រាជធានីភ្នំពេញ ៖ កាលពីរសៀលថ្ងៃទី៦ ខែតុលា ឆ្នាំ២០១១ ប្រជាពលរដ្ឋរងគ្រោះដោយទឹកជំនន់ចំនួន១០១គ្រួសាររស់នៅភូមិទី១៦ សង្កាត់ស្រះចក ខណ្ឌដូនពេញ បានទទួលអំណោយពីសាខាកាកបាទក្រហមកម្ពុជា រាជធានីភ្នំពេញ ។ ពិធីចែក អំណោយនោះធ្វើឡើងក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានី និងជាអនុប្រធានកិត្តិយសសាខាកាកបាទក្រហមកម្ពុជា រាជធានីភ្នំពេញ ដោយបានការចូលរួមពីលោកសុខ សម្បត្តិ អភិបាលខណ្ឌ លោកហែម អាន ប្រធានក្រុមប្រឹក្សាខណ្ឌដូនពេញ ព្រមទាំងមន្រ្តីរាជការក្រោមឱវាទជាច្រើនរូបទៀត ។
នៅក្នុងឱកាសចែកអំណោយនោះ លោកម៉ប់ សារិន បានអំពាវនាវឲ្យប្រជាពលរដ្ឋយកចិត្តទុកដាក់ក្នុងការថែរក្សាសុខភាព ដើម្បីចៀសផុតពីជំងឺផ្សេងៗដោយឈរលើបទដ្ឋានអនាម័យ ហើយត្រូវយកចិត្តទុកដាក់ពីសុវត្ថិភាពផ្ទាល់ខ្លួន និងការពារកុមារកុំឲ្យលេងទឹកនិងនៅផ្ទះម្នាក់ឯង។ ជាមួយគ្នានេះដែរ សម្តេចអគ្គមហាសេនាបតីតេជោ ហ៊ុន សែន បានណែនាំដល់ក្រុមការងារឱ្យចុះជួយតាមខេត្ត-រាជធានី-ខណ្ឌ ត្រូវយកចិត្តទុកដាក់ដល់ប្រជាពលរដ្ឋនៅក្នុងមូលដ្ឋានរបស់ខ្លួន។ ឯកាកបាទក្រហមកម្ពុជាត្រូវធ្វើសកម្មភាពទៅតាមគោលដៅនីមួយៗ ដោយមិនត្រូវទុកឲ្យប្រជាពលរដ្ឋណាម្នាក់ស្លាប់ដោយអត់អាហារ ដោយមិនបានដឹងមិនបានជួយសង្គ្រោះនោះទេ។
អំណោយដែលលោកម៉ប់ សារិន ប្រធានក្រុមប្រឹក្សា និងជាអនុប្រធានកិត្តិយសកាកបាទក្រហមកម្ពុជារាជធានីភ្នំពេញនាំយកទៅចែកជូនប្រជាពលរដ្ឋរងគ្រោះ១០១គ្រួសារនោះ ក្នុងមួយគ្រួសារៗទទួលបានអង្ករ ១០គីឡូក្រាម មី១៥កញ្ចប់ ត្រីខ៥កំប៉ុង ទឹកត្រី៣ដប ទឹកស៊ីអ៊ីវ៣ដប និងទឹកបរិសុទ្ធ១យួរ។ ជាមួយនេះលោកម៉ប់ សារិន ក៏បានឧបត្ថម្ភថវិកាផ្ទាល់ខ្លួនលោកក្នុងមួយគ្រួសារៗ២ម៉ឺនរៀលផងដែរ៕
ចែករំលែកព័តមាននេះ