រាជធានីភ្នំពេញ ៖ ព្រះចៅអធិការ ព្រះសង្ឃ គណៈកម្មការអាចារ្យ និងពុទ្ធបរិស័ទវត្តឧត្តមពោធិព្រឹក្ស ហៅវត្តស្លែង បានប្រគល់ទេយ្យទានមានគ្រឿងឧបភោគបរិភោគ និងថវិកាមួយចំនួនដល់សាខាកាកបាទក្រហមកម្ពុជា រាជធានីភ្នំពេញ ដើម្បីនាំយកទៅចែកជូនដល់ប្រជាពលរដ្ឋដែលកំពុងជួបប្រទះនូវគ្រោះទុរ្ភឹក្សផ្សេងៗដូចជា ទឹកជំនន់ជាដើម ។ ពិធីប្រគល់ និងទទួលទេយ្យទាននោះធ្វើឡើងកាលពីវេលាព្រឹកថ្ងៃទី១០ តុលា ឆ្នាំ២០១១ នោក្នុងទីអារាមវត្តឧត្តមពោធិព្រឹក្ស ហៅវត្តស្លែង ដែលមានទីតាំងស្ថិតនៅក្នុងសង្កាត់ពងទឹក ខណ្ឌដង្កោ រាជធានីភ្នំពេញ ។
ទេយ្យទានដែលបានប្រគល់ជូនសាខាកាកបាទក្រហមកម្ពុជារាជធានីភ្នំពេញ នាពេលនោះរួមមាន អង្ករចំនួន២តោន មីចំនួន១១០កេស ទឹកត្រី និងទឹកស៊ីអ៊ីវចំនួន១០០យួរ ទឹកក្រូចចំនួន៣៥កេស ទឹកដោះគោចំនួន១.២០០កំប៉ុង ស្ករសចំនួន១.២០០គីឡូក្រាម តែចំនួន១.៥០០កញ្ចប់ និងត្រីខ៩០០កំប៉ុង ព្រមទាំងថវិកាចំនួន២.៣៦៣.៦០០រៀល ។ អំណោយសង្គ្រោះទាំងនេះត្រូវបានព្រះតេជគុណព្រះមហាសុធម្មវង្ស ចឹក ចុន្ទ ទីប្រឹក្សាផ្ទាល់សម្តេចព្រះសុមេធាធិបតី នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា និងជាព្រះចៅអធិការវត្តស្លែង និងព្រះសង្ឃ ព្រមទាំងពុទ្ធបរិស័ទវត្តនោះសន្សំទុកចូលរួមចំណែកក្នុងសកម្មភាពមនុស្សធម៌ ។
នៅក្នុងឱកាសនោះដែរ មានការអញ្ជើញទៅទទួលអំណោយដោយផ្ទាល់ពីសំណាក់លោកប៉ា សុជាតិវង្ស ប្រធានសាខាកាកបាទក្រហមកម្ពុជា រាជធានីភ្នំពេញ និងលោកជំទាវជាភរិយា អមដំណើរដោយលោកជំទាវឡោក ខេង និងមន្ត្រីសាខាកាកបាទក្រហមកម្ពុជារាជធានីភ្នំពេញមួយចំនួនទៀត។ ក្នុងនោះក៏មានវត្តមានលោកក្រូច ផាន ទីប្រឹក្សាសម្តេចតេជោនាយករដ្ឋមន្ត្រី និងជាប្រធានគណបក្សប្រជាជនខណ្ឌដង្កោ លោកហែម ដារិទ្ធិ លោកសេង គន្ធ អភិបាលរងខណ្ឌដង្កោ លោកថេង សុថុល ប្រធានអនុសាខាកាកបាទក្រហមខណ្ឌដង្កោ និងមន្ត្រីជាច្រើនរូបទៀត។
ព្រះតេជ គុណ ចឹក ចុន្ទ ទីប្រឹក្សាផ្ទាល់សម្តេចព្រះមហាសុមេធាធិបតី នន្ទ ង៉ែត និងជាចៅអធិការវត្តស្លែង បានមានថេរដីកាថា អំណោយជាគ្រឿងឧបភោគបរិភោគ និងថវិកាទាំងអស់នេះ គឺបានមកពីការសន្សំទុកពីសំណាក់ព្រះអង្គ និងព្រះសង្ឃក្នុងវត្តមួយចំនួន និងមួយចំនួនទៀតបានមកពីការចូលរួមចំណែករបស់ប្រជាពលរដ្ឋដែលជាពុទ្ធបរិស័ទចំណុះជើងវត្តមានទាំងអ្នកដែលរស់នៅឯប្រទេសបារាំងផងដែរ ។ ចៅអធិការវត្តអង្គនោះបានបន្តថា ដោយអនុវត្តទៅតាមការណែនាំរបស់សម្តេចព្រះសង្ឃនាយក និងប្រសាសន៍របស់សម្តេចអគ្គមហាសេនាបតីតេជោ ហ៊ុន សែន និងមើលឃើញថា ប្រជាពលរដ្ឋកំពុងជួបប្រទះនឹងគ្រោះទុរ្ហឹក្សទឹកជំនន់ ទើបព្រះអង្គនាំយកទេយ្យទានទាំងនេះមកប្រគល់ជូនដល់សាខាកាកបាទក្រហមកម្ពុជារាជធានីភ្នំពេញ ដើម្បីនាំយកទៅចែកជូនដល់ប្រជាពលរដ្ឋរងគ្រោះទាំងនោះ ហើយក៏ចង់ចូលរួមចំណែកនៅក្នុងសង្គមជាតិផងដែរ ។
លោកបា៉ សុជាតិវង្ស ប្រធានសាខាកាកបាទក្រហមកម្ពុជារាជធានីភ្នំពេញ បានថ្លែងថា គ្រោះទឹកជំនន់បង្កឡើងដោយព្យុះទីហ្វុង បានជន់លិចលំនៅឋានដំណាំកសិកម្មប្រជាពលរដ្ឋ ព្រមទាំងបំផ្លាញហេដ្ឋារចនាសម្ព័ន្ធជាច្រើនទៀត ។ បន្ទាប់ពីជួបនូវបញ្ហាបែបនេះ បានធ្វើឱ្យប្រជាពលរដ្ឋរងគ្រោះជួបការខ្វះខាតស្បៀងអាហារ បាត់បង់ផ្ទះសម្បែង និងមានអ្នកស្លាប់បាត់បង់ជីវិតទៀតផង មិនតែប៉ុណ្ណោះពួកគាត់កំពុងត្រូវការចាំបាច់នូវជំនួយសង្គ្រោះជាបន្ទាន់ ។
លោកប៉ា សុជាតិវង្ស បានបន្តថា ការប្រគល់ជូនទេយ្យទាននាពេលនេះ គឺជាការចែករំលែកមួយដ៏សំខាន់បំផុត ហើយក៏ជាកាយវិការមនុស្សធម៌មួយនៅក្នុងសង្គមជាតិរបស់ព្រះចៅអធិការវត្ត ព្រះសង្ឃ និងពុទ្ធបរិស័ទវត្តស្លែង ក្នុងការជួយសង្គ្រោះប្រជាពលរដ្ឋកំពុងរងគ្រោះ។ ជាងនេះទៅទៀត គឺជាការអនុវត្តតាមប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ដែលសម្តេចបានចេញបញ្ជាដាច់ណាត់ឱ្យមន្ត្រីគ្រប់លំដាប់ថ្នាក់ពិនិត្យមើលប្រជាពលរដ្ឋ មិនត្រូវទុកឱ្យប្រជាពលរដ្ឋណាម្នាក់ស្លាប់ដោយអត់បាយឡើយ៕
ចែករំលែកព័តមាននេះ