រាជធានីភ្នំពេញ ៖ ក្រុមហ៊ុន KTC Cable Co., Ltd របស់កូរ៉េខាងត្បូងដែលទើបតែទទួលបានសិទ្ធិផ្តាច់មុខក្នុងការគ្រប់គ្រងក្រុមហ៊ុន Camintel បានប្រកាសពីការចំណាយប្រាក់រហូតដល់ទៅ២០ម៉ឺនដុល្លារក្នុងការបាញ់កាំជ្រួចលំដាប់ថ្នាក់អន្តរជាតិនៅថ្ងៃបុណ្យអុំទូករយៈពេល២ថ្ងៃ។ នៅក្នុងឱកាសធ្វើសន្និសីទកាសែតមួយកាលពីថ្ងៃទី២០ ខែវិច្ឆិកា លោកគឹម មីយុងអ៊ីល ប្រធានក្រុមហ៊ុន KTC Cable Co., Ltd មានប្រសាសន៍ថា ដើម្បីជាការចូលរួមចំណែកអបអរថ្ងៃបុណ្យអុំទូក អកអំបុក សំពះព្រះខែ ឆ្នាំនេះក្រុមហ៊ុនរបស់លោកបានចំណាយប្រាក់រហូតដល់ទៅ២០ម៉ឺនដុល្លារទិញកាំជ្រួចដែលល្អបំផុត និងមានកំរិតស្តង់ដាអន្តរជាតិមកពីកូរ៉េបាញ់បង្ហោះនៅពេលយប់វេលាម៉ោង៦ និង៣០នាទីនាថ្ងៃទី២០ និង២១ វិច្ឆិកា ដើម្បីឱ្យប្រជាពលរដ្ឋខ្មែរទស្សនាប្លែកភ្នែក ។
លោកបានប្រាប់ទៀតថា កាំជ្រួចដែលបាញ់ចេញពីតំបន់ខាងមុខព្រះបរមរាជវាំងមានជើងទំរប្រហែលជា៨០០ដើម ហើយត្រូវបាញ់ប្រហែលជាង១ម៉ឺនគ្រាប់រយៈពេល៤០នាទី ។ មូលហេតុដែលលោកនាំយកកាំជ្រួចដ៏មានតំលៃមកបាញ់នេះគឺមានបំណងធ្វើឱ្យប្រជាពលរដ្ឋខ្មែរមានការភ្ញាក់ផ្អើលនិងទស្សនាកំសាន្តដោយមានភាពសប្បាយរីករាយ ព្រោះថា វាមិនមែនជាកាំជ្រួចធម្មតាឡើយ។ លោកបានបន្ថែមឱ្យដឹងទៀតថា កាលពីឆ្នាំ២០០៩ ពិធីបាញ់កាំជ្រួចបានធ្វើនៅខេត្តពោធិ៍សាត់រួចម្តងមកហើយ ៗមានប្រជាជនចូលរួមទស្សនាយ៉ាងច្រើនទៀតផង។ ដោយឡែកកាំជ្រួចដែលលោកយកមកបាញ់នាពេលនេះគឺជាកាំជ្រួចដែលទើបតែផលិតថ្មីតាមបច្ចេកវិទ្យាទំនើបមានកំរិតស្តង់ដាអន្តរជាតិ។
ក្រុមហ៊ុន KTC Cable Co., Ltd ទើបតែទទួលបានសិទ្ធិគ្រប់គ្រងផ្តាច់មុខក្រុមហ៊ុន Camintel បំរើសេវាទូរគមនាគមន៍ដែលចុះហត្ថលេខានៅថ្ងៃទី២៧ ខែតុលា ឆ្នាំ២០១០ ដោយមានការចូលរួមពីលោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍។ KTC បានចំណាយទុនយ៉ាងច្រើនក្នុងការវិនិយោគនៅស្រុកខ្មែរ ដូចជាកសាងទីលានវាយកូនហ្គោលនៅសៀមរាប និងដំឡើងរោងចក្រផលិតខ្សែកាបនៅភ្នំពេញជាដើម។ មិនតែប៉ុណ្ណោះក្រុមហ៊ុនធ្លាប់បានចំណាយប្រាក់យ៉ាងច្រើនជួយដល់កីឡាករបាល់ទាត់ជំរើសជាតិខ្មែរក្នុងការទៅហ្វឹកហាត់ និងប្រកួតនៅប្រទេសកូរ៉េ និងបានចំណាយ៥មឺុនដុល្លារជួយដល់និស្សិតក្រីក្រខ្មែរជារៀងរាល់ឆ្នាំ។ ពេលនេះក្រុមហ៊ុនសន្យាថា នឹងខិតខំជំរុញសេវាទូរគមនាគមន៍ឱ្យឈានមុខគេនៅកម្ពុជា និងនាំយកបច្ចេកវិទ្យាថ្មីៗពីប្រទេសកូរ៉េធ្វើយ៉ាងណាបំរើឱ្យបានតាមសេចក្តីត្រូវការរបស់ប្រជាពលរដ្ឋខ្មែរ ៕
ចែករំលែកព័តមាននេះ