រាជធានីភ្នំពេញ ៖ លោកឯក ថា អ្នកនាំពាក្យ និងជាអនុប្រធាននាយកដ្ឋានព័ត៌មាននៃអង្គភាពព័ត៌មាននិងប្រតិកម្មរហ័សបានឱ្យដឹងថា ក្នុងជំនួបសម្តែងការគួរសម និងពិភាក្សាការងារជាមួយលោកសុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីកាលពីថ្ងៃទី៦ តុលា នៅទីស្តីការគណៈរដ្ឋមន្ត្រី លោក ក-សានមូហ្គាម រដ្ឋមន្ត្រីការបរទេស និងជារដ្ឋមន្ត្រីច្បាប់នៃសាធារណរដ្ឋសិង្ហបុរីមានប្រសាសន៍ថា នេះជាលើកទី១ ដែលលោកបានមកបំពេញទស្សនកិច្ចផ្លូវការនៅកម្ពុជា បន្ទាប់ពីរូបលោកត្រូវបានតែងតាំងជារដ្ឋមន្ត្រីការបរទេស ក្រោយពេលបោះឆ្នោតនៅសិង្ហបុរីកន្លងមក ។
លោកមានប្រសាសន៍បន្តថា នៅពេលនេះលោកបានឃើញទំនាក់ទំនងរវាងប្រទេសទាំងពីរសិង្ហបុរី-កម្ពុជាមានភាពល្អប្រសើរ។ លោកបានពិភាក្សាជាមួយសម្តេចតេជោនាយករដ្ឋមន្ត្រី ហ៊ុន សែន បានពិភាក្សាជាមួយលោកឧបនាយករដ្ឋមន្ត្រី ហោ ណាំហុង និងបានចូលក្រាបបង្គំគាល់ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាផងដែរ ។
លោករដ្ឋមន្ត្រីការបរទេសសិង្ហបុរី បានសម្តែងនូវក្តីសង្ឃឹមថា ប្រទេសជាសមាជិកអាស៊ានមួយចំនួនរាប់ទាំងប្រទេសកម្ពុជាផងដែរ នឹងទទួលបាននូវបទពិសោធន៍ដែលប្រទេសសិង្ហបុរីនឹងខិតខំជួយបន្ថែមទៀតក្នុងការកសាងហេដ្ឋារចនាសម្ព័ន្ធ ក្នុងក្របខណ្ឌអាស៊ាន។ នៅឆ្នាំ២០១២ កម្ពុជាធ្វើជាប្រធានអាស៊ាន និងកិច្ចប្រជុំកំពូលអាស៊ាន ក៏ប៉ុន្តែវាជួនពេលដែលពិភពលោកមានការលំបាកនូវវិបត្តិសេដ្ឋកិច្ច ។ ទន្ទឹមនេះ សិង្ហបុរីនៅបន្តគាំទ្រ និងធ្វើការយ៉ាងជិតសិទ្ធជាមួយកម្ពុជាក្នុងទំនាក់ទំនងក្របខណ្ឌអាស៊ាន ក៏ដូចជាការជួយជ្រោមជ្រែងក្នុងការរៀបចំសម័យប្រជុំកំពូលអាស៊ាននៅឆ្នាំ២០១២ ខាងមុខនៅកម្ពុជា ។
មានប្រសាសន៍ក្នុងឱកាសនោះ លោកបណ្ឌិតសភាចារ្យ សុខ អាន បញ្ជាក់ថា មកដល់ពេលនេះរាជរដ្ឋាភិបាលកម្ពុជាធ្វើការទ្វេភាគីជាមួយរដ្ឋាភិបាលបណ្តាប្រទេសសមាជិកអាស៊ាន គឺល្អក៏ដូចជាមួយអង្គការក្រៅរដ្ឋាភិបាលដែរ ។ នៅពេលនេះ កម្ពុជាកំពុងជួបគ្រោះទឹកជំនន់ដែលគ្រោះទឹកជំនន់ឆ្នាំនេះប្រហាក់ប្រហែលនៅឆ្នាំ២០០០ ដែរ ដីស្រែរាប់មឺុនហិកតា ត្រូវខូចខាត ។ ប៉ុន្តែនៅពេលទឹកស្រកទៅវិញយើងអាចស្តុកទឹកបាននៅតាមអាង តាមប្រឡាយ ដើម្បីស្រោចស្រពដំណាំកសិកម្មពិសេសស្រូវរដូវប្រាំង។
លោករដ្ឋមន្ត្រីការបរទេសសិង្ហបុរី បានរំលឹកពីដំណើរទស្សនកិច្ចរបស់លោកបណ្ឌិតសភាចារ្យ សុខ អាន នៅសិង្ហបុរីកន្លងទៅ ដែលពេលនោះលោកបណ្ឌិតសភាចារ្យមានការចាប់អារម្មណ៍យា៉ងខ្លាំងលើការបណ្តុះបណ្តាលមន្ត្រីរាជការសីុវិលក៏ដូចជានិស្សិតផ្នែកព័ត៌មានវិទ្យា គឺវាមានសារសំខាន់ក្នុងការទាក់ទាញវិនិយោគិនក៏ដូចជាជួយរួមចំណែកការងារក្នុងប្រទេសនីមួយៗបានល្អ ។
ទាក់ទិននឹងបញ្ហានេះ លោកបណ្ឌិតសភាចារ្យ សុខ អាន មានប្រសាសន៍ថា កម្ពុជាត្រូវការបណ្តុះបណ្តាលផ្នែកវិជ្ជាជីវៈដល់និស្សិតឱ្យបានបញ្ចប់ការសិក្សា និងប្រជាពលរដ្ឋកម្ពុជាដែលមានចំណេះដឹងទូលំទូលាយបន្ថែមទៀតផ្នែកព័ត៌មានវិទ្យា ដើម្បីតម្រូវការទីផ្សារក្នុងស្រុក និងពលកម្មទីផ្សារក្នុងស្រុក និងក្រៅស្រុក។ ហេតុនេះហើយបានជាយើងបង្កើតទីភ្នាក់ងារបណ្តុះបណ្តាលវិជ្ជាជីវៈក្រោមការគ្រប់គ្រងរបស់ក្រសួងការងារ ហើយរាជរដ្ឋាភិបាលកំពុងតែអនុវត្តផ្ទាល់តែម្តង ។
លោក ក-សានមូហ្គាម បានសម្តែងការគាំទ្រទៅលើគោលជំហររបស់អាស៊ាន ពិសេសប្រទេសឥណ្ឌូណេសីុ នៅក្នុងការជួយដោះស្រាយដោយសន្តិវិធីក្នុងជម្លោះព្រំដែនកម្ពុជា-ថៃ ហើយសិង្ហបុរីគាំទ្រតួនាទីរបស់ឥណ្ឌូណេស៊ី ក្នុងការបញ្ជូនអ្នកសង្កេតការណ៍មកកាន់តំបន់ជម្លោះព្រំដែន។
លោកបណ្ឌិតសភាចារ្យ សុខ អាន ក៏បានរំលឹកអំពីសេចក្តីបង្គាប់របស់តុលាការយុត្តិធម៌អន្តរជាតិក្រុងឡាអេ កាលពីខែកក្កដា ឆ្នាំ២០១១ កន្លងទៅ លើ៤ចំណុចគឺ ១-សុំឱ្យភាគីកម្ពុជា-ថៃ ដកកងកម្លាំងប្រដាប់អាវុធចេញពីតំបន់ដែលគ្មានយោធាបណ្តោះអាសន្នមានទំហំជាង១៧,៣គីឡូម៉ែត្រការ៉េ ២-ថៃមិនត្រូវរាំងខ្ទប់កម្ពុជាពីការចេញចូលដោយសេរីទៅកាន់ប្រាសាទព្រះវិហារ ៣-កម្ពុជា និងថៃត្រូវអនុញ្ញាតឱ្យមានអ្នកសង្កេតការណ៍ចូលធ្វើការនៅតំបន់នោះ និង៤-ប្រទេសទាំងពីរត្រូវរាយការណ៍នូវអ្វីដែលខ្លួនបានធ្វើ និងមិនបានធ្វើទៅតុលាការយុត្តិធម៌អន្តរជាតិ ។
តុលាការអាចប្រើពេលពីមួយឆ្នាំទៅពីរឆ្នាំក្នុងការបកស្រាយសាលក្រមឆ្នាំ១៩៦២ ដែលបានកាត់ក្តីប្រាសាទព្រះវិហារ និងតំបន់ជុំវិញប្រាសាទនេះឱ្យមកកម្ពុជា ដោយផ្អែកលើផែនទីឆ្នាំ១៩០៤-១៩០៧ ។ ដូច្នេះក្រោយពីការបកស្រាយសាលក្រមនោះ តុលាការយុត្តិធម៌អន្តរជាតិ នឹងអាចចេញសាលក្រមបកស្រាយទៅតាមបណ្តឹងរបស់កម្ពុជា៕
ចែករំលែកព័តមាននេះ