រាជធានីភ្នំពេញ ៖ កុមារីតូចអាយុ៦ឆ្នាំម្នាក់ឈ្មោះមឿន សាន់តាណា ជាសិស្សថ្នាក់ទី១ នៃសាលាបឋមសិក្សាយកបាត្រ ស្ថិតនៅភូមិយកបាត្រ សង្កាត់ក្បាលកោះ ខណ្ឌមានជ័យ ត្រូវជនមិនស្គាល់អត្តសញ្ញាណលួងលោមរូបនាងចេញពីសាលារៀនយកទៅដោះគ្រឿងអលង្ការអស់ប្លាទីនទម្ងន់ជិត៣ជី ហើយទុករូបនាងចោលនៅមុខផ្សារច្បារអំពៅកាលពីព្រឹកថ្ងៃទី៧ តុលា ២០១១។
ក្រុមសមត្ថកិច្ចផ្សារច្បារអំពៅបាននិយាយថា នៅវេលាម៉ោង៩និង៣០នាទីព្រឹកថ្ងៃកើតហេតុ ខាងលើ ក្រុមសន្តិសុខផ្សារបានប្រទះឃើញក្មេងស្រីខាងលើឈរនៅមុខផ្សារ ដោយមានទឹកមុខស្រពាប់ស្រពោន ក៏ឃាត់សួរនាំ ពេលនោះនាងយំតែម្តង។ នៅពេលឃើញសភាពបែបនេះ ក្រុមសន្តិសុខផ្សារក៏នាំរូបនាងមកស្នាក់ការ ព្រោះនឹកស្មានថានាងវង្វេងឪពុកម្តាយ។ ប៉ុន្តែនៅពេលនាំនាងមកដល់ស្នាក់ការផ្សារ រូបនាងបាននិយាយថា មានមនុស្សមិនស្គាល់មុខនាំនាងចេញពីសាលារៀនមកទីនេះ ដោះយកខ្សែដៃ ក្រវិលពីខ្លួនរបស់នាង ហើយទុកនាងចោលតែម្តង។
បន្ទាប់ពីឮសូរនាងតូចនិយាយបែបនេះ ក្រុមសន្តិសុខក៏សួរនាំ ដើម្បីទំនាក់ទំនងទៅក្រុមគ្រួសារ និងលោកគ្រូ អ្នកគ្រូ មកទទួលយកត្រឡប់ទៅវិញ។ ប្រភពពីស្ត្រីដែលជាម្តាយរបស់កុមារីខាងលើនិយាយថា ខ្សែដៃ និងក្រវិលដែលក្រុមចោរដោះយកពីខ្លួនកូនស្រីរបស់គាត់នោះគឺមានទម្ងន់ជិត៣ជី ៕
ចែករំលែកព័តមាននេះ