រាជធានីភ្នំពេញ ៖ អ្នករងការពុលស្រា.សក្អួតចង្អោរប្រកាច់ប្រកិននៅស្រុកក្រគរ ខេត្តពោធិ៍សាត់ បានស្លាប់២នាក់ទៀតហើយ ខណៈបញ្ជូនមកកាន់មន្ទីរពេទ្យកាល់ម៉ែត្រ រាជធានី ភ្នំពេញ ប៉ុន្តែបានត្រឹមតែពាក់កណ្តាលផ្លូវប៉ុណ្ណោះក៏ស្លាប់ ចំណែក៥៥នាក់ទៀតបានមកដល់មន្ទីរពេទ្យកាល់ម៉ែត កាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី៧ តុលា ២០១១ ហើយកំពុងត្រូវបានគ្រូពេទ្យព្យាបាលសង្គ្រោះបន្ទាន់។
សូមបញ្ជាក់ថា អ្នកជំងឺពុលស្រា.សទាំង៥៥នាក់នេះ មានស្រី៨នាក់ ធ្ងន់ធ្ងរ៩នាក់ ហើយមានម្នាក់ធ្ងន់ធ្ងរដល់កម្រិតត្រូវគ្រូពេទ្យលាងឈាមទៀតផង។ តាមក្រុមគ្រួសារអ្នកពុលស្រាបាននិយាយថា អ្នកជំងឺពុលស្រាមាន៥៧នាក់ ត្រូវបញ្ជូនមកសង្គ្រោះនៅមន្ទីរពេទ្យកាល់ម៉ែតរាជធានីភ្នំពេញ ប៉ុន្តែស្តាយណាស់ ពួកគេបានស្លាប់តាមផ្លូវ២នាក់បាត់ទៅហើយ ដូច្នេះនៅសល់តែ៥៥នាក់ប៉ុណ្ណោះ ដែលត្រូវចូលទៅសង្គ្រោះនៅមន្ទីពេទ្យកាល់ម៉ែត។ ក្រុមគ្រូពេទ្យនៅមន្ទីរកាល់ម៉ែត បាននិយាយថា អ្នកជំងឺពុលស្រា.សទាំងនេះ គឺពុលជាតិមេតាពុលខ្លាំងក្លា…។
គួររំលឹកឡើងវិញថា យ៉ាងហោចណាស់មនុស្ស៦នាក់ស្លាប់ជាបន្តបន្ទាប់ (ឥឡូវស្លាប់៨នាក់ហើយ) និង៧២នាក់ផ្សេងទៀតត្រូវគេបញ្ជូនទៅសង្គ្រោះនៅមន្ទីរពេទ្យដោយពុលស្រា.ស ដែលក្នុងចំណោមនេះមានស្ត្រី១០នាក់។ មិនមែនជាលើកដំបូងនោះទេ ជុំវិញករណីពុលស្រា.សនេះដែលកន្លងមកមានមនុស្សស្លាប់ និងប៉ះពាល់សុខភាពនៅស្រុកភ្នំក្រវាញរួចមកហើយ និងមិនទាន់រកឃើញពីសារធាតុដែលបណ្តាលឱ្យពុលនៅឡើយទេ។ ករណីពុលស្រា.សលើកនេះ កើតឡើងនៅភូមិមាត់ព្រៃ ឃុំកំពង់ពោរ ស្រុកក្រគរ ខេត្តពោធិ៍សាត់ ដែលកាលពីខែមុននេះមានពុលម្តងហើយនៅស្រុកវាលវែង។
លោកភី ភឿន មេឃុំកំពង់ពោរបានប្រាប់ឱ្យដឹងថា កាលពីថ្ងៃទី៤ តុលា ២០១១ ឈ្មោះមាន សាវី បានទិញស្រា.សពីតូបឈ្មោះស៊ុប ហួន មេភូមិមាត់ព្រៃមកផឹកក៏ពុលស្លាប់ម្នាក់ឯងដោយពុំមានអ្នកណាដឹងថា មកពីពុលស្រាទេ។ នៅថ្ងៃទី៥ តុលា ឈ្មោះអ៊ុន អូត បានទៅជួយបុណ្យឃើញស្រាសនៅសល់ក៏ផឹកបង្ហើយ លុះប៉ុន្មានម៉ោងក្រោយមកក៏ដើរដួលស្លាប់ ទៀត។ សពជនរងគ្រោះទាំងពីរបានធ្វើបុណ្យបន្តគ្នាយ៉ាងទ្រហឹងអឺងកងពេញភូមិ។ ដោយឃើញអ្នកស្រុកអ្នកភូមិក្មេងចាស់ ប្រុស ស្រីមកជួយបុណ្យច្រើននោះ គ្រួសារសពបានទិញស្រា.សមួយប៊ីដុងមកចែកគ្នាផឹកដើម្បីកំដររោង ព្រោះអត់ដឹងថា អ្នកទាំងពីរស្លាប់បណ្តាលមកពីផឹកស្រាទេ ស្មានថា ខ្យល់គរ។ ពេលកំពុងផឹកនោះមានអ្នកខ្លះវិលមុខធីងធោង ខ្លះក្អួតចង្អោររាករូសស្មានថា ស្រវឹងធម្មតា។
រហូតដល់ម៉ោង៦ល្ងាចមានអ្នកស្លាប់ម្នាក់ទៀត ហើយអ្នកក្អួតទន់ដៃទន់ជើងកាន់តែច្រើនឡើងនោះទើបសង្ស័យរឿងពុលស្រា.សក៏ជ្រួលច្របល់វឹកវរភ្ញាក់ផ្អើលពេញភូមិ និងបានដឹកជញ្ជូនមកសង្គ្រោះព្យាបាលនៅមន្ទីរពេទ្យខេត្តពោធិ៍សាត់២រថយន្តដេករដូករណែលទាំងស្រាល និងធ្ងន់ ហើយនៅយប់នោះបានស្លាប់៣នាក់ទៀត។ សរុបអ្នកស្លាប់ទាំង៦នាក់ ១-ឈ្មោះមាន សាវី ភេទប្រុស អាយុ៤៥ឆ្នាំ, ២-អ៊ុន អូន ភេទប្រុស អាយុ៧៥ឆ្នាំ, ៣-ក្រូច ស្តើង ភេទស្រី អាយុ៥១ឆ្នាំ, ៤-គិត សុង ភេទស្រី អាយុ៦៥ឆ្នាំ, ៥-ស៊ឹម ជាង ភេទប្រុស អាយុ៣២ឆ្នាំ និង៦-តឹម គឹមសាន្ត ភេទប្រុស អាយុ២៣ឆ្នាំ។ ចំណែកជនរងគ្រោះដែលកំពុងសំរាកព្យាបាលនៅមន្ទីរពេទ្យមានចំនួន៥២នាក់ ក្នុងនោះធ្ងន់ធ្ងរខ្លាំង៣នាក់ដែលសង្ឃឹមរស់តិចបំផុត។ ទាំងអ្នកស្លាប់ ទាំងអ្នករស់សុទ្ធតែនៅភូមិមាត់ព្រៃ ឃុំកំពង់ពោរជាមួយគ្នា។ អ្នកលក់ស្រា.សឈ្មោះស៊ុប ហួន ក៏ពុលដេកពេទ្យដែរ ហើយគាត់បានប្រាប់សមត្ថកិច្ចថា ស្រានេះគាត់យកបន្តពីឈ្មោះគឹម ប្រាជ្ញា ភេទស្រី នៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់។
នៅព្រឹកថ្ងៃទី៦ តុលា ២០១១ លោកប៉ង់ ច័ន្ទសុយុទ្ធារ៉ា ព្រះរាជអាជ្ញាអមសាលាដំបូងខេត្តបានដឹកនាំកម្លាំងសមត្ថកិច្ចចុះឆែកឆេរក្នុងលំនៅឋានស្រ្តីឈ្មោះគឹម ប្រាជ្ញា នេះដើម្បីរកវត្ថុតាងស្រាដែលផឹកទៅបណ្តាលឱ្យពុលមនុស្សស្លាប់។ ពេលត្រួតពិនិត្យឃើញមានតែអាល់កុល៣ប៊ីដុងប៉ុណ្ណោះ និងបន្តទៅឆែកផ្ទះអាជីវករ៣កន្លែងទៀត ដែលពាក់ព័ន្ធគ្នារកឃើញស្រា.សបិតរួម៤ប៊ីដុង និងអាល់កុល១៨ប៊ីដុង ថែមទៀត។ បន្ទាប់ពីឆែកឆេររួចសមត្ថកិច្ចបានសម្រេចឃាត់ខ្លួនប្តីអ្នកស្រីគឹម ប្រាជ្ញា ឈ្មោះប៊ុន ឡៃហ៊ាង អាយុ៣៨ឆ្នាំ បណ្តោះអាសន្នសិន ដើម្បីសួរនាំ ។ រីឯវត្ថុតាងស្រា.ស និងអាល់កុលបានរក្សាទុកនៅស្នងការដ្ឋាននគរបាលខេត្តពោធិ៍សាត់ដើម្បីប្រគល់ជូនជំនាញឧស្សាហកម្ម កាំកុងត្រូល និងក្រសួងមហាផ្ទៃធ្វើពិសោធន៍។
គួររំលឹកថា កាលពីថ្ងៃទី២០ ដល់ថ្ងៃទី២៣ សីហា ឆ្នាំ២០១១ កន្លងទៅថ្មីៗនេះ នៅភូមិស្ទឹងថ្មី ឃុំប្រមោយស្រុកវាលវែង មានមនុស្សពុលស្រា.សស្លាប់៦នាក់ រងគ្រោះ២៤នាក់ ។ ក្រោយមកនៅថ្ងៃទី៥ កញ្ញា ២០១១ នៅភូមិដីក្រហម ឃុំអន្លង់រាប ស្រុកវាលវែងដដែលពុលស្លាប់៤នាក់ទៀត។ ដោយឡែកលើកនេះនៅភូមិមាត់ព្រៃ ឃុំកំពង់ពោរ ស្រុកក្រគរមានករណីពុលស្រា.សស្លាប់៦នាក់ និងរងគ្រោះ៧២នាក់។
ករណីពុលស្រា.សស្លាប់ និងប៉ះ ពាល់មនុស្សជាញឹកញាប់នៅខេត្តពោធិ៍សាត់បានធ្វើឱ្យមជ្ឈដ្ឋានខាងក្រៅមានការចាប់អារម្មណ៍យ៉ាងខ្លាំងដែលគួរតែចុះត្រួតពិនិត្យនៅតាមសិប្បកម្មបិតស្រា និងមានវិធានការឱ្យបានម៉ត់ចត់ចៀសវាងគ្រោះថ្នាក់បន្តបន្ទាប់ដូចមាន់ ទាទទេៗបែបនេះទៀត៕
ចែករំលែកព័តមាននេះ