនៅចំណុច…
ខេត្តបាត់ដំបង ៖ អ្នកបើកត្រាក់ទ័រម្នាក់បានស្លាប់ ពេលបញ្ជូនដល់មន្ទីរពេទ្យ ក្រោយពីបើកត្រាក់ទ័រភ្ជួរដីចម្ការកិនប៉ះចំគ្រាប់មីនតោន ដែលសេសសល់ពីសម័យសង្គ្រាម បណ្ដាលឲ្យផ្ទុះ កាលពីល្ងាចថ្ងៃទី១៣ កក្កដា ស្ថិតនៅចំណុច ភូមិរស្មីសង្ហារ ឃុំរស្មីសង្ហារ ស្រុករតនមណ្ឌល ។
មន្ត្រីមូលរដ្ឋានបានរាយការណ៍ថា ជនរងគ្រោះឈ្មោះ ផុន សុភី ភេទប្រុស អាយុ៣៦ឆ្នាំ ។ ជនរងគ្រោះបានបើកត្រាក់ទ័រភ្ជួរដីចម្ការត្រង់ចំណុចខាងលើ ដែលជាដីចម្ការធ្លាប់អាស្រ័យផលរាល់ឆ្នាំ តែអកុសល្យពេលបើកត្រាក់ទ័រចុះភ្ជួរឆ្នាំនេះ បែរជាកិនប៉ះចំលើគ្រាប់មីនតោននៅក្បែរមាត់អូរ បណ្ដាលឲ្យផ្ទុះកក្រើក ។
សេចក្ដដីរាយការណ៍ដដែលបានបញ្ជាក់ថា ពេលកើតហេតុភ្លាម ជនរងគ្រោះរងបួសធ្ងន់ ដាច់ជើងខាងស្ដាំ តែគាត់បានស្លាប់ពេលបញ្ជូនដល់មន្ទីរ រីឯត្រាក់ទ័រខូចខាតស្ទើរទាំងស្រុងតែម្ដង ។ នាយប៉ុស្ដិ៍នគរបាលរស្មីសង្ហារ លោក អ៊ី រក្សស្ម័គ្រ បានប្រាប់ដែរថា ជនរងគ្រោះ(អ្នកបើកត្រាក់ទ័រ)បានជួលដីចម្ការនោះពីគេធ្វើខ្លួនឯង ។ លោកថា ដីចម្ការនោះមានដំណាំច្រើនរួចស្រេចទៅហើយដែលម្ចាស់តែងធ្វើរាល់ឆ្នាំ ។ ប៉ុន្តែឆ្នាំនេះ បានជួលឲ្យជនរងគ្រោះ លុះជនរងគ្រោះបើកត្រាក់ទ័រចុះភ្ជួរ ក៏ស្រាប់តែជួបរឿងអកុសល្យកិនប៉ះចំគ្រាប់មីនតោននៅក្បែរមាត់អូរបណ្ដាលផ្ទុះរបួសឲ្យគ្រោះថ្នាក់ តែគាត់បានស្លាប់ពេលបញ្ជូនដល់មន្ទីរ ។
លោកនាយប៉ុស្ដិ៍ដដែលបានបញ្ជាក់ដែរថា គ្រាប់មីនតោននោះសេសសល់ពីសម័យសង្គ្រាម ដែលគេដាក់ក្បែរមាត់អូរ ស្របពេលប៉ុន្មានថ្ងៃនេះ ភ្លៀងខ្លាំងជាប់ៗគ្នា ទើបពេលត្រាក់ទ័រចុះភ្ជួរស្លុះជ្រៅកិនដល់គ្រាប់មីន បណ្ដាលឲ្យផ្ទុះគ្រោះថ្នាក់តែម្ដង ។ តាមពិត ដីចម្ការខាងលើនេះ ម្ចាស់តែងធ្វើរាល់ឆ្នាំ តែអកុសល្យពេលជនរងគ្រោះជួលធ្វើឆ្នាំនេះជួបគ្រោះថ្នាក់តែម្ដង ៕
ចែករំលែកព័តមាននេះ