លោក ត្រាំ ប្រកាសពីការដំឡើងពន្ធទ្វេដងលើការនាំចូលដែកថែប និងអាលុយមីញ៉ូម
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា សហរដ្ឋអាមេរិកនឹងដំឡើងពន្ធទ្វេដងលើការនាំចូលដែកថែប…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា សហរដ្ឋអាមេរិកនឹងដំឡើងពន្ធទ្វេដងលើការនាំចូលដែកថែប និងអាលុយមីញ៉ូមនាពេលបច្ចុប្បន្នពី ២៥% ទៅ ៥០% ដោយចាប់ផ្តើមពីថ្ងៃទី៤ ខែមិថុនា ឆ្នាំ២០២៥ តទៅ។ នេះបើយោងតាមប្រភពពីសារព័ត៌មាន BBC ចេញផ្សាយកាលពីថ្ងៃទី៣០ ខែឧសភា ឆ្នាំ២ឥ២៥។
ថ្លែងនៅឯការជួបជុំគ្នាមួយ នៅក្នុងទីក្រុងភីតស៍ប៊ឺក (Pittsburgh) នៃរដ្ឋផេនស៊ីលវ៉ានៀ (Pennsylvania) កាលពីថ្ងៃសុក្រ លោក ត្រាំ បានប្រកាសថា វិធានការដំឡើងពន្ធទ្វេដងលើការនាំចូលដែកថែប និងអាលុយមីញ៉ូមនេះ នឹងជួយជំរុញឧស្សាហកម្មដែកក្នុងស្រុក និងការផ្គត់ផ្គង់ជាតិ ដោយកាត់បន្ថយការពឹងផ្អែកលើប្រទេសចិន។ លោកក៏បានបញ្ជាក់ផងដែរថាទឹកប្រាក់ចំនួន១៤ពាន់លានដុល្លារ នឹងត្រូវបានវិនិយោគលើការផលិតដែកក្នុងតំបន់នេះ តាមរយៈភាពជាដៃគូរវាង US Steel និង Nippon Steel របស់ប្រទេសជប៉ុន បើទោះបីជាក្រោយមក លោកបានប្រាប់អ្នកយកព័ត៌មានថា លោកមិនទាន់ឃើញ ឬយល់ព្រមលើកិច្ចព្រមព្រៀងចុងក្រោយក៏ដោយ។
សេចក្តីប្រកាសនេះ គឺជាការប្រកាសចុងក្រោយបង្អស់ក្នុងសាស្ត្រយុទ្ធ Rollercoaster របស់លោក ត្រាំ ចំពោះពន្ធគយចាប់តាំងពីការចូលកាន់តំណែងម្តងទៀតតបស់លោក នៅក្នុងខែមករាកន្លងទៅ។ លោក ត្រាំ បានប្រាប់ហ្វូងអ្នកចូលរួមពោរពេញដោយកម្មករដែក ដើម្បីអបអរសាទរថានឹងគ្មានការបញ្ឈប់ការងារ និងគ្មានប្រភពខាងក្រៅណាមួយលើវិស័យនេះ ហើយកម្មករដែកអាមេរិកគ្រប់រូបនឹងទទួលបានប្រាក់រង្វាន់៥ពាន់ដុល្លារក្នុងពេលឆាប់ៗនេះ។
ទោះយ៉ាងណាក៏ដោយ កង្វល់ចម្បងមួយរបស់កម្មករដែកថែបអំពីកិច្ចព្រមព្រៀងពាណិជ្ជកម្មរវាងសហរដ្ឋអាមេរិក និងជប៉ុន គឺអំពីរបៀបដែលប្រទេសជប៉ុននឹងគោរពកិច្ចសន្យារបស់សហជីពកម្មករដែលគ្រប់គ្រងលើប្រាក់ឈ្នួល និងការជួល។ សុន្ទរកថាមានរយៈពេលប្រហែលមួយម៉ោងរបស់លោក ត្រាំ បានបង្ហើបពីកិច្ចព្រមព្រៀងដែលលោកបានធ្វើជាមួយក្រុមហ៊ុន Nippon Steel របស់ជប៉ុន ប៉ុន្តែលោកមិនបានផ្តល់ព័ត៌មានលម្អិតថ្មីណាមួយឡើយ។
សូមជម្រាបជូនថា ក្រុមហ៊ុន US Steel កាលពីខែធ្នូ ឆ្នាំ២០២៣ បានយល់ព្រមលក់សិទ្ធិកាន់កាប់ទៅឱ្យក្រុមហ៊ុន Nippon Steel ក្នុងកិច្ចព្រមព្រៀងមានតម្លៃ១៥ពាន់លានដុល្លារ មុនពេលត្រូវបានរារាំងដោយប្រធានាធិបតីអាមេរិក លោក ចូ បៃដិន (Joe Biden) កាលលោកនៅកាន់តំណែង លើហេតុផលសន្តិសុខជាតិ។
មន្ត្រីសេតវិមានបានអះអាងថា លោក ត្រាំ បានបញ្ចុះបញ្ចូលក្រុមហ៊ុន Nippon Steel ឱ្យជំរុញការវិនិយោគរបស់ខ្លួននៅក្នុងទឹកដីសហរដ្ឋអាមេរិក និងផ្តល់ឱ្យរដ្ឋាភិបាលនូវគន្លឹះសំខាន់ៗជុំវិញប្រតិបត្តិការនៃរោងចក្រនៅសហរដ្ឋអាមេរិក។ បើយោងទៅតាមប្រព័ន្ធផ្សព្វផ្សាយអាមេរិកបានរាយការណ៍ថា ប្រទេសជប៉ុនគ្រោងនឹងវិនិយោគ១៤ពាន់លានដុល្លារក្នុងរយៈពេល១៤ខែ៕
ចែករំលែកព័តមាននេះ