ខេត្តកំពង់ចាម ៖ សំឡេងទូងស្គរបានបន្លឺឡើងយ៉ាងកងរំពងចេញពីវត្តមុនីកោសល្យ ហៅវត្តសង្កើប ស្ថិតនៅឃុំសំបូរ ស្រុកបាធាយ ជាសញ្ញាប្រកាសអាសន្នបានធ្វើឱ្យពុទ្ធបរិស័ទចំណុះជើងវត្ត នៅគ្រប់ទិសទីនាំគ្នាមកពេញវត្ត ដោយក្នុងដៃប្រដាប់ទៅដោយកាំបិត ពូថៅ នាយប់ថ្ងៃទី២ កញ្ញា ឆ្នាំ២០១១។ ទីបំផុតចោរដាច់យ៉ៃក្នុងចំណោមបក្សពួក៣នាក់ ឈ្មោះទឹម តន ភេទប្រុស អាយុ១៧ឆ្នាំ ដែលមានទីលំនៅភូមិពកោង ឃុំព្រះស្រែ ស្រុកឧដុង្គ ខេត្តកំពង់ស្ពឺ ត្រូវបានប្រជាពលរដ្ឋ និងសមត្ថកិច្ចព័ទ្ធក្របួចជាប់និងដកហូតបានម៉ូតូC100 កូរ៉េ កញ្ចាស់មួយគ្រឿងបញ្ជូនទៅកាន់ស្នងការដ្ឋាននគរបាលខេត្ត។
តាមព័ត៌មានពីលោកអនុសេនីយ៍ឯកសំ ណាល់ អធិការនគរបាលស្រុកបាធាយ បានប្រាប់កោះសន្តិភាពឱ្យដឹងថា កាលពីវេលាម៉ោង៨យប់ថ្ងៃខាងលើ នៅចំណុចថ្នល់ដាច់ខាងត្បូងសាលាស្រុកបាធាយ ចម្ងាយ២៥០ម៉ែត្រ ស្ថិតនៅភូមិបាធាយ ឃុំបាធាយ ស្រុកបាធាយ មានចោរលួចយកម៉ូតូម៉ាក C100 កូរ៉េមួយគ្រឿងកញ្ចាស់ ដែលទុកបញ្ឈរចោលនៅក្បែរស្ពានដោយម្ចាស់ដេកលក់១ភាំង។
ប្រភពបានបន្តថា ម៉ូតូនេះជាកម្មសិទ្ធិរបស់ឈ្មោះថន ធា ភេទប្រុស អាយុ៣៩ឆ្នាំ រស់នៅភូមិទួល ឃុំបាធាយ ស្រុកបាធាយ ដែលនៅយប់នោះម្ចាស់បានមកប្តឹងនគរបាលប៉ុស្តិ៍រដ្ឋបាលឃុំបាធាយ ដើម្បីឱ្យជួយអន្តរាគមន៍តាមរកម៉ូតូដែលចោរលួចយកទៅបាត់ ព្រោះមិនមានអ្វីសម្រាប់ជិះជាមធ្យោបាយដឹកត្រីលក់ទៀតនោះទេ។ ក្រោយពេលទទួលបានព័ត៌មាននេះ លោកនាយប៉ុស្តិ៍រូបនោះ បានបញ្ជាតាមទូរស័ព្ទទៅប៉ុស្តិ៍ជាលា និងប៉ុស្តិ៍រដ្ឋបាលសំបូរឱ្យជួយអន្តរាគមន៍ ចាំស្ទាក់ចាប់ជនសង្ស័យណាដែលមានភិនភាគជិះម៉ូតូ C100 កូរ៉េ ពណ៌ខៀវ មកសាកសួរ។ រហូតដល់វេលាម៉ោង៩និង៣០នាទីយប់ ជនសង្ស័យឈ្មោះទឹម តន បានជិះម៉ូតូរត់គេចរហូតដល់ភូមិសង្កើប ឃុំសំបូរ ស្រុកបាធាយ ស្របពេលនោះម៉ូតូអស់សាំងជិះមិនកើតក៏បណ្តើរចូលមកដើម្បីលាក់ខ្លួននៅក្នុងវត្តសង្កើប តែដោយសារព្រះសង្ឃគង់នៅក្នុងវត្ត នោះ មានការសង្ស័យក៏បានវាយស្គរបន្លឺឡើងយ៉ាងកងរំពងប្រកាសអាសន្នទាំងយប់ដាស់ដល់ពុទ្ធបរិស័ទចំណុះជើងវត្តជិតឆ្ងាយភ្ញាក់ផ្អើលមកពេញវត្តតែម្តង។ ប្រជាពលរដ្ឋជាច្រើននាក់បាននាំគ្នារង់ចាំមើលនៅតាមដងផ្លូវ មិនយូរប៉ុន្មានស្រាប់តែបានប្រទះឃើញជនសង្ស័យឈ្មោះទឹម តន កំពុងតែបណ្តើរម៉ូតូដោយនិយាយទូរស័ព្ទហៅបក្សពួករបស់ខ្លួន២នាក់ទៀតដែលជិះរថយន្តឱ្យមកទទួលយករំពេចនោះក៏ធ្វើការឃាត់ខ្លួនតែម្តង។
នៅចំពោះមុខសមត្ថកិច្ច ជនសង្ស័យឈ្មោះទឹម តន ឆ្លើយសារភាពថា មុនពេលកើតហេតុរូបគេបានជិះរថយន្តកាមរីគូទស្វិត ពណ៌ស ជារបស់ឈ្មោះធី និងឈ្មោះភា។ ពេលធ្វើដំណើរមកដល់ស្រុកបាធាយ នាយប់ថ្ងៃទី២ តុលា ឆ្នាំ២០១១ បានចុះនៅចំណុចថ្នល់កែងប្រមាណជាកន្លះម៉ោងក្រោយមក រូបគេបានលួចកាច់សោយកម៉ូតូបាន១គ្រឿង ជិះចេញបានប្រហែល២គីឡូម៉ែត្រ ស្រាប់តែម៉ូតូអស់សាំង។ បន្ទាប់មកបានទូរស័ព្ទហៅបក្សពួកឱ្យទិញសាំងកន្លះលីត្រមកឱ្យរូបគេដើម្បីចាក់ជិះបន្តទៀត។
ជនសង្ស័យឈ្មោះទឹម តន បន្តថា បន្ទាប់ពីឈ្មោះធី បើករថយន្តយកសាំងមកហុចឱ្យរូបគេនោះប្រជាពលរដ្ឋមានការសង្ស័យបានហៅឱ្យឈប់ តែមិនព្រមឈប់នោះទេក៏ត្រូវប្រជាពលរដ្ឋគប់បែកកញ្ចក់រថយន្តខាងក្រោយ ហើយបន្ថែមល្បឿនបើករត់គេចបាត់ស្រមោល ។ ពេលនោះ សល់តែរូបគេម្នាក់ត្រូវបានប្រជាពលរដ្ឋស្ទាក់ដេញចាប់ជាប់ និងកាប់ត្រូវក្បាល១ពូថៅរយះហូរឈាមស្រោចខ្លួននិងវាយដំឡើងខៀវភ្នែកម្ខាង៕
ចែករំលែកព័តមាននេះ