រាជធានីភ្នំពេញ ៖ នៅព្រឹកថ្ងៃទី៦ តុលា ក្នុងបរិវេណសាលាឆាន់វត្ដច័ន្ទបូរីវង្ស ស្ថិតក្នុងសង្កាត់សំរោង ខណ្ឌសែនសុខ សម្ដេចវនរ័តណយ ច្រឹក បាននិមន្តជាព្រះអធិបតី និងមានការចូលរួមពីលោកឃួង ស្រេង អភិបាលខណ្ឌសែនសុខ និងមន្ដ្រីថ្នាក់ដឹកនាំសាលាខណ្ឌ-សង្កាត់ផ្ដល់អំណោយដល់ប្រជាពលរដ្ឋរងគ្រោះដោយទឹកជំនន់ចំនួន២០៩គ្រួសារ។ អំណោយដែលយកទៅចែកជូននោះ គឺក្នុង១គ្រួសារទទួលបានអង្ករ១០គីឡូក្រាម មី៥កញ្ចប់ ត្រីខ៤កំប៉ុង ទឹកស៊ីអីុវ១ដប ទឹកត្រី១ដប ទឹកដោះគោខាប់២កំប៉ុង និងប្រាក់១០.០០០រៀល ដោយចំណាយទឹកប្រាក់សរុបចំនួន១២លាន២០ម៉ឺន៥០០រៀល ជាបច្ច័យផ្ទាល់របស់សម្ដេចព្រះវនរ័តណយ ច្រឹក សម្ដេចព្រះសង្ឃនាយករងទី៣ និងជាចៅអធិការវត្ដច័ន្ទបូរីវង្ស។
ការផ្ដល់អំណោយដល់ប្រជាពលរដ្ឋរងគ្រោះនៅក្នុងសង្កាត់សំរោងនេះ គឺជាលើកទី៣ហើយ។ បន្ទាប់ពីលោកចៅសង្កាត់សំរោងអានរបាយការណ៍អំពីផលប៉ះពាល់ដោយគ្រោះទឹកជំនន់ទៅលើប្រជាពលរដ្ឋរស់នៅក្នុងសង្កាត់នេះរួចមក សម្ដេចព្រះវនរ័តណយ ច្រឹក បានមានសង្ឃដីកាថា ប្រជាពលរដ្ឋមិនត្រូវភ្លេចគុណគណបក្សប្រជាជនកម្ពុជាដែលបានជួយរំដោះឱ្យរួចផុតពីរបបប្រល័យពូជសាសន៍នៅថ្ងៃ៧មករា ឆ្នាំ១៩៧៩ នោះឡើយ ។ បានគុណបុណ្យថ្ងៃ៧មករា នេះហើយទើបធ្វើឱ្យញាតិញោមបានជួបជុំគ្រួសារមកដល់ថ្ងៃនេះ។
លោកឃួង ស្រេង អភិបាលខណ្ឌបានមានប្រសាសន៍ផងដែរថា អាជ្ញាធរខណ្ឌសែនសុខតែងតែយកចិត្ដទុកដាក់ចំពោះសុខទុក្ខប្រជាពលរដ្ឋដែលកំពុងរងគ្រោះដោយទឹកជំនន់នៅក្នុងសង្កាត់៣គឺសង្កាត់ពញាពន់ សង្កាត់សំរោង និងសង្កាត់ព្រែកព្នៅ ក្នុងនោះបានផ្ដល់អំណោយដល់ប្រជាពលរដ្ឋរងគ្រោះចំនួន៥៨២គ្រួសារ។លោកបន្ដថា សង្កាត់សំរោង ប្រជាពលរដ្ឋទទួលការលិចលង់ទាំងស្រុងចំនួន១៩៤គ្រួសារបានទទួលអំណោយសង្គ្រោះពីសាលារាជធានីភ្នំពេញម្ដងហើយ ។ លើកទី២ប្រជាពលរដ្ឋបានទទួលអំណោយចំនួន១៩៤គ្រួសារ និងលើកទី៣មានចំនួន២០៩គ្រួសារទៀតដែលសុទ្ធជាអំណោយរបស់សម្ដេចព្រះវនរ័តណយ ច្រឹក ទាំងអស់។
ឆ្លៀតក្នុងឱកាសដែលការបោះឆ្នោតក្រុមប្រឹក្សាឃុំ-សង្កាត់ជិតឈានជិតមកដល់នោះ លោកឃួង ស្រេង បានផ្ដាំផ្ញើដល់ប្រជាពលរដ្ឋថាមុននឹងធ្វើការបោះឆ្នោតត្រូវតែធ្វើការជ្រើសរើសថ្នាក់ដឹកនាំឱ្យបានត្រឹមត្រូវ ដើម្បីប្រទេសជាតិនិងកូនចៅយើងតទៅអនាគតទទួលបាននូវសុខសន្ដិភាព។ បើប្រទេសមានសុខសន្ដិភាព នឹងមានការអភិវឌ្ឍ ប្រជាពលរដ្ឋនឹងមានជីវភាពធូរធារជាក់ជាមិនខាន៕
ចែករំលែកព័តមាននេះ