ខេត្តបន្ទាយមានជ័យ ៖ អាជីវករថៃលក់ដូរនៅផ្សាររុងក្លឿជិត ១០០នាក់ បាននាំគ្នាលើកបដាតវ៉ាជាមួយក្រុមប្រតិភូបក្សប្រឆាំងថៃកាលពីថ្ងៃទី៧ ខែកក្កដា ឆ្នាំ២០២៥ នៅច្រកខ្លងលឹក ស្រុកអារញ្ញប្រាថេត ខេត្តស្រះកែវ…
ខេត្តបន្ទាយមានជ័យ ៖ អាជីវករថៃលក់ដូរនៅផ្សាររុងក្លឿជិត ១០០នាក់ បាននាំគ្នាលើកបដាតវ៉ាជាមួយក្រុមប្រតិភូបក្សប្រឆាំងថៃកាលពីថ្ងៃទី៧ ខែកក្កដា ឆ្នាំ២០២៥ នៅច្រកខ្លងលឹក ស្រុកអារញ្ញប្រាថេត ខេត្តស្រះកែវ ប្រទេសថៃ ទាមទារសុំអន្តរាគមន៍ឱ្យបើកច្រកព្រំដែនថៃ-កម្ពុជាដូចដើម
វិញ ។
ការតវ៉ានេះ បានធ្វើឡើងនៅពេលដែលមានក្រុមប្រតិភូអាវលឿងជាបក្សប្រឆាំងថៃចុះមកពិនិត្យនៅច្រកខ្លងលឹក ឈមនឹងច្រកប៉ោយប៉ែតកម្ពុជា ។ ក្រុមអាជីវករថៃ សុំឱ្យរដ្ឋាភិបាលថៃបើកច្រកព្រំដែនថៃ-កម្ពុជា ឱ្យដូចដើមវិញសម្រួលដល់ជីវភាពគ្រួសារពលរដ្ឋថៃនៅតាមជាយដែន ដែលកំពុងប្រកបរបររកស៊ីនៅផ្សាររុងក្លឿប្រឈមនឹងការលំបាក ដោយសារការបិទច្រកទ្វារព្រំដែន តើកម្ពុជាឬថៃជាអ្នកខាតបង់ ?
ក្រុមអាជីវករថៃដែលនាំគ្នាតវ៉ានិយាយថា នៅផ្សាររុងក្លឿមានតែអ្នកលក់គ្មានអ្នកទិញ បន្លែ ផ្លែឈើ ត្រី សាច់ លក់មិនដាច់ហើយនាំចេញមិនបាន បណ្តាលឱ្យខូចខាតបាត់បង់គ្រប់យ៉ាង ។ ក្រោយពីមានក្រុមអាជីវករនាំគ្នាតវ៉ានៅមុខស្នាក់ការគយថៃ លោក រង្សី ម៉ាន់រ៉ូម ប្រធានគណៈកម្មាធិការសន្តិសុខរដ្ឋកិច្ចការព្រំដែនថៃ និងយុទ្ធសាស្គ្រជាតិ បានធ្វើសន្និសីទកាសែតមួយនៅច្រកទ្វារខ្លងលឹក ស្នើឱ្យដោះស្រាយចំនួន៧ចំណុច និងបន្តប្រជុំនៅសាលាខេត្តស្រះកែវ នារសៀលថ្ងៃដដែលនេះ ។
សូមបញ្ជាក់ថា យោងតាមរបាយការណ៍របស់ស្នាក់ការត្រួតពិនិត្យច្រកទ្វារព្រំដែនអន្តរជាតិប៉ោយប៉ែត កាលពីថ្ងៃទី៦ ខែកក្កដា ឆ្នាំ២០២៥ មានពលរដ្ឋខ្មែរចូលមកកម្ពុជាចំនួន ១៤៩នាក់(ស្រី៦១នាក់) និងពលរដ្ឋថៃចេញពីកម្ពុជាចំនួន១៨៨នាក់(ស្រី១០២នាក់) តែមិនមានការអនុញ្ញាតឱ្យថៃនាំទំនិញចូលឡើយ ។
មន្ត្រីរាជរដ្ឋាភិបាលកម្ពុជានិយាយថា បាល់ស្ថិតលើជើងខាងថៃប៉ុណ្ណោះ បើកព្រំដែនទាំងអស់ឡើងវិញ ៥ម៉ោងក្រោយយ៉ាងយូរកម្ពុជានឹងបើកឡើងវិញតាមក្រោយ ។ មុននេះ សម្តេចតេជោបានថ្លែងថា កម្ពុជាគ្រាន់តែបោះដុំភ្លើងឱ្យថៃវិញប៉ុណ្ណោះ ៕
ចែករំលែកព័តមាននេះ