ខេត្តកំពង់ចាម ៖ រថយន្តម៉ាកកូរ៉ូឡាពណ៌ខ្មៅស៊េរីខ្ពស់១គ្រឿងពាក់ស្លាកលេខបណ្តោះ អាសន្ន៣៤១៧បោះពួយយ៉ាងលឿនជ្រុលទៅបុក របងសាលាខេត្តពេញទំហឹងបង្កឱ្យមានផ្សែងហុយទ្រលោម ព្រមទាំងផ្ទុះពោងសុវត្ថិភាព ។ អ្នកជិះចំនួន៥នាក់ក្នុងនោះមានស្រ្តីខារ៉ាអូខេម្នាក់ផងមិនរងគ្រោះ ដល់អាយុជីវិតទេ គ្រាន់តែរបួសស្រាល ហើយត្រូវគេបញ្ចូនទៅសង្គ្រោះនៅមន្ទីរពេទ្យបង្អែកខេត្ត ។
ខេត្តកំពង់ចាម ៖ រថយន្តម៉ាកកូរ៉ូឡាពណ៌ខ្មៅស៊េរីខ្ពស់១គ្រឿងពាក់ស្លាកលេខបណ្តោះអាសន្ន៣៤១៧បោះពួយយ៉ាងលឿនជ្រុលទៅបុក របងសាលាខេត្តពេញទំហឹងបង្កឱ្យមានផ្សែងហុយទ្រលោម ព្រមទាំងផ្ទុះពោងសុវត្ថិភាព ។ អ្នកជិះចំនួន៥នាក់ក្នុងនោះមានស្រ្តីខារ៉ាអូខេម្នាក់ផងមិនរងគ្រោះដល់អាយុជីវិតទេ គ្រាន់តែរបួសស្រាល ហើយត្រូវគេបញ្ចូនទៅសង្គ្រោះនៅមន្ទីរពេទ្យបង្អែកខេត្ត ។ ហេតុការណ៍នេះបានកើតឡើងនៅវេលាម៉ោង១ និង៣០នាទីរំលងអធ្រាត្រឈានចូលថ្ងៃទី៧ តុលា ២០១១ នៅភូមិទី៧ សង្កាត់កំពង់ចាម ក្រុងកំពង់ចាម។ រថយន្តរងការខូចខាតយ៉ាងដំណំផ្នែកខាងមុខត្រូវគេនាំទៅរក្សាទុកនៅអធិការដ្ឋាននគរបាលក្រុងកំពង់ចាមដើម្បីដោះស្រាយតាមច្បាប់ ។
មន្ត្រីនគរបាលដែលយាមប្រចាំការនៅសាលាខេត្តប្រាប់ឲ្យដឹងថា រថយន្តម៉ាកកូរ៉ូឡានោះបើកបោះពួយពីកើតទៅលិចយ៉ាងលឿន ហើយដោយយកចង្កូតបត់ស្តាំមិនទាន់ក៏ឡើងចិញ្ចើមផ្លូវជ្រុលទៅបុករបងសាលាខេត្តលាន់សូរយ៉ាងខ្លាំង និងមានផ្សែងហុយចេញពីរថយន្តទៀតផង ។
មន្រ្តីនគរបាលប្រាប់បន្តថា គ្រានោះនគរបាលជាច្រើននាក់បើកទ្វាររបងរត់ទៅមើល ហើយឃើញមនុស្សប្រុសចំនួន៤នាក់ និងស្រ្តីម្នាក់បើកទ្វាររថយន្តចេញក្រៅ ប៉ុន្តែមិនមានអ្នកណាម្នាក់រងគ្រោះដល់អាយុជីវិតទេ ដោយម្នាក់ៗគ្រាន់តែរងរបួសស្រាលប៉ុណ្ណោះ ។ អ្នករបួសត្រូវនគរបាលឌុបតាមម៉ូតូយកទៅសង្គ្រោះនៅមន្ទីរពេទ្យបង្អែកខេត្ត ។
លោកស៊ាម យូសេង នាយផ្នែកចរាចរក្រុងកំពង់ចាមប្រាប់ថា រថយន្តកូរ៉ូឡានោះបើកបរដោយឈ្មោះងួន ធានី ភេទប្រុស អាយុ២៧ឆ្នាំ រស់នៅភូមិសួងលិច សង្កាត់សួង ក្រុងសួង ។ មុនកើតហេតុគេចូលផឹកស៊ីនៅហាងខារ៉ាអូខេអាស៊ានក្នុងក្រុងកំពង់ចាមរួមជាមួយមិត្តភក្តិ ១-ឈ្មោះតាំង ស្រុង ភេទប្រុស អាយុ២៧ឆ្នាំ ២-ឈ្មោះ តាំង ឡុង ភេទប្រុស អាយុ២៦ឆ្នាំ និង៣-ឈ្មោះ ឃុត អេងហ៊ាង ភេទប្រុស អាយុ២៧ឆ្នាំ។ ពួកគេរស់នៅភូមិជាមួយគ្នា ។
លោកប្រធាននគរបាលចរាចរក្រុងកំពង់ចាមបញ្ជាក់ថា ឈ្មោះធានី បើករថយន្តចេញពីហាងខារ៉ាអូខេដោយមានស្រ្តីខារ៉ាអូខេម្នាក់ឈ្មោះ ចាន់ នី មកជាមួយផង។ ដោយសារតែអ្នកបើកបរស្រវឹងស្រាបញ្ជាចង្កូតរថយន្តមិនល្អទើបជ្រុលទៅបុករបងសាលាខេត្តធ្វើឲ្យរថយន្តរងការខូចខាតផ្នែកខាងមុខយ៉ាងដំណំ ។
កាលពីដើមឆ្នាំរថយន្ត១គ្រឿងម៉ាក CRV ពណ៌ទឹកប្រាក់បានបុកបង្គោលភ្លើងនៅខាងមុខសាលាខេត្តបណ្តាលឲ្យបាក់បង្គោលភ្លើងអគ្គិសនីអស់១ដើម ៕
ចែករំលែកព័តមាននេះ