រាជធានីភ្នំពេញ ៖ មកដល់វេលាម៉ោង១និង២០នាទីរសៀលថ្ងៃទី៧ តុលា ២០១១ អ្នករងការពុលស្រា.សក្អួតចង្អោរ ប្រកាច់ប្រកិនចំនួន១៤នាក់ បន្ថែមទៀត ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យកាល់ម៉ែត រាជធានីភ្នំពេញ ដែលអ្នកទាំងនេះមិនទាន់ឈានចូលដល់កម្រិតធ្ងន់ធ្ងរនៅឡើយទេ គ្រាន់តែថា ក្អួតចង្អោរចាក់ទីងប៉ុណ្ណោះ ប៉ុន្តែប្រសិនបើធ្វេសប្រហែសក៏មិនបានដែរ។
ក្រុមគ្រូពេទ្យនៃមន្ទីរពេទ្យកាល់ម៉ែត បាននិយាយឱ្យដឹងថា អ្នកជំងឺពុលស្រា.សទាំង១៤នាក់ បញ្ជូនមកក្រោយនេះមានស្ត្រី២នាក់ ពួកគេមិនធ្ងន់ធ្ងរពេកនោះទេ ប៉ុន្តែក៏ចាត់ទុកថា សំណាងល្អដែរ ចេះបញ្ជូនមកកាន់មន្ទីរពេទ្យទាន់ ពេលវេលាសង្ឃឹមថា ពួកគេនឹងមិនប៉ះពាល់ដល់អាយុជីវិតឡើយ បើពុំដូច្នេះទេ អាចនឹងបាត់បង់ជីវិត។
គួររំលឹកថា អ្នករងការពុលស្រា.សក្អួតចង្អោរប្រកាច់ប្រកិននៅស្រុកក្រគរ ខេត្តពោធិ៍សាត់ បានស្លាប់៣នាក់ទៀតហើយ ដោយម្នាក់ស្លាប់នៅខេត្តពោធិ៍សាត់ និង២នាក់ទៀតស្លាប់ខណៈបញ្ជូនមកកាន់មន្ទីរពេទ្យកាល់ម៉ែត្រ រាជធានីភ្នំពេញ ប៉ុន្តែបានត្រឹមតែពាក់កណ្តាលផ្លូវប៉ុណ្ណោះក៏ស្លាប់ ចំណែក៥៥នាក់ទៀតបានមកដល់មន្ទីរពេទ្យកាល់ម៉ែត កាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី៧ តុលា ២០១១ ហើយកំពុងត្រូវបានគ្រូពេទ្យព្យាបាលសង្គ្រោះបន្ទាន់។
អ្នកស្លាប់ដោយសារពុលស្រាទាំងអស់កើនឡើង៩នាក់ហើយ ដោយម្សិលមិញស្លាប់៦នាក់ និងនៅថ្ងៃនេះ (ទី៧ តុលា) ស្លាប់៣នាក់ទៀត។ ចំណែកអ្នកជំងឺពុលស្រា.ស៥៥នាក់ដែលបានបញ្ជូនមកមន្ទីរពេទ្យកាល់ម៉ែតកាលពីរំលងអធ្រាត្រនោះ មានស្រី៨នាក់ ធ្ងន់ធ្ងរ៩នាក់ ហើយមានម្នាក់ធ្ងន់ធ្ងរដល់កម្រិតត្រូវគ្រូពេទ្យលាងឈាមទៀតផង។ តាមក្រុមគ្រួសារអ្នកពុលស្រាបាននិយាយថា អ្នកជំងឺពុលស្រាមាន៥៧នាក់ ត្រូវបញ្ជូនមកសង្គ្រោះនៅមន្ទីរពេទ្យកាល់ម៉ែតរាជធានីភ្នំពេញ ប៉ុន្តែស្តាយណាស់ ពួកគេបានស្លាប់តាមផ្លូវ២នាក់បាត់ទៅហើយ ដូច្នេះនៅសល់តែ៥៥នាក់ប៉ុណ្ណោះ ដែលត្រូវចូលទៅសង្គ្រោះនៅមន្ទីរពេទ្យកាល់ម៉ែត។
ក្រុមគ្រូពេទ្យនៅមន្ទីរកាល់ម៉ែត បាននិយាយថា អ្នកជំងឺពុលស្រា.សទាំងនេះ គឺពុលជាតិមេតាពុលខ្លាំងក្លា…។ អ្នកពុលស្រាដែលចូលមកសម្រាកព្យាបាលក្នុងមន្ទីរពេទ្យកាល់ម៉ែត ចាប់តាំងពីពេលរំលងអធ្រាត្រ និងពេលរសៀលថ្ងៃទី៧ តុលា ២០១១ នេះមានចំនួន៦៩នាក់ហើយ៕
ចែករំលែកព័តមាននេះ