រាជធានីភ្នំពេញ ៖ ភាពមន្ទិលជុំវិញលទ្ធផលការប្រកួតដណ្ដើមខ្សែក្រវាត់រវាងកីឡាករ អេអាំ ម៉ារីន ភូថង ជាមួយកីឡាជនជាតិអង់គ្លេសម៉ូអាប់ ដារ៉ាម៉ាន់ នៅស្រុកគីរីសាគរ ខេត្តកោះកុងកាលពីថ្ងៃទី២៨…
រាជធានីភ្នំពេញ ៖ ភាពមន្ទិលជុំវិញលទ្ធផលការប្រកួតដណ្ដើមខ្សែក្រវាត់រវាងកីឡាករ អេអាំ ម៉ារីន ភូថង ជាមួយកីឡាជនជាតិអង់គ្លេសម៉ូអាប់ ដារ៉ាម៉ាន់ នៅស្រុកគីរីសាគរ ខេត្តកោះកុងកាលពីថ្ងៃទី២៨ ខែវិច្ឆិកា ឆ្នាំ២០២៥ ត្រូវបានសហព័ន្ធកីឡាប្រដាល់គុនខ្មែរបើកកិច្ចប្រជុំដោះស្រាយរួចរាល់អស់ហើយកាលពីថ្ងៃទី១ខែធ្នូ ឆ្នាំ២០២៥។
ការប្រជុំរកដំណោះស្រាយកើតឡើងក្រោយពីមានការរិះគន់ដូចព្យុះពីសំណាក់អ្នកនិយមតាមដានការប្រកួតកីឡាប្រដាល់គុនខ្មែរ។ ជាមួយគ្នានេះ កីឡាករអង់គ្លេសម៉ូអាប់ ដារ៉ាម៉ាន់ ដែលចាញ់មិនអស់ចិត្តបានលើកឡើងថា ការប្រកួតពេញ៥ទឹកអេ អាំម៉ារីន មិនបានវាយគាត់ទេ គិតតែពីដើរថយក្រោយហេតុអីបានឱ្យឈ្នះ។
ដូច្នេះគាត់លែងចង់ប្រកួតជាមួយអេ អាំម៉ារីនទៀតហើយគឺចង់ប្រកួតជាមួយលន បញ្ញាវិញម្ដង។
ឆ្លើយតបនឹងការរិះគន់នេះ ឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរក៏មិនបាននៅស្ងៀមដែរ ដោយឯកឧត្តមសន្យាថា នឹងសើរើលទ្ធផលប្រកួតឡើងវិញជាបន្ទាន់។ ឯកឧត្តមបានសរសេរសារបង្ហោះភ្លាមៗថា«ខ្ញុំនឹងសម្រេចដឹកនាំកិច្ចប្រជុំត្រួតពិនិត្យលទ្ធផលឡើងវិញ នៃការប្រកួតរវាងកីឡាករអេ អាំម៉ារីនភូថង ជាមួយកីឡាករម៉ូអាប់ ដារ៉ាម៉ាន់នៅថ្ងៃចន្ទទោះបីពុំមានពាក្យបណ្ដឹងពីភាគីអ្នកចាញ់ក៏ដោយ ។ បើពិនិត្យឃើញថា ចៅក្រមដែលដាក់ពិន្ទុមិនត្រឹមត្រូវតាមបទបញ្ជាបច្ចេកទេសនឹងទទួលរងការដាក់ពិន័យយ៉ាងតឹងរឹុងបំផុត»។
នៅក្នុងកិច្ចប្រជុំត្រូតពិនិត្យវីដេអូប្រកួតឡើងវិញកាលពីថ្ងៃចន្ទកន្លងទៅនេះ ឯកឧត្តមខូវ ឆាយ បានអញ្ជើញភាគីពាក់ព័ន្ធទាំងអស់ឱ្យចូលរួមទាំងភាគីកីឡាករបរទេសមានដូចជាគ្រូបង្វឹក កីឡាករ និងអ្នកថតរូបថែមទៀត ដើម្បីពិនិត្យមើលការប្រកួតឡើងវិញម្ដងទៀត។
ក្រោយពីចំណាយពេលត្រួតពិនិត្យមើលការប្រកួតឡើងវិញអស់មួយព្រឹកពេញ ចំពោះលទ្ធផលបច្ចេកទេសគឺប្រហាក់ប្រហែលគ្នា ។ ដូច្នេះអេ អាំម៉ារីនភូថង នៅរក្សាតំណែងជាម្ចាស់ខ្សែ
ក្រវាត់ដដែល ។
ជុំវិញការរក្សាលទ្ធផលដដែល ឯកឧត្តមប្រធានសហព័ន្ធបានពន្យល់ថា ការប្រកួតដណ្ដើមខ្សែ
ក្រវាត់ បើការប្រកួតនោះមានលក្ខណៈប្រហាក់ប្រហែល យើងមិនអាចឱ្យអ្នកមកដណ្ដើមឈ្នះបាននោះទេ តែបើការប្រកួតមិត្តភាពយើងអាចឱ្យស្នើបាន។ ឯកឧត្តមបានលើកឡើងទៀតថាការប្រកួតនេះមានការវែកញែកច្រើនពីមហាជនដោយមើលឃើញថា អេ អាំម៉ារីនភូថង ថយខ្លាំងពេក ថយដល់ថ្នាក់ប្រហាក់ប្រហែលនឹងរត់ដែរ ។
ឯកឧត្តមថា ការថយបែបនេះគឺអត់ល្អមើលទាល់តែសោះ។ បើតាមការពិនិត្យជាក់ស្ដែងសម្រាប់ការប្រកួត២ទឹកដំបូង អេអាំម៉ារីនភូថង វាយចេញបានច្រើន ជាពិសេសការប្រើស្នៀតជង្គង់នៅក្នុងទឹកទី២គឺចំគោលដៅល្អ។ នៅក្នុងទឹកទី៣និងទឹកទី៥ កីឡាករអង់គ្លេសវាយចូលបានច្រើនសងវិញ។ ប៉ុន្តែនៅក្នុងទឹកទី៤មានការប្រទាញប្រទង់គ្នាបន្តិច ។ ដូច្នេះចប់ការប្រកួត៥ទឹកពេញ ចៅក្រម៥រូបមាន៣រូបសម្រេចឱ្យអេ អាំម៉ារីនភូថងជាអ្នកឈ្នះ ក្នុងពេលចៅក្រម២រូបទៀតឱ្យកីឡាករអង់គ្លេសជាអ្នកឈ្នះ។
ឯកឧត្តមបានបញ្ជាក់ថា ទោះបីលទ្ធផលមានភាពប្រហាក់ប្រហែលគ្នា ក៏យើងមិនអាចឱ្យអ្នកមកដណ្ដើមឈ្នះបានទេ ព្រោះការប្រកួតដណ្ដើមខ្សែក្រវាត់ទាល់តែអ្នកមកដណ្ដើមឈ្នះដាច់ទាំង៥ទឹកទើបបាន៕
ចែករំលែកព័តមាននេះ