ខេត្តកណ្តាល ៖ ព្រឹកថ្ងៃអាទិត្យ ទី៩ តុលា ឆ្នាំ២០១១ លោកគិន លី អនុប្រធានគណៈពង្រឹងមូលដ្ឋានស្រុកមុខកំពូល និងជាប្រធានគណៈពង្រឹងមូលដ្ឋានឃុំរកាកោង២ អមដំណើរដោយលោកកើត សារុន និងលោកសុខ គឹមសាន្ត អនុប្រធានចុះជួយឃុំរកាកោងទី២ ស្រុកមុខកំពូល រួមនឹងមន្ត្រីក្រុមការងារគណបក្សប្រជាជនកម្ពុជា ជាច្រើនរូបទៀត បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ចែកជូនជនរងគ្រោះដោយទឹកជំនន់ចំនួន១៤៧គ្រួសារ មកពីឃុំរកាកោងទី២ ស្រុកមុខកំពូល។
លោកយិន សំ អភិបាលរងស្រុកមុខកំពូលបានលើកឡើង ពីស្ថានភាពជីវភាពរស់នៅរបស់ប្រជាពលរដ្ឋមូលដ្ឋាន ដោយបញ្ជាក់ថា អាស្រ័យដោយគ្រោះមហន្តរាយជំនន់ទន្លេមេគង្គធ្វើឱ្យផ្ទះសម្បែង ដំណាំអនុផលផ្សេងៗ ក៏ដូចជាសាលារៀន ផ្លូវថ្នល់ក្នុងឃុំរកាកោងទី២ ទទួលរងការខូចខាត ជាបន្តបន្ទាប់ ក្នុងនោះប្រជាពលរដ្ឋចំនួន១៤៧ គ្រួសារ ត្រូវរើលំនៅឋានមកកាន់ទីទួលសុវត្ថិភាព ដំណាំគ្រប់មុខចំនួន៦៥ហិកតា ត្រូវទឹកជន់លិច សាលារៀន៣កន្លែងត្រូវបិទទ្វារនិងផ្លូវថ្នល់ប្រវែង៥.២៤៧ម៉ែត្រ ទទួលរងការខូចខាតទាំងស្រុង។
លោកគិន លី បានសម្តែងការសោកស្តាយចំពោះការខូចខាតផលប្រយោជន៍របស់បងប្អូនប្រជាពលរដ្ឋដោយសារទឹកជំនន់នាពេលនេះ។ លោកបានពាំនាំនូវការនឹករលឹកសាកសួរសុខទុក្ខ ពីសំណាក់ថ្នាក់ដឹកនាំគណបក្សប្រជាជនកម្ពុជា ដែលជានិច្ចកាល តែងតែគិតគូរដល់សុខទុក្ខ និងជីវភាពរស់នៅរបស់ប្រជាពលរដ្ឋ ពិសេសសម្តេចតេជោហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែននិងនាំយកអំណោយជាបន្តបន្ទាប់ចែកជូនជនរងគ្រោះដោយទឹកជំនន់នៅទូទាំងប្រទេស។ លោកបានណែនាំដល់អាជ្ញាធរមូលដ្ឋានឱ្យជួយអន្តរាគមន៍ដល់ជនរងគ្រោះដោយមិនទុកឱ្យពលរដ្ឋណាម្នាក់ស្លាប់ដោយអត់ស្បៀងដោយយើងពុំបានដឹងនោះឡើយ។
លោកគិន លី ក៏បានណែនាំដល់បងប្អូនប្រជាពលរដ្ឋ ត្រូវមានការប្រុងប្រយ័ត្នពីសុខភាព អនាម័យ ហាមកូនចៅកុំឱ្យលេងទឹក និងពេលទឹកស្រក ត្រូវខិតខំបង្កបង្កើនផល ដាំដំណាំរួមផ្សំ និងត្រូវនាំគ្នាទៅចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោតឱ្យបានគ្រប់ៗគ្នា។ តមកលោកគិន លី និងក្រុមការងារបាននាំយកអំណោយរបស់សម្តេចតេជោហ៊ុន សែន និងលោកជំទាវ ចែកជូនជនរងគ្រោះទាំង១៤៧គ្រួសារ ក្នុងមួយគ្រួសារៗទទួលបានអង្ករ២០គីឡូក្រាម ទឹកត្រីមួយយួរ ទឹកស៊ីអីុវមួយយួរ ត្រីខ១០កំប៉ុង មី១០កញ្ចប់ ថវិកា៥ម៉ឺនរៀល។ ឧបត្ថម្ភកម្លាំងប្រដាប់អាវុធ១៥នាក់ ម្នាក់ៗ២ម៉ឺនរៀល និងចំណាយផ្សេងៗជាច្រើនទៀត សរុបអស់ថវិកាចំនួន២៨.៧៩៥.០០០រៀល៕
ចែករំលែកព័តមាននេះ