ខេត្តបន្ទាយមានជ័យ ៖ ព្រះសង្ឃ រួមនឹងបងប្អូនប្រជាពលរដ្ឋនៅក្នុងស្រុកភ្នំស្រុក បានស្រុះស្រួលគ្នាធ្វើនំអន្សមដើម្បីយកទៅជូនដល់កងទ័ពដែលកំពុងបំពេញភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែន ក្នុងភូមិសាស្ត្រខេត្តបន្ទាយមានជ័យ ។ ការផ្ដល់ជូននំអន្សមនេះ បានធ្វើឡើងកាលពីថ្ងៃទី៥ ខែកក្កដា…
ខេត្តបន្ទាយមានជ័យ ៖ ព្រះសង្ឃ រួមនឹងបងប្អូនប្រជាពលរដ្ឋនៅក្នុងស្រុកភ្នំស្រុក បានស្រុះស្រួលគ្នាធ្វើនំអន្សមដើម្បីយកទៅជូនដល់កងទ័ពដែលកំពុងបំពេញភារកិច្ចការពារបូរណភាពទឹកដីនៅតាមខ្សែបន្ទាត់ព្រំដែន ក្នុងភូមិសាស្ត្រខេត្តបន្ទាយមានជ័យ ។ ការផ្ដល់ជូននំអន្សមនេះ បានធ្វើឡើងកាលពីថ្ងៃទី៥ ខែកក្កដា ឆ្នាំ២០២៥កន្លងទៅ នៅយោធភូមិភាគ៥ ទីបញ្ជាការទិសទី១បន្ទាយមានជ័យ ដោយមានការអញ្ជើញចូលរួមពីឯកឧត្តម អ៊ុំ រាត្រី អភិបាលខេត្ត ព្រមទាំងភ្ញៀវបទេសផងដែរ ។
នេះគឺជាបង្ហាញនូវទឹកចិត្តដ៏ថ្លៃថ្លារបស់បងប្អូនប្រជាពលរដ្ឋ ក្នុងស្មារតីខ្មែររួបរួមសាមគ្គីគ្នាលើកទឹកចិត្តដល់កងទ័ព ដែលកំពុងឈរជើងការពារបូរណភាពទឹកដី ពីការឈ្លានពានរបស់សត្រូវឈ្លានពានចង់បានទឹកដីកម្ពុជា ក៏ដូចជាបញ្ជាក់ពីទឹកចិត្តខ្មែរជួយខ្មែរ ដែលជាការចូលរួមចំណែកយ៉ាងធំធេងជាមួយកងទ័ពរបស់យើង ។
លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ និងជាមេបញ្ជាការទិសទី១បន្ទាយមានជ័យ បានថ្លែងអំណរគុណបងប្អូនប្រជាពលរដ្ឋ ដែលបានចំណាយប្រាក់កាសរួមគ្នាធ្វើនំអន្សម សាច់គោ រួមនឹងគ្រឿងឧបភោគបរិភោគ ដើម្បីជូនដល់កងទ័ពដែលកំពុងបំពេញភារកិច្ចឈរជើងនៅតាមខ្សែបន្ទាត់ព្រំដែនការពារបូរណភាពទឹកដី ។
ក្នុងនាមថ្នាក់ដឹកនាំខេត្ត ឯកឧត្តម អ៊ុំ រាត្រី អភិបាលខេត្ត បានថ្លែងអំណរគុណចំពោះទឹកចិត្តរបស់បងប្អូនប្រជាពលរដ្ឋ ព្រះសង្ឃ ដែលបានរួមគ្នាក្នុងការធ្វើនំអន្សម ក៏ដូចជានាំយកនូវសាច់ គោ គ្រឿងឧបភោគបរិភោគ ជូនដល់កងទ័ព ដែលកំពុងបំពេញភារកិច្ចការពារបូរណភាពទឹកដី ។
ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋ បន្តចូលរួមសកម្មភាពមនុស្សធម៌ ជួយដល់កងទ័ពដែលកំពុងតែឈរជើងតាមខ្សែបន្ទាត់ព្រំដែនឱ្យកាន់ផុសផុល ដែលសកម្មភាពទាំងនេះគឺជាការផ្ដល់នូវកម្លាំងចិត្តមួយធ្វើឱ្យកងទ័ពកាន់តែមានទឹកចិត្ត ដើម្បីការពារបូរណភាពទឹកដី ជាតិ មាតុភូមិ ។
សូមបញ្ជាក់ថា បងប្អូនប្រជាពលរដ្ឋដែលនាំយកនំអន្សមទៅជូនដល់កងទ័ព មាននំអន្សមជាង២ពាន់ សាច់គោចំនួន២ក្បាល ទឹកបរិសុទ្ធជាង៤០០យួរ និងគ្រឿងឧបភោគបរិភោគ ព្រមទាំងប្រាក់ដែលចូលរួមពីព្រះសង្ឃសរុបចំនួន២លាន៣សែនរៀលផងដែរ ៕
ចែករំលែកព័តមាននេះ