ខេត្តស្ទឹងត្រែង ៖ យុវជនម្នាក់បានលោតទឹកពីលើស្ពានសេកុងប៉ងធ្វើអត្តឃា.ត តែត្រូវគេជួយសង្រោ្គះទាន់ពេលវេលាកាលពីម៉ោង២និង៥៩នាទីរសៀល ថ្ងៃទី៩ តុលា ។
បើតាមសាក្សីឃើញហេតុការណ៍និយាយថា មុនពេលកើតហេតុយុវជនម្នាក់នេះបានជិះម៉ូតូឌុបមកលើស្ពានសេកុងក្នុងសភាព ស្រពាប់ស្រពោនហាក់បីដូចជាមានទុក្ខកង្វល់អ្វីមួយបន្តិចក្រោយមក
ខេត្តស្ទឹងត្រែង ៖ យុវជនម្នាក់បានលោតទឹកពីលើស្ពានសេកុងប៉ងធ្វើអត្តឃាត តែត្រូវគេជួយសង្រោ្គះទាន់ពេលវេលាកាលពីម៉ោង២និង៥៩នាទីរសៀល ថ្ងៃទី៩ តុលា ។
បើតាមសាក្សីឃើញហេតុការណ៍និយាយថា មុនពេលកើតហេតុយុវជនម្នាក់នេះបានជិះម៉ូតូឌុបមកលើស្ពានសេកុងក្នុងសភាពស្រពាប់ស្រពោនហាក់បីដូចជាមានទុក្ខកង្វល់អ្វីមួយបន្តិចក្រោយមកស្រាប់តែឡើងលើបង្កាន់ដៃស្ពាន ហើយលោតទឹកតែម្តង។ ខណៈឃើញដូចនេះ អ្នកឃើញហេតុការណ៍ក៏បានជិះម៉ូតូមកគល់ស្ពានស្រែកហៅទូករបស់ខ្មែរអ៊ិស្លាមនេសាទត្រីក្នុងទន្លេនោះ ដើម្បីជួយសង្គ្រោះជីវិត។
អ្នកនេសាទត្រីជាខ្មែរអ៊ិស្លាមឈ្មោះយូ ម៉ាន ដែលបានបើកទូកចុះជួយសង្គ្រោះនិយាយថា ខណៈគាត់កំពុងតែរាយមងក្នុងទន្លេ ស្រាប់តែមានគេស្រែកប្រាប់ថា មានអ្នកលោតទឹកពីលើស្ពានជួយមើលផង ។ ពេលនោះគាត់បានបើកទូករកមើលហើយប្រទះឃើញយុវជននោះកំពុងខំប្រឹងហែលទឹកទាំងត្រដាបត្រដួស និងស្រែកឲ្យជួយផង ខណៈឈ្លក់ទឹក ហើយរូបគាត់និងឪពុកម្តាយនៅលើទូកបានជួយស្រង់មកលើទូកតែសន្លប់ទៅហើយក៏ជួយរឺតទ្រូងនិងរលាក់ទឹកចេញរួចនាំទៅមន្ទីរពេទ្យខេត្ត។
លោកអ៊ុង សូវៀត នាយកមន្ទីរពេទ្យខេត្តមានប្រសាសន៍ថា យុវជនរូបនេះបានរួចផុតពីការស្លាប់ហើយបន្ទាប់ពីជួយសង្គ្រោះទាន់ពេលវេលា។ យុវជនដែលគិតខ្លីម្នាក់នេះ បន្ទាប់ពីដឹងខ្លួនឡើងវិញនិយាយថា ខ្លួនឈ្មោះម៉ៅ ឆៃហ៊ាង ហៅឌី សុវណ្ណារ៉ា អាយុ២០ឆ្នាំ មានស្រុកកំណើតនៅភូមិចង្ក្រង់ ឃុំចង្ក្រង់ ស្រុកចិត្របូរី ខេត្តក្រចេះ ទើបមកធ្វើការជាអ្នកសំអាតអនាម័យក្នុងហាងខារ៉ាអូខេ សួនរីករាយ ខេត្តស្ទឹងត្រែង បានរយៈពេលមួយខែ។ ខ្លួនបានព្យាយាមសម្លាប់ខ្លួនពីរបីលើកហើយតែត្រូវបានគេជួយសង្គ្រោះរហូត ហើយខ្លួនលោតទឹកនេះ ដោយសារតូចចិត្តនឹងខ្លួនឯងមានជីវភាពក្រីក្រពេក ហើយចង់ក្លាយជាតារាចម្រៀងចង់ទៅប្រឡងចម្រៀងនៅភ្នំពេញ តែគ្រួសារឪពុកម្តាយមិនឲ្យទៅដូចបំណង។ ដោយសារតែការព្យាយាមមិនបានសម្រេចខ្លួនក៏អស់សង្ឃឹម ទើបព្យាយាមសម្លាប់ខ្លួនបែបនេះ។
យុវជនរូបនេះបានរៀបរាប់ថា កាលដែលខ្លួនមិនទាន់មកខេត្តស្ទឹងត្រែងបម្រើការងារក្នុងហាងខារ៉ាអូខេនេះ ខ្លួនជាអ្នកចម្រៀងតាមរង្គសាល។ ដោយមានការសរសើរនិងលើកទឹកចិត្តពីអ្នកភូមិថា ខ្លួនមានទឹកដមសំនៀងពីរោះគួរតែទៅប្រឡងជាតារាចម្រៀងនៅភ្នំពេញប្រហែលជាមានសង្ឃឹមនឹងជាប់ជាតារា ហើយខ្លួនបានព្យាយាមចង់ទៅភ្នំពេញដើម្បីប្រឡងតែត្រូវគ្រួសារហាមឃាត់មិនឲ្យធ្វើជាអ្នកច្រៀងរាំ ខ្លួនក៏កើតការតូចចិត្តថា គេធ្វើបានចុះហេតុអ្វីក៏ខ្លួនមិនអាចធ្វើបានដូចគេ ទើបបានជាមានគំនិតគិតខ្លីចង់ស្លាប់បែបនេះ មិនមានការពាក់ព័ន្ធនឹងរឿងសេ្នហាអ្វីទេ ហើយក៏គ្នានការពាក់ព័ន្ធមានបញ្ហាជាមួយថៅកែហាងដែរ។
ជួបជាមួយមេការម្ចាស់ហាងខារ៉ាអូខេ សួនរីករាយ លោកបានបញ្ជាក់ថា យុវជនម្នាក់នេះជាអ្នកបម្រើការងារខាងអនាម័យក្នុងហាងនេះមែន តែការដែលរូបគេមានគំនិតគិតខ្លីបែបនេះ គឺមិនមានអ្វីពាក់ព័ន្ធជាមួយហាងទេ នេះជារឿងផ្ទាល់ខ្លួនរបស់គេតែប៉ុណ្ណោះ។
គួរបញ្ជាក់ថា បច្ចុប្បន្នក្នុងខេត្តស្ទឹងត្រែងនេះ មានហាងខារ៉ាអូខេ ជិត២០កន្លែង ក្នុងនោះហាងធំ១១កន្លែង និងតូច០៥កន្លែង៕
ចែករំលែកព័តមាននេះ