ទីក្រុងយេរូសាឡឹម៖ យោធាអ៊ីស្រាអែលអះអាងថានៅមុននេះបន្តិច ខ្លួនបាញ់ទម្លាក់យន្តហោះចម្បាំងរបស់អ៊ីរ៉ង់នៅលើដែនអាកាសរបស់អ៊ីរ៉ង់ផ្ទាល់តែម្ដង។ នោះជាយន្តហោះផលិតនៅប្រទេសរុស្ស៊ីម៉ាកយក្ស១៣០ (Yak-130) ពេលកំពុងហោះហើរនៅលើដែនអាកាសនៃរដ្ឋធានីតេអេរ៉ង់សុខៗស្រាប់តែយន្តហោះចម្បាំងរបស់អ៊ីស្រាអែលម៉ាកអែហ្វ៣៥ (F-35) មិនដឹងចេញមកពីកន្លែងណាទេ (ព្រោះជាយន្តហោះបំបាំងកាយ) បានបាញ់ទម្លាក់យន្តហោះអ៊ីរ៉ង់តែម្ដង។ នេះជាករណីដំបូងបំផុតដែលយន្តហោះមានមនុស្សបើកត្រូវបានបាញ់ទម្លាក់ដោយយន្តហោះអែហ្វ៣៥។
ហេតុការណ៍នេះក៏ជាលើកទីមួយនៅក្នុងរយៈពេល៤០ឆ្នាំដែលកងទ័ពអាកាសអ៊ីស្រាអែលប្រើប្រាស់យន្តហោះមានមនុស្សបើកបាញ់ប្រហារទៅលើយន្តហោះ។ ធ្លាប់មានករណីយោធាអ៊ីស្រាអែលប្រើយន្តហោះបាញ់ទម្លាក់យន្តហោះរបស់សត្រូវម្ដងកាលពីថ្ងៃទី២៤ ខែវិច្ឆិកា ឆ្នាំ១៩៨៥ គិតទៅជាង៤០ឆ្នាំមកហើយ។ កាលនោះបាញ់ធ្លាក់នៅលើដែនអាកាសប្រទេសលីបង់។ នៅក្នុងហេតុការណ៍នោះ យន្តហោះម៉ាកអែហ្វ១៥ (F-15) របស់អ៊ីស្រាអែលបានបាញ់ធ្លាក់យន្តហោះម៉ាកមីក២៣ (MiG-23) របស់កងទ័ពស៊ីរី។
គួរកត់សម្គាល់ថាការបាញ់ធ្លាក់យន្តហោះអ៊ីរ៉ង់នៅលើដែនអាកាសអ៊ីរ៉ង់នោះកើតមានឡើងចំពេលដែលសង្គ្រាមរវាងអ៊ីរ៉ង់ទល់នឹងអាមេរិក និងអ៊ីស្រាអែលបន្តឆាបឆេះយ៉ាងពេញទំហឹង មិនទាន់មានសញ្ញាថមថយនៅឡើយទេ។ គេស្ដាប់ឮសំឡេងផ្ទុះយ៉ាងកងរំពងនៅរដ្ឋធានីតេអេរ៉ង់នៅពេលសង្គ្រាមឈានចូលដល់ថ្ងៃទី៥។ អ៊ីស្រាអែលថ្លែងថាប្រព័ន្ធការពារដែនអាកាសរបស់ខ្លួនត្រូវបានដាក់ឱ្យដំណើរការយ៉ាងពេញបន្ទុកដើម្បីតាមប្រមាញ់មីស៊ីល រ៉ុកកែត ឬដ្រូនដែលបញ្ជូនទៅវាយប្រហារអ៊ីស្រាអែល ពោលគឺបាញ់ដោយក្រុមហេសបូឡានៅប្រទេសលីបង់ ឬបាញ់ដោយយោធាអ៊ីរ៉ង់ផ្ទាល់តែម្ដង។
ប៉ុន្តែប្រព័ន្ធការពារដែនអាកាសមិនអាចទប់ទល់បាន១០០%នោះទេ។ នៅទីក្រុងយេរូសាឡឹម មីស៊ីល និងដ្រូនរបស់អ៊ីរ៉ង់អាចវាយប្រហារជាច្រើនករណី និងបង្កើតជាសំឡេងផ្ទុះយ៉ាងកក្រើកទីក្រុងនេះ។ គិតទៅ ត្រឹមតែមួយប៉ប្រិចភ្នែកប៉ុណ្ណោះ ជីវិតមនុស្សជាច្រើនត្រូវធ្វើពលីព្រោះតែសង្គ្រាម។ អ៊ីរ៉ង់អះអាងថាការវាយប្រហាររបស់អាមេរិក និងអ៊ីស្រាអែលបានសម្លាប់ជនជាតិរបស់ខ្លួនជិត៨០០នាក់ (៧៨៧នាក់)។ សូម្បីតែបុគ្គលសំខាន់ៗរបស់អ៊ីរ៉ង់ដែលលោកត្រាំប្រមើលឃើញថាអាចនឹងក្លាយជាមេដឹកនាំអ៊ីរ៉ង់នាពេលអនាគតក៏បានបាត់បង់ជីវិតនៅក្នុងសង្គ្រាមផងដែរ៕ ប្រភព៖ អាល់ចាស៊ីរ៉ា (Al Jazeera), យួរ៉ូ ញូស៍ (Euro News) និងប្រភពដទៃទៀត
ចែករំលែកព័តមាននេះ