ខេត្តកំពង់ឆ្នាំង ៖ កម្មការិនីរោងចក្រ M&V ដែលមានទីតាំងស្ថិតនៅភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង ប្រមាណជាង១.០០០នាក់ បាននាំគ្នាធ្វើកូដកម្មមិនចូលធ្វើការដើម្បីប្រឆាំងតវ៉ានឹងម្ចាស់រោងចក្រដោយទាមទារ៨ចំណុច ដែលពួកគេចង់បាន ។ ការធ្វើកូដកម្មនេះបានចាប់ផ្តើមនៅវេលាម៉ោង១២និង៣០នាទីរសៀលថ្ងៃទី៦ តុលា ដោយមានការដាក់មីក្រូស្រែកផង ។
ក្នុងលិខិតទាមទាររបស់លោកជា មុនី ប្រធានសហជីពសេរីកម្មករបានលើកឡើងនិងជម្រាបជូនលោកនាយកក្រុមហ៊ុនតម្បាញ M&V ខេត្តកំពង់ឆ្នាំង ថា សហជីពសេរីកម្មករបានដាក់ពាក្យបណ្តឹងទៅលោករដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ កាលពីថ្ងៃទី២១ ខែកញ្ញា ដើម្បីសុំជួយធ្វើអន្តរាគមន៍និងបានដាក់ពាក្យជូនដំណឹងស្តីពីការធ្វើកូដកម្មតាមច្បាប់កំណត់ដើម្បីទាមទារដូចខាងក្រោម៖
១-ទាមទារឱ្យនាយកក្រុមហ៊ុនទទួលយកថ្នាក់ដឹកនាំសហជីព រួមទាំងសកម្មជនមួយចំនួនទៀតដែលក្រុមហ៊ុនបានបញ្ឈប់ពីការងារ។
២-ទាមទារឱ្យក្រុមហ៊ុនមានថ្នាំពេទ្យគ្រប់គ្រាន់ និងគ្រូពេទ្យប្រចាំការចំពោះកម្មការិនីវេនយប់។ ៣-ទាមទារឱ្យក្រុមហ៊ុនរៀបចំកន្លែងហូបបាយចំពោះកម្មករ-កម្មការិនីវេនយប់ ។
៤-ចំពោះកម្មករ-កម្មការិនីវេនយប់ឈឺឬសន្លប់ក្រុមហ៊ុនមិនត្រូវដេញឱ្យទៅផ្ទះទាំងយប់ ដោយមិនគិតពីសុវត្ថិភាពឡើយ ។
៥-មិនត្រូវឱ្យកម្មករ-កម្មការិនីធ្វើការមួយខែស្មើ៣០ថ្ងៃ ដោយមិនគិតថ្ងៃបុណ្យនិងថ្ងៃអាទិត្យឡើយ។
៦-បើកម្មករ-កម្មការិនីណាមិនមកធ្វើការថ្ងៃបុណ្យឬថ្ងៃអាទិត្យត្រូវតែកាត់ប្រាក់រង្វាន់និងប្រាក់ប្រចាំថ្ងៃ។
៧-ចំពោះអគារស្វ័យប្រវត្តិកុំព្យូទ័រមានកម្មករ៤០០នាក់ធ្វើការកន្លះខែយប់ កន្លះខែថ្ងៃមានការគាបសង្កត់យ៉ាងខ្លាំង។
៨-ពិបាកក្នុងការសុំច្បាប់ពេលមានធុរៈចាំបាច់ម្តងម្កាល ដូចជាឪពុកម្តាយឈឺ (ផ្ញើកាតមកសុំច្បាប់មិនអនុញ្ញាតទេ) ពេលចូលធ្វើការវិញក្រុមហ៊ុនបញ្ឈប់ឬបង្ខំឱ្យដាក់លិខិតលាលែងដោយខ្លួនឯង ។
សូមបញ្ជាក់ថា រយៈពេល៧ថ្ងៃចាប់ពីថ្ងៃនេះតទៅបើសិនមិនទទួលបានតាមការទាមទារខាងលើយើងខ្ញុំនឹងចូលរួមធ្វើកូដកម្មជាមួយកម្មករ-កម្មការិនី។
សូមបញ្ជាក់ថា លិខិតនេះចុះហត្ថលេខាដោយលោក ជា មុនី ប្រធានសហជីពសេរីកម្មករចុះ ថ្ងៃទី១ តុលា ២០១១ ។ រហូតមកដល់ល្ងាចថ្ងៃទី៦ តុលា ពុំទាន់មានដំណោះស្រាយណាមួយបានធូរស្រាលឡើយ ហើយថ្ងៃទី៧ តុលា ក្រុមសហជីពទាំងនោះនឹងប្រកាសធ្វើកូដកម្មបន្តទៀត ។ ចំណែកភាគីខាងក្រុមហ៊ុនរោងចក្រ M&V មិនអាចសុំការបំភ្លឺបានទេ ប៉ុន្តែលោកពៅ ស៊ីថា បាននិយាយថា ខាងសហជីពមិនបានជូនដំណឹងមកខាងលោកទេ ប៉ុន្តែលោកបានអញ្ជើញភាគីទាំងសងខាងមកសម្របសម្រួលនៅមន្ទីរហើយតែការចរចាមិនត្រូវគ្នាដោយខាងក្រុមហ៊ុនមិនទទួលយកកម្មករដែលបានបញ្ឈប់ព្រោះបញ្ចប់កិច្ចសន្យាការងារ ឯខាងសហជីពចោទថា រើសអើងទើបដឹកនាំធ្វើកូដកម្ម។ លោកបញ្ជាក់ថា មុនពេលឈានដល់ធ្វើកូដកម្ម លុះត្រាការដោះស្រាយច្រើនដំណាក់កាលណាស់ ទើបធ្វើបាន តែនេះដាក់ទៅរដ្ឋមន្ត្រីហើយដឹកនាំធ្វើកូដកម្មតែម្តងគឺខុសនឹងច្បាប់ ៕
ចែករំលែកព័តមាននេះ