ខេត្តបាត់ដំបង ៖ នារសៀលថ្ងៃទី១១ តុលា នៅតាមដងស្ទឹងសង្កែបានរៀបចំការប្រណាំងទូកដើម្បីអបអរសាទរថ្ងៃចេញព្រះវស្សា និងដើម្បីទៅចូលរួមប្រកួតនៅរាជធានីភ្នំេពញនាពេលខាងមុខក្រោមអធិបតីភាព លោកប្រាជ្ញ ចន្ទ អភិបាលខេត្ត លោករស់ រេន រដ្ឋលេខាធិការក្រសួងទេសចរណ៍ លោកអ៊ុក វង្ស ប្រធានក្រុមប្រឹក្សាខេត្ត អស់លោកអភិបាលរងខេត្ត សមាជិកក្រុមប្រឹក្សាខេត្ត មន្ត្រីរាជការ មន្ទីរស្ថាប័ននានាជុំវិញខេត្ត កងកម្លាំងប្រដាប់អាវុធទាំង៣ប្រភេទ កីឡាករ និងកីឡាការិនី ព្រមទាំងប្រជាពលរដ្ឋយ៉ាងច្រើនកុះករ។
លោកអ៊ុយ រី ប្រធានគណៈកម្មការរៀបចំបុណ្យអុំទូកខេត្តមានប្រសាសន៍ថា ការប្រណាំងទូកនេះធ្វើឡើងក្នុងរយៈ២ថ្ងៃគឺចាប់ពីថ្ងៃទី១១និង១២ តុលា ២០១១ ហើយឆ្នាំនេះគឺជាឆ្នាំទី១៣ ដែលគណៈកម្មាធិការរៀបចំបុណ្យជាតិ អន្តរជាតិខេត្តបានចាត់ចែងរៀបចំឱ្យមានកម្មវិធីប្រណាំងទូកនេះឡើងដើម្បីរំលឹកពីវីរភាពដ៏អង់អាចក្លាហានរបស់កងទ័ពជើងទឹក បង្ហាញពីការសាមគ្គីភាពរបស់ប្រជាពលរដ្ឋក្នុងខេត្តឱ្យកាន់តែមានស្មារតីផុសផុលចូលរួមចំណែកលើកស្ទួយរក្សាប្រពៃណីរបស់ខ្មែរយើងតាំងពីបុរាណមក និងដើម្បីប្រកួតជ្រើសរើសទូកដែលជាប់ចំណាត់ថ្នាក់ទៅចូលរួមប្រកួតនៅរាជធានីភ្នំពេញ។
លោកបន្តទៀតថា ក្នុងការរៀបចំប្រណាំងទូកនៅឆ្នាំនេះ គណៈកម្មការរៀបចំការប្រណាំងទូកខេត្តបានទទួលពាក្យសុំចុះឈ្មោះចូលរួមប្រណាំងមានចំនួនសរុប២១ទូក កើនឡើងជាងឆ្នាំមុន៤ទូក ដោយមានទូកថ្មីចូលរួមប្រកួតចំនួន៤ទូក(ទូកខ្លី៣គ្រឿង និងទូកវែង១គ្រឿង)។ អំពីកីឡាករ និងកីឡាការិនីសរុបចំនួន៩៦១នាក់ ក្នុងនោះមានកីឡាការិនីចំនួន១២០នាក់ ហើយពេញសិទ្ធិ៧១៥នាក់ នារី៨៨នាក់ និងកីឡាករបំរុង២៤៦នាក់ នារី៣២នាក់។
ចំពោះទូកខ្នាតខ្លីឆ្នាំនេះចែកចេញជា៣ប្រភេទគឺ ទូកខ្នាតអន្តរជាតិផ្នែកបុរសចំណុះ២២នាក់ មានចំនួន៦ទូក កីឡាករសរុប១៨០ ក្នុងនោះបំរុង៤៨នាក់ ។ ទូកខ្លីប្រពៃណីផ្នែកបុរសចំណុះ២២នាក់ កីឡាករសរុប១៨០នាក់ ក្នុងនោះបំរុង៤៨នាក់។ ទូកខ្នាតអន្តរជាតិផ្នែកនារីចំណុះ២២នាក់ មានចំនួន៤ទូក កីឡាការិនី១២០នាក់ ក្នុងនោះបំរុង៣២នាក់។ ចំណែកឯទូកខ្នាតវែង ទូក.ងចំណុះ៤៩នាក់ដល់៦៩នាក់មានចំនួន៥ទូក កីឡាករ៤៨១នាក់ ក្នុងនោះបំរុង១១៨នាក់។ ក្នុងឱកាសនោះលោកប្រាជ្ញ ចន្ទ បានប្រកាសបើកការប្រណាំងទូកក្នុងរយៈពេល២ថ្ងៃហើយជូនពរកីឡាករ កីឡាការិនីឱ្យទទួលបានជ័យលាភី ចំណាត់ថ្នាក់ល្អដើម្បីទៅប្រកួតនៅរាជធានីភ្នំពេញនិងក្រៅប្រទេស ៕
ចែករំលែកព័តមាននេះ