ខេត្តមណ្ឌលគិរី ៖ ដើម្បីបង្កើនសោភ័ណភាព និងលើកកម្ពស់វិស័យសុខាមាលភាពរបស់ប្រជាពលរដ្ឋ អភិបាលខេត្តមណ្ឌលគិរីបានរៀបចំផ្លូវបេតុងថ្មី និងផ្លូវសម្រាប់ថ្មើរជើង ដ៏ស្រស់ស្អាតងាយស្រួលដល់បងប្អូនប្រជាពលរដ្ឋ ដើរហាត់ប្រាណ ដោយបានប្រសិទ្ធនាមថ្មីថា វិថី៧មករា…
ខេត្តមណ្ឌលគិរី ៖ ដើម្បីបង្កើនសោភ័ណភាព និងលើកកម្ពស់វិស័យសុខាមាលភាពរបស់ប្រជាពលរដ្ឋ អភិបាលខេត្តមណ្ឌលគិរីបានរៀបចំផ្លូវបេតុងថ្មី និងផ្លូវសម្រាប់ថ្មើរជើង ដ៏ស្រស់ស្អាតងាយស្រួលដល់បងប្អូនប្រជាពលរដ្ឋ ដើរហាត់ប្រាណ ដោយបានប្រសិទ្ធនាមថ្មីថា វិថី៧មករា ដែលមានទីតាំងនៅភូមិដោះក្រមុំ សង្កាត់សុខដុម ក្រុងសែនមនោរម្យ ស្របតាមអតីតព្រលានយន្តហោះចាស់ ។
ឯកឧត្តម ថង សាវុន អភិបាលខេត្តមណ្ឌលគិរីមានប្រសាសន៍ថា ជាការគិតគូរដល់សុខភាពសាធារណៈរបស់បងប្អូនប្រជាពលរដ្ឋ រស់នៅក្នុងមូលដ្ឋានផ្ទាល់ និងបង្កើនសោភ័នភាពក្រុង ជាពិសេស គឺបម្រើដល់វិស័យទេសចរណ៍ ដែលផ្លូវបេតុងថ្មីសន្លាងនេះ ស្ថិតនៅកណ្តាលប្រជុំជនក្រុងសែនមនោរម្យ តភ្ជាប់ទៅគ្រប់ទីរមណីយដ្ឋាននានាក្នុងខេត្ត ។
លោកអភិបាលខេត្តបន្តថា ទន្ទឹមនិងការកសាងផ្លូវបេតុងថ្មីស្របតាមព្រលានយន្តហោះចាស់ដែលមានប្រវែងប្រមាណជាងមួយពាន់ម៉ែត្រនេះ អាជ្ញាធរបានខិតខំកែច្នៃ ដោយដាំដើមឈើនិងដើមផ្កា បំពាក់ភ្លើងបំភ្លឺពេលរាត្រី សម្រួលដល់បងប្អូនដើរហាត់ប្រាណពេលយប់ រៀបចំប្រព័ន្ឋប្រឡាយរំដោះទឹក និងរៀបជញ្ជាំងថ្មការពារជម្រាលដងផ្លូវជាដើម ។
ដោយសារនាពេលកន្លងមកផ្លូវចំនុចនេះ មានសភាពលំបាកខ្លាំង តែដោយមានការយកចិត្តទុកដាក់ពីថ្នាក់ដឹកនាំ ហើយខេត្តមណ្ឌលគិរី ទទួលបានការអភិវឌ្ឍន៍ជាប្រចាំ លើហេដ្ឋារចនាសម្ពន្ឋនានា ដែលធ្លាប់ជាខេត្តនៅឆ្ងាយដាច់ស្រយាល ពីរាជធានីភ្នំពេញ បច្ចុប្បន្នមណ្ឌលគិរី បានប្រែមុខមាត់ថ្មី ទើបអាជ្ញាធរសម្រេចប្រសិទ្ឋនាមផ្លូវបេតុងថ្មីថា វិថី៧មករា ដែលឈ្មោះនេះសំដៅរំឮកនឹកគុណដល់ប្រមុខថ្នាក់ដឹកនាំ បិតាសន្តិភាព នាមនាំសុខសន្តិភាពសម្រាប់ជាតិមាតុភូមិរបស់យើងឲ្យមានការរីកចម្រើនរហូតដល់សព្វថ្ងៃ ។
ឯកឧត្តម ថង សាវុន បានផ្តាំផ្ញើដល់បងប្អូនប្រជាពលរដ្ឋ ជាពិសេសអាជ្ញាធរមូលដ្ឋាន ត្រូវចូលរួមថែរក្សាការពារនូវរាល់សមិទ្ឋផល ដែលសម្រេចបានឲ្យប្រើប្រាស់បានយូរអង្វែងទុកជាកេរ្តិ៍ដល់កូនចៅជំនាន់ក្រោយ ។ ដោយមិនត្រូវកាប់កាយគាស់ ទ្រូងផ្លូវ ប្រឡាយរំដោះទឹក ឬដីចំណីផ្លូវឡើយ ។ ហើយត្រូវចូលរួមសម្អាតអនាម័យបរិស្ថាន ដោយរើសសំរាមឬកាកសំណង់ ដែលអាចបណ្តាលឲ្យស្ទះលូ-ប្រឡាយទឹកតាមដងផ្លូវ ដែលនាំឲ្យគុណភាពផ្លូវធ្លាក់ចុះមិនធានាការប្រើប្រាស់បានយូរអង្វែង៕
ចែករំលែកព័តមាននេះ