រាជធានីភ្នំពេញ ៖ អំណោយសង្គ្រោះបន្ទាន់របស់អង្គការ Muslime Helfen នៃប្រទេសអាល្លឺម៉ង់ ត្រូវបានសមាគមនិស្សិតមូស្លីមកម្ពុជានាំយកទៅចែកជូនដល់ប្រជាពលរដ្ឋរងគ្រោះដោយទឹកជំនន់ទឹកភ្លៀងចំនួន៨៧២គ្រួសារ នៅក្នុងខេត្តកំពង់ធំ ។ ពិធីចែកអំណោយនេះបានរៀបចំឡើងកាលពីវេលារសៀលថ្ងៃទី៧ ខែតុលា នៅក្នុងវិហារអ៊ិស្លាមមួយកន្លែង ស្ថិតនៅភូមិត្រពាំងឈូក ឃុំបឹងស្រុកបារាយណ៍ ខេត្តកំពង់ធំ ក្រោមអធិបតីភាពលោកវេជ្ជបណ្ឌិតសុះ មុះសិន រដ្ឋលេខាធិការក្រសួងធម្មការ និងសាសនា ប្រធានសមាគមនិស្សិតមូស្លីមកម្ពុជា និងជាអនុប្រធានអង្គការមូលនិធិអភិវឌ្ឍន៍មូស្លីមកម្ពុជា ។ នៅក្នុងឱកាសនោះដែរមានការអញ្ជើញចូលរួមពីសំណាក់លោកសាន់ សាប់អ៊ី អនុរដ្ឋលេខាធិការក្រសួងសុខាភិបាល និងជាអនុប្រធានសមាគមនិស្សិតមូស្លីមកម្ពុជា លោកម៉ាន សុគ្រី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាអគ្គលេខាធិការសមាគម លោកពាស់ មូស្លីម អនុប្រធានសមាគមនិស្សិតមូស្លីមកម្ពុជា និងលោកឈុន ឈន់ អភិបាលរងខេត្តកំពង់ធំ ព្រមទាំងមន្ត្រីរាជការ អាជ្ញាធរមូលដ្ឋាន និងប្រជាពលរដ្ឋរងគ្រោះយ៉ាងច្រើនកុះករ ។
លោកឈុន ឈន់ អភិបាលរងខេត្តកំពង់ធំ បានឱ្យដឹងថា ខេត្តកំពង់ធំបានរងគ្រោះយ៉ាងធ្ងន់ធ្ងរដោយគ្រោះទឹកជំនន់ទឹកភ្លៀង និងទឹកទន្លេសាប ដែលមានប្រជាពលរដ្ឋចំនួន២២.០០០គ្រួសារត្រូវរងគ្រោះ ផលដំណាំរាប់ម៉ឺនហិកតា បានរងការខូចខាត រួមជាមួយហេដ្ឋារចនាសម្ព័ន្ធ ផ្លូវថ្នល់ សាលារៀន មន្ទីរពេទ្យ និងមានប្រជាពលរដ្ឋចំនួន៣៩នាក់បានស្លាប់បាត់បង់ជីវិត។
លោកឈុន ឈន់ បានបន្តទៀតថា ដោយសារមានការគិតគូរពីរាជរដ្ឋាភិបាលកម្ពុជា និងកាកបាទក្រហមកម្ពុជា បាននាំអំណោយចុះទៅចែកជូនប្រជាពលរដ្ឋរងគ្រោះជាបន្តបន្ទាប់ចំនួន៥.០០០គ្រួសារ នៅសល់១៧.០០០គ្រួសាទៀត នឹងចុះចែកជូនបន្តទៀត ។
លោកវេជ្ជបណ្ឌិតសុះ មុះសិន បានឱ្យដឹងថា ដោយមើលឃើញការលំបាករបស់បងប្អូនប្រជាពលរដ្ឋរងគ្រោះដោយទឹកជំនន់ទន្លេសាប ទន្លេមេគង្គ និងទឹកភ្លៀង ក្នុងនាមសមាគមនិស្សិតមូស្លីមកម្ពុជា លោកបានស្នើសុំទៅអង្គការMuslime Helfen នៃប្រទេសអាល្លឺម៉ង់ នាំអំណោយសម្រាប់សង្គ្រោះបន្ទាន់ចែកជូនដល់ប្រជាពលរដ្ឋរងគ្រោះដោយទឹកជំនន់ចំនួន៤ ខេត្ត រាជធានី ខេត្តកំពង់ធំ កំពង់ចាម និងខេត្តព្រៃវែង ដែលសរុបទាំងអស់ចំនួន២.២៧៦គ្រួសារ។ ដោយឡែក សម្រាប់ខេត្តកំពង់ធំចំនួន៨៧២គ្រួសារនាំមកចែកជូននៅពេលនេះ ។ លោកវេជ្ជបណ្ឌិតសុះ មុះសិន បានបន្តទៀតថា ក្នុងនាមរូបលោកជាប្រធានសមាគមនិស្សិតមូស្លីមកម្ពុជា និងម្ចាស់អំណោយ មានការសោកស្តាយ និងចូលរួមរំលែកទុក្ខជាមួយបងប្អូនរងគ្រោះ ។
លោកវេជ្ជបណ្ឌិតក៏បានណែនាំដល់ប្រជាពលរដ្ឋរងគ្រោះឱ្យយកចិត្តទុកដាក់ចំពោះកូនចៅកុំឱ្យលេងទឹក ចៀសវាងជួបគ្រោះថ្នាក់លង់ទឹក ពស់ចឹក និងគិតពីសុខភាព ត្រូវពិសាទឹកដាំពុះនិងធ្វើអនាម័យបោសសម្អាតជុំវិញផ្ទះពេលទឹកស្រក ចៀសវាងមានជំងឺឆ្លងផ្សេងៗ។ ម្យ៉ាងទៀតពេលទឹកស្រក សូមបងប្អូនខិតខំបង្កបង្កើនផលឡើងវិញដើម្បីជីវភាពរបស់បងប្អូន និងត្រូវចេះសាមគ្គីគ្នាជួយគ្នាទៅវិញទៅមក គោរពច្បាប់រដ្ឋ និងប្រតិបត្តិទៅតាមសាសនាឱ្យបានត្រឹមត្រូវ ព្រោះសាសនាមិនថាសាសនាណាទេ តែងបង្រៀនឱ្យមនុស្សធ្វើតែអំពើល្អ ។ លោកវេជ្ជបណ្ឌិត សុះ មុះសិន ក៏បានថ្លែងអំណរគុណយ៉ាងជ្រាលជ្រៅដល់អង្គការ Muslime Helfen នៃប្រទេសអាល្លឺម៉ង់ ដែលតែងតែផ្តល់អំណោយជាច្រើននិងមានគម្រោងបណ្តុះបណ្តាលអប់រំដល់និស្សិតមូស្លីមកម្ពុជា ដើម្បីឱ្យនិស្សិតស្នាក់នៅ និងជួយផ្តល់អំណោយសង្គ្រោះជាច្រើនទៀតដល់ប្រជាពលរដ្ឋរងគ្រោះដោយភ្លើងឆេះផ្ទះ និងគ្រោះទឹកជំនន់ ព្រមទាំងមានគម្រោងជាច្រើនទៀត ជាការចូលរួមកាត់បន្ថយភាពក្រីក្ររបស់ប្រជាពលរដ្ឋ និងការចូលរួមចំណែកអភិវឌ្ឍន៍ប្រទេសកម្ពុជា ឱ្យកាន់តែរីកចម្រើនថែមទៀត៕
ចែករំលែកព័តមាននេះ