រាជធានីភ្នំពេញ ៖ បុរសម្នាក់ត្រូវបានគេវាយស្ទើរសន្លប់ ខណៈពេលដែលរត់ទៅមើលម៉ូតូមួយគ្រឿង អូសជាប់ជាមួយរថយន្តដឹកក្រូចថ្លុង ហើយបក្សពួកខាងម៉ូតូច្រឡំស្មានតែអ្នកបើកបររថយន្ត ក៏ព្រួតគ្នាវាយតែម្តង ទម្រាំតែដឹងការពិត វាយជិតសន្លប់ទៅហើយ។ ហេតុការណ៍នេះបានកើតឡើងកាលពីវេលាម៉ោង១០និង១២នាទីយប់ថ្ងៃទី៦ តុលា នៅតាមផ្លូវលេខ២៣០ ស្ថិតក្នុងសង្កាត់ផ្សារដើមគ ខណ្ឌទួលគោក។
ប្រភពព័ត៌មានបានឱ្យដឹងថា មុនពេលកើតហេតុ គេបានឃើញរថយន្តកូរ៉ូឡា ម៉ាកសាំងយ៉ុង មួយគ្រឿង ពណ៌ស ពាក់ស្លាកលេខ ភ្នំពេញ 2D-0921 បានបើកដឹកបាវក្រូចថ្លុងពេញក្នុងរថយន្ត ពីភ្នំដិន ខេត្តតាកែវ យកមកបោះឱ្យអាជីវករ លក់ដូរនៅផ្សារនាគមាស។ ខណៈពេលបើករថយន្តមកជិតដល់ផ្សារនាគមាស បត់ពីខាងលិចផ្សារច្រឡំផ្លូវ ហើយរថយន្តក៏ថយក្រោយបម្រុងបត់ចេញមកវិញ ប៉ុន្តែពេលនោះ ស្រាប់តែមានម៉ូតូ១គ្រឿងម៉ាកឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AT-5917 បើកបានពីក្រោយ នៅពេលឃើញរថយន្តកំពុងតែបើកហើយជាន់ហ្វ្រាំងឈប់ដូច្នេះអ្នកបើក ម៉ូតូ១គ្រឿងនោះក៏ជាន់ហ្វ្រាំងឈប់ដែរ។
ប្រភពដដែលបានបន្តទៀតថា នៅពេលនោះរថយន្តដឹកបាវក្រូចថ្លុងក៏បើកថយក្រោយ បណ្តាលឱ្យបុកម៉ូតូដែលបានឈប់ពីក្រោយរថយន្ត ធ្វើឱ្យម៉ូតូដួលទៅជាប់នឹងខ្សែរឹតចងបាវក្រូចថ្លុងតែម្តង ចំណែកម្ចាស់ម៉ូតូបានលោតចេញពីម៉ូតូតែមិនបង្កឱ្យរងរបួសអ្វីនោះទេ ។ ស្របពេលនោះ ស្រាប់តែមានម៉ូតូចំនួន២គ្រឿងទៀតដែលជាបក្សពួករបស់ម្ចាស់ម៉ូតូម៉ាកឌ្រីមខាងលើនេះ បានជិះវ៉ារថយន្ត ប្រុងស្ទុះទៅវាយអ្នកបើកបររថយន្ត តែអ្នកបើកបរមិនហ៊ានឈប់ ក៏បើកបន្ថែមល្បឿនទៅមុខទៀត ប្រមាណ១០០ម៉ែត្រ ដល់ផ្លូវកាច់ជ្រុងក៏បើកទ្វាររត់គេចបាត់តែម្តង។
ប្រភពបានឱ្យដឹងបន្តទៀតថា រំពេចនោះស្រាប់តែមានបុរសម្នាក់ឈ្មោះរតនា អាយុ២៨ឆ្នាំ ស្នាក់នៅផ្ទះលេខ៥៤ ផ្លូវលេខ២៣០ ភូមិ៨ សង្កាត់ផ្សារដើមគ ដែលកំពុងតែអង្គុយលេងអុក ក្បែរនោះបានឃើញហេតុការណ៍ដូច្នេះ ក៏រត់ទៅឈរមើល ស្រាប់តែបក្សពួកដែលជិះម៉ូតូទាំង២គ្រឿងខាងលើនេះស្មានតែអ្នកបើកបររថយន្ត ក៏ឈប់ម៉ូតូរួចចុះទៅព្រួតគ្នាវាយទៅលើបុរសឈ្មោះរតនានោះតែម្តង៕
ចែករំលែកព័តមាននេះ