ខេត្តព្រះវិហារ ៖ កុមារក្រិន៣នាក់បងប្អូនត្រូវបានអង្គការទស្សនៈពិភពលោក នាំមកកាន់ផ្នែកថែទាំកុមារនៃមន្ទីរពេទ្យបង្អែក១៦ មករា ក្រុងព្រះវិហារ ដើម្បីឱ្យក្រុមគ្រូពេទ្យធ្វើការពិនិត្យ និងផ្តល់អាហារូបត្ថម្ភជួយទ្រទ្រង់សុខភាពឡើងវិញ បន្ទាប់ពីកោះសន្តិភាពបានចុះផ្សាយព័ត៌មាន និងស្វែងរកសប្បុរសជនជួយដល់កុមារក្រិនទាំង៣នាក់។
ខេត្តព្រះវិហារ ៖ កុមារក្រិន៣នាក់បងប្អូនត្រូវបានអង្គការទស្សនៈពិភពលោកនាំមកកាន់ផ្នែកថែទាំកុមារនៃមន្ទីរពេទ្យបង្អែក១៦ មករា ក្រុងព្រះវិហារ ដើម្បីឱ្យក្រុមគ្រូពេទ្យធ្វើការពិនិត្យ និងផ្តល់អាហារូបត្ថម្ភជួយទ្រទ្រង់សុខភាពឡើងវិញ បន្ទាប់ពីកោះសន្តិភាពបានចុះផ្សាយព័ត៌មាន និងស្វែងរកសប្បុរសជនជួយដល់កុមារក្រិនទាំង៣នាក់។
កុមារក្រិនទាំង៣នាក់នេះជាកូនកសិករទីទាល់ក្រមួយ រស់នៅភូមិអន្លង់ស្វាយ ឃុំព្រះឃ្លាំង ស្រុកត្បែងមានជ័យ ។ ពួកគេមិនចេះឈរ និងមិនចេះនិយាយទេ គឺចេះតែអង្គុយ ដោយកូនច្បងឈ្មោះស្មោះ សាយ ភេទប្រុស អាយុ១០ឆ្នាំ មានកម្ពស់០,៦៥ម៉ែត្រ ទម្ងន់៨,៥០គីឡូក្រាម ២-ឈ្មោះស្មោះ សីវ៉ា ភេទស្រី អាយុ៨ឆ្នាំ មានកម្ពស់០,៦៥ម៉ែត្រ ទម្ងន់១០,៦០គីឡូក្រាម និង៣-ឈ្មោះស្មោះ ប៉ុច ភេទប្រុស អាយុ១ឆ្នាំ មានកម្ពស់០,៥២ម៉ែត្រ ទម្ងន់៧,៦០គីឡូក្រាម។ ចំណែកឪពុកឈ្មោះផាវ ស្មោះ អាយុ៣៥ឆ្នាំ ម្តាយឈ្មោះញុំ សំណាង អាយុ៣០ឆ្នាំ ជាជនជាតិកួយ ។
បើតាមស្ត្រីជាម្តាយរៀបរាប់ថា កូនគាត់ទាំង៣នាក់នេះកូនច្បងឈ្មោះស្មោះ សាយ ចាប់តាំងពីកើតមកគឺចេះតែអង្គុយ ហើយចូលចិត្តកាន់កាំបិតនៅជាប់ដៃជាប្រចាំ និងធ្វើកាយវិការគ្រវីចុះឡើងៗ ប្រៀបដូចជាអ្នកគុននិយម។ ការកាន់កាំបិតនេះគឺតាំងពីចេះអង្គុយមក ហើយបើទោះជាកាន់កាំបិតមានផ្លែមុតយ៉ាងណាក៏ដោយ ក៏មិនដែលមុត ឬបង្ករបួសស្នាមអ្វីដែរ ប៉ុន្តែនៅពេលណាយកកាំបិតចេញពីដៃ គឺរូបគេស្រែកយំមិនឈប់។
ចំពោះកុមារក្រិនទាំង៣នាក់នេះ ត្រូវបានលោករស់ ផាវ ប្រធានក្រុមគ្រូពេទ្យពិនិត្យព្យាបាលឱ្យដឹងថា កាលពីជាងមួយខែមុនឪពុក ម្តាយរបស់កុមារក្រិននេះបាននាំមកកាន់មន្ទីរពេទ្យ ដើម្បីពិនិត្យព្យាបាលម្តងរួចហើយ ដោយពេលនោះក្រុមគ្រូពេទ្យបានពិនិត្យ និងព្យាបាលឱ្យមានសុខភាពជាធម្មតាឡើងវិញ តែពេលនេះដោយមានការជួយគាំពារពីអង្គការក្នុងស្រុក ទើបឪពុកម្តាយកុមារទាំង៣នាក់នាំពួកគេមកកាន់មន្ទីរពេទ្យសាជាថ្មី ដើម្បីធ្វើការពិនិត្យ និងផ្តល់អាហារូបត្ថម្ភដល់ពួកគេឱ្យមានភាពលូតលាស់។ លោករស់ ផាវ បានឱ្យដឹងទៀតថា ពេលនេះក្រុមគ្រូពេទ្យកំពុងបន្តធ្វើការពិនិត្យ និងផ្តល់អាហារប៉ូវដល់ពួកគេ តែក្រុមគ្រូពេទ្យមិនអាចបញ្ជាក់បានថា នឹងធ្វើបែបណា ដើម្បីឱ្យក្មេងទាំង៣នាក់នេះមានភាពលូតលាស់កាន់តែប្រសើរជាងនេះទៀតបានទេ។ បើតាមការពិនិត្យទៅលើរូបរាងកាយ និងកម្ពស់ឪពុក ម្តាយរបស់កុមារទាំង៣នាក់ គឺមានលក្ខណៈធម្មតា ឪពុកមានកម្ពស់១,៦៨ម៉ែត្រ ម្តាយមានកម្ពស់១,៦៥ម៉ែត្រ ហើយតាមការស្រាវជ្រាវពីពូជអំបូររបស់ឪពុក ម្តាយមិនមានអ្នកណាទាប ឬតឿនោះឡើយ។
តាមការវិភាគរបស់ក្រុមគ្រូពេទ្យមួយចំនួននិយាយថា ការដែលក្មេងទាំង៣នាក់នេះកើតមកមិនមានភាពលូតលាស់នោះគឺបណ្តាលមកពីស្បូនរបស់ម្តាយមានការបាត់បង់អ្វីជាច្រើនក្នុងការចិញ្ចឹមទារកនៅក្នុងផ្ទៃ ទើបធ្វើឱ្យទារកកើតមកមានរូបរាងដូចគេឯង តែមិនមានការលូតកម្ពស់បែបនេះ។ មន្ត្រីអង្គការទស្សនៈពិភពលោកទទួលបន្ទុកធនធានមនុស្ស និងសុខុមាលភាពកុមារប្រចាំខេត្តព្រះវិហារ ឱ្យដឹងថា ពេលបានទទួលព័ត៌មានថា មានកុមារក្រិន៣នាក់កំពុងរស់នៅជាមួយឪពុកម្តាយក្រីក្រ អង្គការក៏បានចាត់បញ្ជូនភ្នាក់ងាររបស់ខ្លួនមកជួបឪពុក ម្តាយឱ្យនាំពួកគេមកកាន់មន្ទីរពេទ្យដោយអង្គការជាអ្នកចេញសេវាឱ្យឪពុកម្តាយនាំកូនមកដើម្បីជួយថែរក្សា និងបំប៉នសុខភាពដល់ពួកគេ។ គោលបំណងរបស់អង្គការគឺនៅពេលខាងមុខនេះ នឹងសហការជួយឧបត្ថម្ភបន្ថែមរាល់កង្វះខាតទាំងឡាយដល់កុមារទាំង៣នាក់ ព្រមទាំងឪពុកម្តាយជាអ្នកក្រីក្រផងដែរ ធ្វើយ៉ាងណាឱ្យអាចមានភាពលូតលាស់ដូចកុមារដទៃ។
ស្ត្រីជាម្តាយ ព្រមទាំងក្រុមគ្រូពេទ្យនៃមន្ទីរពេទ្យបង្អែក១៦ មករា ក្រុងព្រះវិហារ បានសំណូមពរដល់សប្បុរសជន និងអង្គការនានាទៀតទាំងក្នុង និងក្រៅប្រទេស សូមមេត្តាជួយឧបត្ថម្ភជាថវិកា សម្ភារ និងថ្នាំពេទ្យដែលអាចជួយដល់សុខភាពរបស់កុមារទាំង៣នាក់ ៕
ចែករំលែកព័តមាននេះ