បណ្តា​ផ្សារហ៊ុន​និងទំនិញ​នានាបាន​ងើបឡើង​​វិញនា​ថ្ងៃទី៦ ​តុលា​ បន្ទាប់ពី​មានព័ត៌មាន​​សុទិដ្ឋិ​និយម​​ពីទ្វីប​អឺរ៉ុប​ក្នុងការ​គ្រប់គ្រង​​វិបត្តិ​ប្រាក់​​បំណុល​ក្នុងតំបន់​ និង​ទិន្នន័យ​សេដ្ឋកិច្ច​​អាមេ​រិក​​ល្អ​ប្រសើរ​ជាងការ​រំពឹងទុក​។ តម្លៃប្រាក់​​អឺរ៉ូ​ប្រែ​ប្រួល​តម្លៃល្អ​ប្រសើរ​បន្តិចធៀប​ជាមួយ​​ប្រាក់​ដុល្លារ​ មុនពេល​កិច្ចប្រជុំ​របស់​ធនាគារ​​កណ្តាល​​​អឺរ៉ុប​។​

ផ្សារហ៊ុន​ពិភពលោក​ទាំងមូល​បានកើន​ឡើង​០,៩ភាគរយ ​គិតត្រឹមម៉ោង៣និង៥នាទី​​ម៉ោង​នៅក្នុង​ទីក្រុងតូក្យូ។ ​ចំណែកផ្សាហ៊ុន​អាមេរិក​​Standard&Poor 500 ​កើនឡើងបន្តិចតិច​​ជាង​០,១ភាគរយ ​ស្របពេលក្រុមហ៊ុន​ Apple បាន​ធ្លាក់ចុះប្រហែល៥,៣​ភាគរយក្នុងការជួញដូរក្នុង​ប្រទេស​អាល្លឺម៉ង់ បន្ទាប់ពីក្រុមហ៊ុន​ប្រកាស​ថា ​ស្ថាបនិក Steve Jobs​ ​ស្លាប់ក្នុងអាយុ៥៦ឆ្នាំ ​ដោយ​សារជំងឺមហារីក។​ ចំណែកតម្លៃប្រាក់​អឺរ៉ូ​ប្តូរបាន​១,៣៣៤៤ដុល្លារក្នុងមួយអឺរ៉ូឡើង​ថ្លៃពី​ថ្ងៃទី៥​តុលា ​ដែលប្តូរបាន ​១,៣៣៤៨​ដុល្លារ​ក្នុង​​មួយ​អឺរ៉ុប។ ​ចំណែកផ្សារហ៊ុន S&P GSCI​ ក្នុង​វិស័យទំនិញបានកើនឡើង​០,៤ភាគរយ ស្រប​ពេលស្ពាន់កើន​ឡើង២,២ភាគរយ បន្ទាប់​ពី​​ធ្លាក់ចុះស្ទើរពេញមួយសប្តាហ៍។

មន្ត្រីសហភាពអឺរ៉ុបកំពុងពង្រីកមូល​ធន​របស់​ធនាគារដើម្បីទប់ស្កាត់វិបត្តិប្រាក់​បំណុល។ នេះបើតាម IMF។ អ្នក​វិនិ​យោគ​កំពុង​ទន្ទឹង​រង់​ចាំទិន្នន័យការងារដើម្បីវាស់​ស្ទង់កម្លាំងនៃការ​ស្តារ​សេដ្ឋកិច្ចសហរដ្ឋអាមេរិក បន្ទាប់ពីមានព័ត៌​មាន​ចេញផ្សាយកាលពីថ្ងៃទី៥ តុលាថា មានការ​កើន​ឡើងលឿនជាង​ការ​រំពឹង​ទុកទាំងផ្នែក​ប្រាក់​ខែ និងឧស្សាហ​កម្ម​ការងារ ។​ តែអាមេរិក​ពេល​នេះក៏​បាត់បង់អ្នកបង្កើតក្រុមហ៊ុនបច្ចេក​វិទ្យា​ដែល​មានតម្លៃបំផុតលើលោកគឺក្រុមហ៊ុន Apple ដោយបាត់បង់ស្ថាបនិក Steve Jobs។

ទីផ្សារចាប់ផ្តើមមានសុទិដ្ឋិនិយមបន្តិច​ដោយ​សារក្តីសង្ឃឹមលើអ្នកនយោបាយអឺរ៉ុប​ក្នុង​ការ​​ស្វែងរកដំណោះស្រាយ ជាពិសេសការ​ដោះ​ស្រាយ ​ចំពោះធនាគារអឺរ៉ុប។ នេះបើតាម​សំដី​របស់​​លោក​ Tim Schroeders ជាប្រធាន​ក្រុម​ហ៊ុន ​​Pengana Capital Ltd ក្នុងទីក្រុង​Melbourn​។​ គាត់បន្តថា ទិន្នន័យចុង​ក្រោយ​របស់​សហរដ្ឋអាមេរិក ជាសញ្ញាមួយល្អ​ ហើយ​ថា សេដ្ឋ​កិច្ច​អាមេរិកមាន​លំនឹងហើយ។

ចំណែកផ្សារហ៊ុនអឺរ៉ុប Stoxx Europe 600 កើនឡើង០,៥ភាគរយ ។ ឯផ្សារហ៊ុនអាល្លឺម៉ង់​កើន​ឡើង០,៦ភាគរយ ឯនៅ​បារាំង​​វិញ​CAC​ 40 កើនឡើង០,៩ភាគរយ ស្រប​ពេល​ផ្សារ​​ហ៊ុននៅអង់គ្លេស FTSE 100 កើន​ឡើង​០,៧​​ភាគរយ។

ចំណែកផ្សារហ៊ុននៅអាស៊ីវិញ ដូចជា​ផ្សារ​ហ៊ុនអាស៊ីប៉ាស៊ីហ្វិក MSCI កើនឡើង​២,៩​ភាគ​រយ ឯផ្សារហ៊ុនជប៉ុន Nikkei 225 កើន​ឡើង​១,៧ភាគរយ អូស្រ្តាលី S&P/ASX កើន​ឡើង​៣​,៧ភាគរយ ចំណែកផ្សារហ៊ុនកូរ៉េខាង​ត្បូង Kospi កើនឡើង២,៦ភាគរយ។ ចំណែក​ផ្សារ​ហ៊ុនហុងកុង Hang Seng កើន​ឡើង​៥​ភាគរយ ស្របពេលផ្សារហ៊ុនចិន និងឥណ្ឌា​បិទ​​ទ្វារ​។

សេវាការងារ ADP បង្ហាញថា ក្រុមហ៊ុននៅ​សហរដ្ឋអាមេរិកបានបន្ថែមបុគ្គលិកចំនួន​៩១.០០០​នាក់​ក្នុងខែកញ្ញា។ តម្លៃប្រេងកើនឡើង០,៦ភាគរយ មាន​តម្លៃ​៨០,១៥ដុល្លារក្នុងមួយបារ៉ែល​នៅទីផ្សារញូវ​យ៉ក៕